თავი 11

როგორ გვეწოდა სახელი „იეჰოვას მოწმეები“

იეჰოვას მოწმეებს მათი თანამედროვე ისტორიის პირველი ათწლეულების განმავლობაში, უბრალოდ, ბიბლიის მკვლევარებს უწოდებდნენ. როდესაც სხვები ეკითხებოდნენ, რა ერქვა მათ ორგანიზაციას, ძმები პასუხობდნენ: „ჩვენ ქრისტიანები ვართ“. ამ კითხვის პასუხად ძმა რასელმა „საგუშაგო კოშკში“ თქვა: „ჩვენ არ ვუწოდებთ საკუთარ თავს რაიმე განსხვავებულ და განსაკუთრებულ სახელს და ამით არ გამოვირჩევით სხვა ქრისტიანებისგან. ჩვენთვის სრულიად საკმარისია, გვერქვას ქრისტიანები — სახელი, რომლითაც პირველი საუკუნის წმინდები იყვნენ ცნობილნი“ (1888 წლის სექტემბრის ნომერი).

მაშ, რატომ გვეწოდება დღეს იეჰოვას მოწმეები?

სახელი „ქრისტიანი“

პირველი საუკუნის ქრისტიანების მსგავსად, იესო ქრისტეს ნამდვილი მიმდევრები დღეს ერთმანეთს „ძმებს“, „მეგობრებსა“ და „ღვთის კრებას“ უწოდებენ (საქ. 11:29; 3 იოან. 14; 1 კორ. 1:2). ადრე ისინი ქრისტეს „ბატონს“ უწოდებდნენ, საკუთარ თავს კი — „ქრისტე იესოს მონებს“ და „ღვთის მონებს“ (კოლ. 3:24; ფილ. 1:1; 1 პეტ. 2:16). ასეთი სახელები ფართოდ გამოიყენებოდა კრებებში და ეს ყველასთვის გასაგები იყო.

პირველ საუკუნეში იყენებდნენ გამოთქმას „გზა“ და მასში იგულისხმებოდა ცხოვრების წესი, რომელიც აგებული იყო იესო ქრისტესადმი რწმენაზე (და, ფართო გაგებით, ქრისტიანულ კრებაზე) (საქ. 9:2; 19:9). საქმეების 18:25-ის არაერთი თარგმანი იმაზე მიანიშნებს, რომ მას „იეჰოვას გზასაც“ უწოდებდნენ.a მეორე მხრივ, ისინი, ვინც კრების წევრები არ იყვნენ, მას დაცინვით „ნაზარეთელთა სექტად“ მოიხსენიებდნენ (საქ. 24:5).

ახ. წ. 44 წლისთვის, ან ამის შემდეგ მალევე, იესო ქრისტეს ერთგული მიმდევრები ქრისტიანების სახელით გახდნენ ცნობილნი. ზოგიერთი აცხადებს, რომ მათ ეს სახელი გარეშეებმა დაარქვეს დამცირების მიზნით. მაგრამ არაერთი ბიბლიის ლექსიკოგრაფი და ბიბლეისტი ამტკიცებს, რომ საქმეების 11:26-ში გამოყენებული ზმნა ღვთიურ ხელმძღვანელობაზე ან გამოცხადებაზე მიუთითებს. ამგვარად, „ახალი ქვეყნიერების თარგმანის“ მიხედვით ამ მუხლში ვკითხულობთ: „მოწაფეებს ღვთის განგებით პირველად ანტიოქიაში ეწოდათ ქრისტიანები“ (მსგავსი აზრია გადმოცემული სხვა თარგმანებშიც: რობერტ იანგის „წმინდა ბიბლიის სიტყვასიტყვითი თარგმანი“, 1898 წლის გადამუშავებული ვარიანტი; „მარტივი ინგლისური ბიბლია“, 1981 წელი; ჰიუგო მაკკორდის „ახალი აღთქმა“, 1988 წელი). ახ. წ. 58 წლისთვის სახელი „ქრისტიანი“ რომაელი მმართველებისთვისაც კარგად იყო ცნობილი (საქ. 26:28).

მოციქულების სიცოცხლეშივე სახელი „ქრისტიანი“ კონკრეტული იყო და ქრისტიანებს სხვებისგან გამოარჩევდა (1 პეტ. 4:16). ვინც თავს ქრისტიანად აცხადებდა, მაგრამ თავისი მრწამსით ან საქციელით საპირისპიროს აჩვენებდა, ის ქრისტიანული საზოგადოებიდან იკვეთებოდა. მაგრამ იესოს წინასწარმეტყველების თანახმად, მოციქულების სიკვდილის შემდეგ სატანამ სარეველა დათესა, რამაც ხელი შეუწყო ეგრეთ წოდებული ქრისტიანების „აღმოცენებას“. ისინიც აცხადებდნენ, რომ ქრისტიანები იყვნენ (მათ. 13:24, 25, 37—39). როდესაც განდგომილმა ქრისტიანობამ ძალადობით დაიწყო ხალხის თავის მრწამსზე მოქცევა, ზოგმა თავი ქრისტიანად გამოაცხადა, რომ დევნისთვის თავი აერიდებინა. დროთა განმავლობაში ყველა ევროპელი, რომლებიც თავს არ თვლიდნენ არც ებრაელებად, არც მუსლიმანებად და არც ათეისტებად, ხშირად, თავიანთი რწმენისა და ქცევის მიუხედავად, ქრისტიანებად ითვლებოდნენ.

