აბიგაილი

[მამა(ჩემმა) გაიხარა].

1. დავითის ცოლი; თავიდან იყო მდიდარი მაონელი ნაბალის ცოლი. ქალაქი მაონი იუდას უდაბნოს განაპირას მკვდარი ზღვის დასავლეთით მდებარეობდა (1სმ. 25:2, 3; იეს. 15:20, 55). აბიგაილი „ძალიან გონიერი და ლამაზი ქალი“ იყო, მისი პირველი ქმარი კი, რომლის სახელიც უგუნურს ნიშნავდა, „უხეში და ავისმქმნელი“ კაცი იყო.

წინასწარმეტყველი სამუელის სიკვდილის შემდეგ დავითი და მისი კაცები იმ ადგილას გადავიდნენ, სადაც აბიგაილის ქმრის ცხვარს მწყემსავდნენ. დავითის ხალხი „კედლად“ ედგა ნაბალის მწყემსებსა და ფარებს დღითა და ღამით. ამიტომ მოგვიანებით, როცა ცხვრის პარსვის დრო დადგა, დავითმა რამდენიმე ახალგაზრდა კაცი გაუგზავნა ნაბალს ქარმელში, რათა მათ შეეხსენებინათ მანამდე გაწეული სამსახური და საკვები ეთხოვათ (1სმ. 25:4—8, 15, 16). მაგრამ ძუნწმა ნაბალმა საყვედურებით აავსო ისინი, შეურაცხყო დავითი და აგრძნობინა, რომ უმნიშვნელო ადამიანი იყო და ის და მისი ხალხი გაქცეული მონები იყვნენ (1სმ. 25:9—11, 14). ამან იმდენად განარისხა დავითი, რომ მახვილი შემოირტყა და დაახლოებით 400 კაცთან ერთად გაემართა ქარმელისკენ, რათა სიცოცხლეს გამოესალმებინა ნაბალიცა და მის სახლში მცხოვრები მამაკაცებიც (1სმ. 25:12, 13, 21, 22).

როცა მომხდარის შესახებ აბიგაილმა შეშფოთებული მსახურისგან გაიგო, გამჭრიახობა გამოავლინა და სასწრაფოდ მოაგროვა საკვების დიდი მარაგი, მათ შორის ქუმელი, და წინ გაიმძღვარა მსახურების ხელით, როგორც იაკობმა გააკეთა ესავთან შეხვედრამდე (1სმ. 25:14—19; დბ. 32:13—20). აბიგაილს ქმრისთვის არაფერი უთქვამს, ისე გაემართა დავითთან შესახვედრად. მისმა ხანგრძლივმა, მხურვალე ვედრებამ, რაშიც სიბრძნე და ლოგიკა, აგრეთვე პატივისცემა და მორჩილება ჩანდა, დაარწმუნა დავითი, რომ მისი ქმრის უგუნური სიტყვებით ვერ გაამართლებდა უდანაშაულო სისხლის ღვრას ან იმისადმი რწმენის ნაკლებობას, რომ იეჰოვა საუკეთესოდ მოაგვარებდა ამ საქმეს (1სმ. 25:14—20, 23—31). დავითმა მადლობა გადაუხადა ღმერთს აბიგაილის გონიერებისა და მყისიერი მოქმედებისთვის (1სმ. 25:32—35; შდრ. იგ. 25:21, 22; 15:1, 2).

სახლში დაბრუნებული აბიგაილი დაელოდა, ვიდრე ქმარი ნადიმის შემდეგ ღვინისგან გამოფხიზლდებოდა, შემდეგ კი ყველაფერს მოუყვა. „გული ჩაუკვდა ნაბალს და გაქვავდა კაცი“. ათი დღის შემდეგ დაჰკრა იეჰოვამ ნაბალს და მოკვდა. როცა დავითმა ამის შესახებ გაიგო, შეუთვალა აბიგაილს, რომ ცოლად თხოულობდა. ის უყოყმანოდ დასთანხმდა. დავითის სიყვარული მას იზრეელელ ახინოამთან უნდა გაეყო, რომელიც დავითმა მანამდე მოიყვანა ცოლად. დავითის პირველი ცოლი მიქალი მამამისმა საულმა სხვა კაცს მიათხოვა (1სმ. 25:36—44).