დამამცირებელი მეტსახელები

XVI საუკუნიდან მოყოლებული არსებულმა სიტუაციამ სირთულეები შეუქმნა რეფორმატორებს. რამდენადაც სახელი „ქრისტიანი“ ძალიან ფართოდ გამოიყენებოდა, როგორ შეეძლოთ საკუთარი თავი განესხვავებინათ მათგან, ვინც თავს ქრისტიანად აცხადებდა?

ხშირად მათ უწევდათ იმ დამცინავი მეტსახელების მიღება, რომლებსაც მოწინააღმდეგეები არქმევდნენ. მაგალითად, გერმანიაში მარტინ ლუთერის რელიგიურმა მოწინააღმდეგეებმა მის მიმდევრებს ლუთერანები დაარქვეს. ინგლისში ჯონ უესლის თანამოაზრეებს მეთოდისტები უწოდეს, რადგან ზედმიწევნით ზუსტად (მეთოდურად) ასრულებდნენ რელიგიურ მსახურებას. ბაპტისტებმა თავიდან უარყვეს მეტსახელი ანაბაპტისტები (ნიშნავს „ხელახლა მონათლულნი“), მაგრამ საბოლოოდ ისინი გარკვეულ დათმობაზე წავიდნენ და ბაპტისტები ეწოდათ.

რის თქმა შეიძლება ბიბლიის მკვლევარებზე? სამღვდელოება მათ რასელისტებსა და რუტერფორდისტებს უწოდებდა. მაგრამ ასეთი სახელების მიღება სექტანტურ სულს აირეკლავდა. ეს იმ სიტყვების საპირისპირო იქნებოდა, რომლებიც პავლე მოციქულმა პირველ ქრისტიანებს მისწერა: „განა ქვეყნიურ ადამიანებად არ რჩებით [რომელთაც ხორციელი შეხედულებები აქვთ და არა სულიერი], როცა ერთი ამბობს, მე პავლესი ვარო, ხოლო მეორე — მე აპოლოსისო?“ (1 კორ. 3:4). ზოგმა მათ მილენიუმისტები შეარქვა („მილენიუმი“ ნიშნავს ქრისტეს ათასწლიან მეფობას), მაგრამ ქრისტეს ათასწლიანი მეფობა მათი სწავლებებიდან მხოლოდ ერთ-ერთი იყო. სხვები მათ „საგუშაგო კოშკის ხალხს“ უწოდებდნენ, თუმცა ესეც შეუფერებელი სახელი იყო, რადგან „საგუშაგო კოშკი“ მხოლოდ ერთ-ერთი იყო იმ პუბლიკაციებიდან, რომლებსაც ისინი ბიბლიური ჭეშმარიტების გასაცხადებლად იყენებდნენ.

საჭირო გახდა განმასხვავებელი სახელი

დროთა განმავლობაში ცხადი გახდა, რომ საკმარისი არ იყო, იეჰოვას მსახურებს მხოლოდ ქრისტიანები რქმეოდათ. საჭირო გახდა განმასხვავებელი სახელი. სიტყვა „ქრისტიანმა“ დაკარგა პირვანდელი მნიშვნელობა, რადგან ვინც თავს ქრისტიანად აცხადებდა, ხშირად წარმოდგენაც არ ჰქონდა, ვინ იყო იესო ქრისტე, რას ასწავლიდა და რა მოეთხოვებოდათ მის ჭეშმარიტ მიმდევრებს. რაც უფრო უკეთ იგებდნენ ჩვენი ძმები ღვთის სიტყვას, მით უფრო ნათლად ხედავდნენ იმის აუცილებლობას, რომ გამოცალკევებულნი და გამორჩეულნი ყოფილიყვნენ იმ რელიგიებისგან, რომლებიც ქრისტიანობას იბრალებდნენ.

ჩვენი ძმები საკუთარ თავს ხშირად ბიბლიის მკვლევარებს უწოდებდნენ, 1910 წლიდან კი იყენებდნენ სახელს „ბიბლიის მკვლევართა საერთაშორისო ასოციაცია“. ამ ახალ იურიდიულ სახელს დაბნეულობა რომ არ გამოეწვია, მათ 1914 წელს ადგილობრივ ჯგუფებთან დაკავშირებით მიიღეს ახალი სახელი „ბიბლიის მკვლევართა გაერთიანება“. მაგრამ მათი თაყვანისცემა მხოლოდ ბიბლიის გამოკვლევით არ შემოიფარგლებოდა. გარდა ამისა, სხვებიც იკვლევდნენ ბიბლიას — ზოგი გულმოდგინედ, ზოგიც კრიტიკულად; ბევრი კი მას უბრალოდ კარგ წიგნად მიიჩნევდა. ძმა რასელის სიკვდილის შემდეგ ზოგმა მისმა ყოფილმა თანამოაზრემ შეწყვიტა საზოგადოება „საგუშაგო კოშკთან“ და ბიბლიის მკვლევართა საერთაშორისო ასოციაციასთან თანამშრომლობა და მათი საქმიანობის წინააღმდეგაც კი გამოდიოდა. ასეთმა ჯგუფებმა სხვადასხვა სახელი დაირქვეს, მაგრამ ზოგი კვლავაც ბიბლიის მკვლევართა გაერთიანების სახელით იწოდებოდა, რამაც გაურკვევლობა გამოიწვია.

მაგრამ მოგვიანებით, 1931 წელს ჩვენ მივიღეთ მართლაც ყველასგან განსხვავებული სახელი — იეჰოვას მოწმეები. მწერალი ჩანდლერ სტერლინგი ამბობს, რომ ეს იყო საზოგადოება „საგუშაგო კოშკის“ პრეზიდენტის, რუტერფორდის „გენიალური აზრი“. ჩანდლერის აზრით, ეს ჭკვიანური ნაბიჯი იყო, რომელმაც არა მხოლოდ ოფიციალური სახელი შესძინა ჯგუფს, არამედ იეჰოვას მოწმეებს გაუადვილა, სათავისოდ გამოეყენებინათ ბიბლიის ის ადგილები, სადაც „მოწმე“ და „დამოწმება“ მოიხსენიება. მაგრამ მაკმილანს, რომელიც საზოგადოება „საგუშაგო კოშკის“ სამ პრეზიდენტთან თანამშრომლობდა, განსხვავებული აზრი ჰქონდა. ძმა რუტერფორდზე, რომელმაც ამ სახელის მიღებასთან დაკავშირებით განცხადება გააკეთა, მან თქვა: „ადრეც დარწმუნებული ვიყავი და არც ახლა მეპარება ეჭვი, რომ მას უფალმა უხელმძღვანელა. ეს ის სახელია, რომელიც იეჰოვას უნდა, რომ ვატაროთ; ჩვენ გვიხარია და ძალიან ბედნიერები ვართ, რომ ამ სახელს ვატარებთ“. რა ცხადყო ფაქტებმა? ამ სახელის მიღება ძმა რუტერფორდის „გენიალური აზრი“ იყო თუ ღვთის ხელმძღვანელობა?

მოვლენები, რომლებიც წინ უძღოდა ამ სახელის მიღებას

ძვ. წ. მერვე საუკუნეში იეჰოვამ აღძრა ესაია, რომ დაეწერა: „თქვენა ხართ ჩემი მოწმეები, — ამბობს იეჰოვა, — ჩემი მსახური, რომელიც მე ავირჩიე, რათა გცოდნოდათ და გერწმუნათ ჩემი და მიმხვდარიყავით, რომ მე იგივე ვარ. ჩემამდე არ გამოსახულა ღმერთი და არც ჩემ შემდეგ იქნება . . . თქვენა ხართ ჩემი მოწმეები, — ამბობს იეჰოვა, — და მე ღმერთი ვარ“ (ეს. 43:10, 12). ქრისტიანულ-ბერძნული წერილები გვიჩვენებს, რომ ესაიას მიერ ჩაწერილი მრავალი წინასწარმეტყველება ქრისტიანულ კრებაზე შესრულდა (შეადარეთ ესაიას 8:18 ებრაელების 2:10—13-ს; ესაიას 66:22 გამოცხადების 21:1, 2-ს). მაგრამ „საგუშაგო კოშკში“ მისი გამოცემიდან 40 წლის განმავლობაში არასოდეს განხილულა ესაიას 43:10—12.

წმინდა წერილების შემდგომმა გამოკვლევამ იეჰოვას მსახურებს ყურადღება ახალ მნიშვნელოვან მოვლენებზე გადაატანინა. 1914 წელს ზეცაში იშვა ღვთის სამეფო, რომლის მესიანური მეფეც იესო გახდა. 1925 წელს, როცა ამ საკითხს ნათელი მოეფინა, „საგუშაგო კოშკის“ 11 სხვადასხვა გამოშვებაში ყურადღება გამახვილდა ესაიას 43-ე თავში ჩაწერილ წინასწარმეტყველებაზე, რომ იეჰოვას უნდა ჰყოლოდა მოწმეები.

1926 წლის 1 იანვრის „საგუშაგო კოშკის“ მთავარ სტატიაში განხილული იყო საკითხი: „ვინ განადიდებს იეჰოვას?“. მომდევნო ხუთი წლის განმავლობაში გამოცემულ „საგუშაგო კოშკის“ 46 სტატიაში ესაიას 43:10—12-ის სხვადასხვა ნაწილი ყოველთვის ჭეშმარიტ ქრისტიანებთან დაკავშირებით განიხილებოდა.b 1929 წელს აღნიშნული იყო, რომ წამოჭრილი საკითხი, რომელიც ყველა გონიერ ქმნილებას ეხებოდა, იეჰოვას სახელის განდიდებას მოიცავდა. იმ პასუხისმგებლობასთან დაკავშირებით, რომელიც იეჰოვას მსახურებს ეკისრათ წამოჭრილ საკითხში, არაერთხელ იყო მოყვანილი ესაიას 43:10—12.