აბიგაილი დავითთან ერთად ცხოვრობდა შეფელას დასავლეთ საზღვართან მდებარე გათში, მოგვიანებით კი — ნეგების ჩრდ.-დას-ით ციკლაგში. დავითის არყოფნის დროს ამალეკელები თავს დაესხნენ ციკლაგს სამხრეთიდან, გადაწვეს ის და ტყვედ წაიყვანეს ყველა ქალი და ბავშვი, მათ შორის აბიგაილი და ახინოამი. იეჰოვას მიერ საქმის წარმატებით დასრულებაში დარწმუნებული დავითი თავისი კაცებით დაედევნა მათ, მოულოდნელად შეუტია ამალეკელებს, დაამარცხა და დაიბრუნა ტყვეები და ქონება (1სმ. 30:1—19).

ციკლაგში დაბრუნებიდან სამი დღის შემდეგ მათ საულის სიკვდილის შესახებ შეიტყვეს (2სმ. 1:1, 2). აბიგაილი ქმარს წაჰყვა იუდას ხებრონში, სადაც დავითი მეფედ სცხეს. აქ მას შეეძინა ვაჟი ქილაბი (2სმ. 3:3), რომელიც 1 მატიანის 3:1-ში დანიელად არის მოხსენიებული. ხებრონში დავითის ცოლების რიცხვი დროთა განმავლობაში ექვსამდე გაიზარდა. ამის შემდეგ ბიბლიაში აღარც აბიგაილია მოხსენიებული და აღარც მისი ვაჟი (2სმ. 3:2—5).

2. დავითის ორი დიდან ერთ-ერთი (1მტ. 2:13—17). ზოგი ბიბლეისტის აზრით, ისინი მხოლოდ დედით იყვნენ და-ძმანი. 2 სამუელის 17:25-ში აბიგაილს „ნახაშის ასული“ ეწოდება. რაბინთა ტრადიციის თანახმად, ნახაში დავითის მამის, იესეს მეორე სახელი იყო. სეპტუაგინტაში (ლაგარდის გამოცემა) ამ მუხლში ნახაშის ნაცვლად იესე წერია. მსგავსად წერია რამდენიმე თანამედროვე თარგმანშიც (იხ. AT; JB; NC [ესპანური]). თუმცა აღსანიშნავია, რომ 1 მატიანის 2:13—16-ში აბიგაილი და ცერუია მოიხსენიებიან არა იესეს ასულებად, არამედ იესეს ვაჟების, მათ შორის დავითის დებად. ეს შეიძლება იმაზე მიანიშნებდეს, რომ ვიდრე მათი დედა იესეს ცოლი და მისი ვაჟების დედა გახდებოდა, თავიდან ნახაშის ცოლი იყო, რომელთანაც აბიგაილი და ცერუია შეეძინა. ამგვარად, შეუძლებელია გადაჭრით იმის თქმა, რომ აბიგაილი იესეს ასული იყო (იხ. ნახაში №2).

აბიგაილზე, დავითის დაზე, ბიბლიაში ნათქვამია, რომ მას მხოლოდ ერთი ვაჟი, ამასა შეეძინა. 2 სამუელის 17:25-ში მის ქმრად მოხსენიებულია ისრაელი ითრა, რომელსაც სხვაგან იეთერი ეწოდება (1მფ. 2:5, 32), 1 მატიანის 2:17-ში კი — „ისმაელელი იეთერი“ (იხ. იეთერი №6). შესაძლოა, აბიგაილი მაშინ გაჰყვა ცოლად იეთერს, როცა იესე ოჯახთან ერთად მოაბში ცხოვრობდა (1სმ. 22:3, 4). დავითის მეფობის დროს აბესალომის აჯანყებამდე აბიგაილის ვაჟ ამასაზე დიდი ყურადღება არ მახვილდება. მისმა ბიძაშვილმა აბესალომმა ის თავისი ჯარის მხედართმთავრად დანიშნა. მიუხედავად ამისა, აბესალომის სიკვდილის შემდეგ აბიგაილის ძმამ, მეფე დავითმა ტახტზე დასაბრუნებლად ამასას მხარდაჭერა სთხოვა, შემდეგ კი ის იოაბის ნაცვლად თავისი ჯარის მხედართმთავრად დანიშნა (2სმ. 19:11—14). ამ თანამდებობის გამო მალე მისმა გაბოროტებულმა დეიდაშვილმა იოაბმა აბიგაილის ვაჟი სიცოცხლეს გამოასალმა (2სმ. 20:4—10).