ამგვარად, ფაქტებმა ცხადყო, რომ ბიბლიის კვლევის შედეგად ყურადღება ისევ და ისევ იეჰოვას მოწმედ ყოფნის ვალდებულებაზე მახვილდებოდა. მთავარი სახელი კი არ იყო, რომელსაც ეს ჯგუფი ატარებდა, არამედ საქმე, რომელიც მათ უნდა გაეკეთებინათ.

და მაინც, რომელი სახელით უნდა ყოფილიყვნენ მოწმეები ცნობილნი? რომელი სახელი შეეფერებოდა იმ საქმეს, რომელსაც ისინი აკეთებდნენ? რა დასკვნამდე მიჰყავდა ისინი ღვთის სიტყვას? ეს საკითხი განხილული იყო კოლუმბუსში (ოჰაიოს შტატი) 1931 წლის 24—30 ივლისს ჩატარებულ კონგრესზე.

ახალი სახელი

კონგრესის პროგრამის პირველ გვერდზე დიდი ასოებით ეწერა JW.. რას ნიშნავდა ეს ასოები? მათი მნიშვნელობა კვირას, 26 ივლისს აიხსნა. იმ დღეს ძმა რუტერფორდი გამოვიდა მოხსენებით „სამეფო — კაცობრიობის იმედი“. როცა ხსნიდა, თუ ვინ იყვნენ ღვთის სამეფოს მაუწყებლები, რუტერფორდმა რამდენჯერმე ახსენა სახელი „იეჰოვას მოწმეები“ (ინგლისურად Jehovah’s Witnesses).

მოგვიანებით იმავე დღეს ძმა რუტერფორდმა წარმოთქვა კიდევ ერთი მოხსენება, რომელშიც ახსნა, თუ რატომ იყო საჭირო განსხვავებული სახელი.c რომელ სახელზე მიუთითებდა თავად ღვთის სიტყვა? მომხსენებელმა წაიკითხა საქმეების 15:14, რომელიც ყურადღებას ამახვილებს ღვთის განზრახვაზე, გამოყოს „ხალხი თავისი სახელისთვის“. მან ისიც აღნიშნა, რომ გამოცხადების 3:14-ის თანახმად, იესო ქრისტე არის „ერთგული და ჭეშმარიტი“ მოწმე. მან წაიკითხა იოანეს 18:37, სადაც იესო ამბობს: „იმიტომ მოვედი ქვეყნიერებაზე, რომ ჭეშმარიტების შესახებ დამემოწმებინა“. აგრეთვე ყურადღება გაამახვილა 1 პეტრეს 2:9, 10-ზე, სადაც ნათქვამია, რომ ღვთის მსახურებმა ყველგან უნდა აუწყონ მისი აღმატებულობის შესახებ, ვინც სიბნელიდან თავის საოცარ სინათლეში გამოიხმო. მან ახსნა რამდენიმე მუხლი ესაიას წინასწარმეტყველებიდან, რომელთაგანაც ზოგიერთი იმ დროს ნათლად არ ესმოდათ. მოხსენებამ კულმინაციას მიაღწია, როცა მომხსენებელმა განიხილა ესაიას 43:8—12, რომელშიც ღვთის მითითებაა ჩაწერილი: „თქვენა ხართ ჩემი მოწმეები, — ამბობს იეჰოვა, — და მე ღმერთი ვარ“. რა დასკვნამდე მივიდნენ ისინი იეჰოვას სიტყვის განხილვის შემდეგ? რომელი სახელი იქნებოდა იმ საქმისთვის შესაფერისი, რომლისთვისაც ღმერთი იყენებდა მათ?

პასუხი ნათლად ჩანდა იმ კონგრესზე მიღებულ რეზოლუციაში.d

მასში ეწერა: «გვინდა, რომ ჩვენი პოზიცია ყველასთვის ცნობილი გახდეს და გვწამს, რომ ის შეთანხმებულია ბიბლიაში ჩაწერილ ღვთის ნებასთან, ამიტომ ვაცხადებთ:

ჩვენ ძალიან გვიყვარს ძმა რასელი, უაღრესად ვაფასებთ მის მიერ გაკეთებულ საქმეს და დარწმუნებულნი ვართ, რომ უფალმა გამოიყენა ის და უხვად აკურთხა მისი საქმე. მაგრამ ღვთის სიტყვის თანახმად, შეუძლებელია „რასელისტები“ გვერქვას. ბიბლიისა და ტრაქტატების საზოგადოება „საგუშაგო კოშკი“, ბიბლიის მკვლევართა საერთაშორისო ასოციაცია და მქადაგებელთა ასოციაცია მხოლოდ იურიდიული სახელებია იმ კორპორაციებისა, რომლებიც ჩვენ, ქრისტიანულ ჯგუფს გვაქვს და ღვთის მითითებისამებრ დაკისრებული საქმის შესასრულებლად ვიყენებთ. მაგრამ არც ერთი ეს სახელი არ მოგვესადაგება ჩვენ, როგორც ქრისტიანულ ჯგუფს, რომლებიც ჩვენი ბატონის, უფალ ქრისტე იესოს ნაკვალევს მივყვებით. ჩვენ ბიბლიის მკვლევარები ვართ, მაგრამ, როგორც ქრისტიანული ჯგუფი, ვქმნით გაერთიანებას და უარს ვაცხადებთ, გვერქვას „ბიბლიის მკვლევარები“ ან სხვა მსგავსი სახელი, რადგან ეს კარგად ვერ გამოხატავს ჩვენს პოზიციას უფლის წინაშე. ჩვენ უარს ვამბობთ, ვატაროთ ან გვერქვას ნებისმიერი ადამიანის სახელი.

ჩვენ ნაყიდნი ვართ იესო ქრისტეს, ჩვენი უფლისა და გამომსყიდველის ძვირფასი სისხლით და, როგორც იეჰოვას მიერ ნაშვილებნი და გამართლებულნი, რომლებიც მოწოდებულნი ვართ მის სამეფოში, ურყევად ვუცხადებთ ერთგულებასა და თავდადებას იეჰოვა ღმერთსა და მის სამეფოს. ჩვენ, იეჰოვა ღმერთის მსახურებს, დავალებული გვაქვს, ღვთის სახელით შევასრულოთ მისი საქმე და დავემორჩილოთ მითითებას — ვიქადაგოთ იესო ქრისტეს შესახებ და ხალხს ვაუწყოთ, რომ იეჰოვა არის ჭეშმარიტი და ყოვლისშემძლე ღმერთი. ამიტომ სიხარულით ვიღებთ სახელს, რომელიც თავად ჩვენმა უფალმა ღმერთმა გვიწოდა და გვსურს, რომ გვიცნობდნენ სახელით „იეჰოვას მოწმეები“ (ეს. 43:10—12)».e

რეზოლუციის წაკითხვის შემდეგ მსმენელი თანხმობის ნიშნად დიდხანს უკრავდა მქუხარე ტაშს.

პასუხისმგებლობების მიღება

მართლაც დიდი პატივია ერთადერთი ჭეშმარიტი ღვთის, სამყაროს უზენაესის სახელის ტარება! მაგრამ ეს სახელი პასუხისმგებლობებთან არის დაკავშირებული, რომელთა აღებაც სხვა რელიგიურ ჯგუფებს არ სურთ. ძმა რუტერფორდმა თავის მოხსენებაში თქვა: „ბედნიერნი არიან ისინი, ვინც იღებენ სახელს, რომლის მიღებაც დედამიწის ზურგზე არავის სურს მათ გარდა, რომლებიც მთელი გულით ენდობიან იეჰოვას“. მართლაც მართებულია, რომ იეჰოვას მსახურები ატარებენ და სხვებს ამცნობენ ღვთის სახელს, რომელიც ღვთის განზრახვების გაცხადებას უკავშირდება!

ნებისმიერი ჯგუფი ან ცალკეული ადამიანი, ვინც იეჰოვას სახელით ლაპარაკობს, ვალდებულებას იღებს, რომ მისი სიტყვა სწორად გადასცეს (იერ. 23:26—28). მათ არა მხოლოდ ის უნდა გააცხადონ, რომ იეჰოვა აკურთხებს სიმართლის მოყვარულებს, არამედ ისიც, რომ ღმერთი გაასამართლებს უმართლოებს. ძველ დროში იეჰოვამ თავის წინასწარმეტყველებს უბრძანა, მისი სიტყვისთვის არაფერი მოეკლოთ და ყველაფერი ეუწყებინათ ხალხისთვის. დღეს მოწმეებიც ასე უნდა მოიქცნენ (იერ. 1:17; 26:2; ეზეკ. 3:1—11). მათ ხალხს უნდა ამცნონ როგორც „იეჰოვას კეთილგანწყობის წელიწადის“, ისე „ჩვენი ღვთის შურისძიების დღის“ შესახებ (ეს. 61:1, 2). მათ, ვინც ზემოთ მოხსენიებული რეზოლუცია მიიღო, ესმოდათ, რომ ამ პასუხისმგებლობის აღება მოუწევდათ. რეზოლუციის დასკვნით ნაწილში, რომელსაც ყველამ ერთხმად დაუჭირა მხარი, ეწერა:

„ჩვენი, როგორც იეჰოვას მოწმეების ერთადერთი მიზანია, რომ სრულად დავიცვათ ღვთის მცნებები; გავაცხადოთ, რომ იეჰოვაა ერთადერთი ჭეშმარიტი და ყოვლისშემძლე ღმერთი; რომ მისი სიტყვა არის ჭეშმარიტი და მისი სახელი პატივსა და დიდებას იმსახურებს; რომ ქრისტე არის ღვთის მიერ დანიშნული მეფე, რომელსაც ძალაუფლება აქვს მიცემული; რომ ღვთის სამეფო დამყარებულია და უფლის ბრძანებით სასიხარულო ცნობა უნდა ვუქადაგოთ, ანუ დავუმოწმოთ ერებს, გავაფრთხილოთ მმართველები და ხალხი სატანის სასტიკი და უსამართლო ორგანიზაციის შესახებ, განსაკუთრებით ქრისტიანული სამყაროს შესახებ, რომელიც სატანის ხილული ორგანიზაციის ყველაზე ბოროტი ნაწილია; ასევე უნდა ვაუწყოთ ღვთის განზრახვა, რომ მალე განადგურდება სატანის ორგანიზაცია და მეფე იესო ქრისტე დედამიწაზე მცხოვრებ მორჩილ ადამიანებს მალევე მოუტანს მშვიდობას, კეთილდღეობას, თავისუფლებას, ჯანმრთელობას, ბედნიერებასა და მარადიულ სიცოცხლეს; რომ ღვთის სამეფო არის ქვეყნიერების ერთადერთი იმედი და ეს ცნობა უნდა იქადაგონ იეჰოვას მოწმეებმა.

ჩვენ თავმდაბლად ვიწვევთ ყველას, ვინც მთელი გულით უჭერს მხარს იეჰოვას და მის სამეფოს, რომ ჩვენთან ერთად უქადაგონ სხვებს ეს სასიხარულო ცნობა, რათა უფლის სამართლიანი ნორმები ამაღლდეს და ხალხმა დაინახოს, სად უნდა ეძებონ ჭეშმარიტება და შვების მომგვრელი იმედი; და რაც ყველაზე მთავარია — განდიდდეს და განიწმინდოს იეჰოვა ღმერთის წმინდა და დიდებული სახელი“.

ახალი სახელის შესახებ ამ განცხადებას მხოლოდ კოლუმბუსში (ოჰაიოს შტატი) კი არ მოჰყვა მქუხარე ტაში, არამედ შორეულ ავსტრალიაშიც. იაპონიაში რამდენიმესაათიანი მცდელობის შემდეგ ძმებმა შუაღამისას მოახერხეს იმ რადიოტალღის დაჭერა, რომელზეც პროგრამა გადაიცემოდა, ამიტომ მათ მხოლოდ პროგრამის მოკლე ნაწილის მოსმენა შეძლეს. პროგრამა მაშინვე თარგმნეს. ამგვარად, იქ მხოლოდ პატარა ჯგუფმა მოისმინა რეზოლუცია და ის აპლოდისმენტები, რაც მას მოჰყვა. მათ შორის იყო მაცუ იში, რომელმაც მოგვიანებით დაწერა, რომ ისინიც „ამერიკელ ძმებთან ერთად ხარობდნენ“. კოლუმბუსში ჩატარებული კონგრესის შემდეგ მთელ მსოფლიოში იეჰოვას მოწმეების ყველა კონგრესსა და კრებაზე სიხარულით მიიღეს ეს რეზოლუცია. ამის მაგალითად შეგვიძლია მოვიყვანოთ ნორვეგიიდან მიღებული შეტყობინება: «როცა ყოველწლიურ კონგრესზე . . . ოსლოში, გავიგეთ, რომ მივიღეთ ახალი სახელი „იეჰოვას მოწმეები“, ყველანი ფეხზე ავდექით და დიდი სიხარულით შევძახეთ — „დიახ“».

სახელზე უფრო მეტი

გაიგებდა მსოფლიო, რომ ჩვენმა ძმებმა ახალი სახელი მიიღეს? რა თქმა უნდა! მოხსენება, რომელშიც პირველად გაკეთდა განცხადება ახალი სახელის შესახებ, იმ დროს ყველაზე ფართომასშტაბიანი რადიოქსელით გადაიცა. გარდა ამისა, ახალ სახელთან დაკავშირებით მიღებული რეზოლუცია დაიბეჭდა ბროშურაში „სამეფო — კაცობრიობის იმედი“. კონგრესის შემდეგ იეჰოვას მოწმეებმა მრავალ ენაზე დაბეჭდილი ამ ბროშურის მილიონობით ეგზემპლარი გაავრცელეს ჩრდილოეთ და სამხრეთ ამერიკაში, ევროპაში, აფრიკაში, აზიაში და სხვადასხვა კუნძულზე. და-ძმები მხოლოდ კარდაკარ კი არ ავრცელებდნენ ბროშურას, არამედ ყველანაირად ცდილობდნენ, რომ ის ხელისუფლების თითოეული წარმომადგენლის, ცნობილი ბიზნესმენისა და მღვდლის ხელში მოხვედრილიყო. ზოგიერთი მათგანი, ვინც ამ განსაკუთრებულ კამპანიაში მონაწილეობდა, 1992 წლისთვის ჯერ კიდევ ცოცხალი იყო და სიამოვნებით იხსენებდა იმ პერიოდს.

ეს ბროშურა ყველას სიხარულით არ მიუღია. ამერიკის შეერთებულ შტატებში მცხოვრებმა ევა აბოტმა გაიხსენა, რომ გამოვიდა თუ არა მღვდლის სახლიდან, ბროშურამ გვერდზე ჩაუქროლა და მიწაზე დავარდა. ევას არ უნდოდა ბროშურის იქ დატოვება. როცა ის ასაღებად დაიხარა, უცბად დიდი ძაღლი მივარდა, ბროშურა ხელიდან გამოსტაცა და თავის პატრონს, მღვდელს წაუღო. ევამ თქვა: „ის, რაც მე ვერ გავაკეთე, ძაღლმა გააკეთა!“.

მარტინ პოეტზინგერმა, რომელიც მოგვიანებით იეჰოვას მოწმეთა ხელმძღვანელ საბჭოში მსახურობდა, გაიხსენა: «გაკვირვებული სახეებით გვიყურებდნენ, როცა კართან მივდიოდით და ვეუბნებოდით: „დღეს თქვენთან მოვედი, როგორც იეჰოვას მოწმე“. ისინი თავს აქნევდნენ და გვეკითხებოდნენ: „მაგრამ თქვენ ხომ ისევ ბიბლიის მკვლევარები ხართ? თუ რომელიმე სექტას შეუერთდით?“». დროთა განმავლობაში სიტუაცია შეიცვალა. ამ განმასხვავებელი სახელის მიღებიდან რამდენიმე ათწლეულის შემდეგ ძმა პოეტზინგერმა დაწერა: «საოცარი ცვლილებაა! ხმის ამოღებას ვერ ვასწრებ, რომ ხალხი მეკითხება: „შენ იეჰოვას მოწმე ხარ, არა?!“». დღეს ეს სახელი ყველამ იცის.

მაგრამ ის უბრალოდ სახელი არ არის. იეჰოვას თითოეული მოწმე — ახალგაზრდა თუ მოხუცი, ქალი თუ კაცი — იეჰოვასა და მისი დიდებული განზრახვების შესახებ ამოწმებს. რელიგიის ისტორიის პროფესორმა ბრადენმა თავის ნაშრომში დაწერა: „იეჰოვას მოწმეებმა თავიანთი ქადაგებით, პირდაპირი გაგებით, მთელი დედამიწა შემოიარეს“ (These Also Believe).

ჩვენი ძმები მანამდეც ამოწმებდნენ მთელ მსოფლიოში, სანამ ახალ სახელს მიიღებდნენ. მაგრამ წარსულზე დაკვირვებით ნათელი ხდება, რომ იეჰოვა მათ ამზადებდა უფრო დიდი საქმისთვის — უამრავი ხალხის შესაკრებად, რომლებიც გადაიტანენ არმაგედონს და შესაძლებლობა მიეცემათ, მარადიულად იცხოვრონ სამოთხეში დედამიწაზე.

[სქოლიოები]

[ჩანართი 149 გვერდზე]

„მოწაფეებს ღვთის განგებით . . . ეწოდათ ქრისტიანები“

[ჩანართი 150 გვერდზე]

სიტყვა „ქრისტიანმა“ პირვანდელი მნიშვნელობა დაკარგა

[ჩანართი 151 გვერდზე]

ისინი მხოლოდ ბიბლიის მკვლევარები არ იყვნენ

[ჩანართი 157 გვერდზე]

„თქვენა ხართ ჩემი მოწმეები, — ამბობს იეჰოვა, — და მე ღმერთი ვარ“

[ჩარჩო 151 გვერდზე]

სახელი იეჰოვას მოწმეები ამერიკის კონტინენტებზე

არაბული ش‍هود ‍ي‍هوه‍

სომხური Եհովայի Վկաներ

ჩინური 耶和華見證人

ინგლისური Jehovah’s Witnesses

ფრანგული Témoins de Jéhovah

ბერძნული Μάρτυρες του Ιεχωβά

გრენლანდიური Jehovap Nalunaajaasui

იტალიური Testimoni di Geova

იაპონური エホバの証人

კორეული 여호와의 증인

პაპიამენტო Testigonan di Jehova

პოლონური Świadkowie Jehowy

პორტუგალიური Testemunhas de Jeová

სამოური Molimau a Ieova

ესპანური Testigos de Jehová

სრანანტონგო Jehovah Kotoigi

ტაგალური Mga Saksi ni Jehova

ვიეტნამური Nhân-chứng Giê-hô-va

[ჩარჩო 152 გვერდზე]

ეს სხვებსაც ესმოდათ

მხოლოდ „საგუშაგო კოშკი“ არ ამახვილებდა ყურადღებას იმაზე, რომ ბიბლიის თანახმად იეჰოვას დედამიწაზე მოწმეები ეყოლებოდა. მაგალითად, აირონსაიდმა თავის წიგნში „ლექციები წინასწარმეტყველ დანიელზე“ (პირველად გამოიცა 1911 წელს) მოიხსენია ისინი, ვისზეც ესაიას 43-ე თავში ჩაწერილი წინასწარმეტყველებები შესრულდებოდა, და თქვა: „მაშინ, როცა განდგომილი ქრისტიანული სამყარო დიდ შეცდომაში იქნება შეყვანილი და ანტიქრისტეს იწამებს, იეჰოვას ეყოლება მოწმეები, რომლებიც ჭეშმარიტი ღვთის ძალასა და დიდებაზე დაამოწმებენ“.

[ჩარჩო 153 გვერდზე]

სახელი იეჰოვას მოწმეები აღმოსავლეთის ქვეყნებში და წყნარი ოკეანის კუნძულებზე

ბენგალური যিহোবার সাক্ষিরা

ბისლამა Ol Wetnes blong Jeova

ჩინური 耶和華見證人

ინგლისური Jehovah’s Witnesses

ფიჯი Vakadinadina i Jiova

გუჯარათული યહોવાહના સાક્ષીઓ

ჰინდი यहोवा के साक्षी

ჰირი-მოტუ Iehova ena Witness Taudia

ილოკური Dagiti Saksi ni Jehova

ინდონეზიური Saksi-Saksi Yehuwa

იაპონური エホバの証人

კანადა ಯೆಹೋವನ ಸಾಕ್ಷಿಗಳು

კორეული 여호와의 증인

მალაიალამური യഹോവയുടെ സാക്ഷികൾ

მარათული यहोवाचे साक्षीदार

მარშალური Dri Kennan ro an Jeova

მიანმური ယေဟောဝါသက်သေများ

ნეპალური यहोवाका साक्षीहरू

ახალი გვინეის პიჯინი Ol Witnes Bilong Jehova

ნიუე Tau Fakamoli a Iehova

პალაუ reSioning er a Jehovah

პანგასიანური Saray Tasi nen Jehova

პონაპე Sounkadehde kan en Siohwa

რაროტონგა Au Kite o Iehova

რუსული Свидетели Иеговы

სამოური, ტუვალუ Molimau a Ieova

სინჰალური යෙහෝවාගේ සාක්ෂිකරුවෝ

სოლომონის კუნძულების პიჯინი all’gether Jehovah’s Witness

ტაიტური Ite no Iehova

ტამილური யெகோவாவின் சாட்சிகள்

ტელუგუ యెహోవాసాక్షులు

ტაი พยานพระยะโฮวา

ტონგური Fakamo‘oni ‘a Sihova

ტრუკი Ekkewe Chon Pwarata Jiowa

ურდუ

ვიეტნამური Nhân-chứng Giê-hô-va

იაპისი Pi Mich Rok Jehovah

[ჩარჩო 154 გვერდზე]

სახელი იეჰოვას მოწმეები აფრიკაში

აფრიკაანსი Jehovah se Getuies

ამჰარული የይሖዋ ምሥክሮች

არაბული ش‍هود ‍ي‍هوه‍

ჩიჩევა Mboni za Yehova

სიბემბა Inte sha kwa Yehova

ეფიკი Mme Ntiense Jehovah

ინგლისური Jehovah’s Witnesses

ევე Yehowa Ðasefowo

ფრანგული Témoins de Jéhovah

გა Yehowa Odasefoi

განი Kunnudetọ Jehovah tọn lẹ

ჰაუსა Shaidun Jehovah

იბო Ndịàmà Jehova

კილუბა Ba Tumoni twa Yehova

კინიარუანდა Abahamya ba Yehova

კირუნდი Ivyabona vya Yehova

კისი Seiyaa Jɛhowaa

კვანიამა Eendombwedi daJehova

ლინგალა Batemwe ya Jéhovah

ლუგანდა Abajulirwa ba Yakuwa

მალაგასიური Vavolombelon’i Jehovah

მორე A Zeova Kaset rãmba

ნდონგა Oonzapo dhaJehova

პორტუგალიური Testemunhas de Jeová

სანგო A-Témoin ti Jéhovah

სეპედი Dihlatse tša Jehofa

სამხრეთ სოტო Lipaki tsa Jehova

შონა Zvapupu zvaJehovha

სილოზი Lipaki za Jehova

სუაჰილი Mashahidi wa Yehova

ტიგრაი ናይ የሆዋ መሰኻኽር

ჩილუბა Bantemu ba Yehowa

ტსონგა Timbhoni ta Yehova

ტსვანა Basupi ba ga Jehofa

ტვი Yehowa Adansefo

ვენდა Ṱhanzi dza Yehova

კოსა amaNgqina kaYehova

იორუბა Ẹlẹ́rìí Jehofa

ზულუ oFakazi BakaJehova

[ჩარჩო 154 გვერდზე]

სახელი იეჰოვას მოწმეები ევროპასა და ახლო აღმოსავლეთში

ალბანური Dëshmitarët e Jehovait

არაბული ش‍هود ‍ي‍هوه‍

სომხური Եհովայի Վկաներ

ბულგარული Свидетелите на Йехова

ხორვატული Jehovini svjedoci

ჩეხური svĕdkové Jehovovi

დანიური Jehovas Vidner

ჰოლანდიური Jehovah’s Getuigen

ინგლისური Jehovah’s Witnesses

ესტონური Jehoova tunnistajad

ფინური Jehovan todistajat

ფრანგული Témoins de Jéhovah

გერმანული Jehovas Zeugen

ბერძნული Μάρτυρες του Ιεχωβά

ებრაული עדי־יהוה

უნგრული Jehova Tanúi

ისლანდიური Vottar Jehóva

იტალიური Testimoni di Geova

მაკედონიური, სერბული Јеховини сведоци

მალტური Xhieda ta’ Jehovah

ნორვეგიული Jehovas vitner

პოლონური Świadkowie Jehowy

პორტუგალიური Testemunhas de Jeová

რუმინული Martorii lui Iehova

რუსული Свидетели Иеговы

სლოვაკური Jehovovi svedkovia

სლოვენური Jehovove priče

ესპანური Testigos de Jehová

შვედური Jehovas vittnen

თურქული Yehova’nın Şahitleri

უკრაინული Свідки Єгови

[სურათები 155 გვერდზე]

1931 წელს ჩატარებულ კონგრესზე თვალში მოსახვედრი იყო ასოები JW (ყოველგვარი განმარტების გარეშე). მათი მნიშვნელობა აიხსნა ახალ სახელთან დაკავშირებით წარმოთქმულ ამაღელვებელ მოხსენებაში

[სურათები 156 გვერდზე]

ისინი ამაყობდნენ, რომ სხვებს თავს იეჰოვას მოწმეებად აცნობდნენ