„ჭეშმარიტება გაგათავისუფლებთ“

„შეიცნობთ ჭეშმარიტებას და ჭეშმარიტება გაგათავისუფლებთ თქვენ“. ასე მიმართა იესომ ტაძარში სწავლებისას იქ თავმოყრილ უამრავ ხალხს (იოანე 8:32). იესოს მოწაფეებისთვის ადვილი იყო მისი მოძღვრების ჭეშმარიტების დანახვა. ისინი თავიანთი მოძღვრის ღვთიური წარმომავლობის დამადასტურებელი მრავალი მტკიცების თვითმხილველები იყვნენ.

მაგრამ დღეს შეიძლება მრავალს უჭირს იმ ჭეშმარიტების დანახვა, რომელზეც იესო ლაპარაკობდა. როგორც წინასწარმეტყველ ესაიას დღეებში, დღესაც არიან ისეთები, „ვინც ბოროტებას სიკეთეს არქმევს და სიკეთეს — ბოროტებას; ვინც ბნელს ნათლად სახავს და ნათელს — ბნელად, სიმწარეს სიტკბოდ სახავს და სიტკბოს — სიმწარედ“ (ესაია 5:20). დღეს გაბატონებული მრავალი შეხედულების, ფილოსოფიისა და ცხოვრების წესის გამო, მრავალ ადამიანს ჰგონია, რომ ყველაფერი შეფარდებითია და ჭეშმარიტება არ არსებობს.

როდესაც იესომ მსმენელებს უთხრა, რომ ჭეშმარიტება გაათავისუფლებდა, მათ მიუგეს: „ჩვენ აბრაამის შთამომავალნი ვართ და არასოდეს არავისი მონები არ ვყოფილვართ. როგორღა ამბობ, თავისუფლები გახდებითო?“ (იოანე 8:33). ისინი ფიქრობდნენ, რომ არავის და არაფერს საჭიროებდნენ გასათავისუფლებლად. მაგრამ იესომ განუმარტა: „ჭეშმარიტად, ჭეშმარიტად გეუბნებით თქვენ: ყველა ცოდვის ჩამდენი ცოდვის მონაა“ (იოანე 8:34). ჭეშმარიტებას, რომლის შესახებაც იესო ლაპარაკობდა, ცოდვისგან გამათავისუფლებელი გზის გახსნა შეეძლო. იესომ თქვა: „თუ ძე გაგათავისუფლებთ, ნამდვილად თავისუფლები იქნებით“ (იოანე 8:36). აქედან გამომდინარე, ჭეშმარიტება, რომელიც ხალხს ათავისუფლებს, არის ჭეშმარიტება იესო ქრისტეს, ღვთის ძის, შესახებ. მხოლოდ იესოს მიერ გაღებული სრულყოფილი ხორციელი სიცოცხლის მსხვერპლისადმი რწმენის გამოვლენითაა შესაძლებელი ცოდვისა და სიკვდილის მონობისგან გათავისუფლება.

სხვა შემთხვევისას იესომ თქვა: „განწმიდე ისინი ჭეშმარიტებით. შენი სიტყვა ჭეშმარიტებაა“ (იოანე 17:17). ბიბლიის თანახმად, ღვთის სიტყვა არის ჭეშმარიტება, რომელსაც ცრუმორწმუნეობისა და ცრუთაყვანისმცემლობისგან გათავისუფლება შეუძლია. ბიბლიაში მოცემულია ჭეშმარიტება იესო ქრისტეს შესახებ, რომელიც ხალხს მისადმი რწმენას უნერგავს, და რომელიც ბრწყინვალე მომავლის გზას უხსნის მათ. მართლაც, საუცხოოა ჩასწვდე ღვთის სიტყვის ჭეშმარიტებას!

რამდენად მნიშვნელოვანია ჭეშმარიტების ცოდნა? დღეს მრავალი რელიგია აცხადებს, რომ ბიბლიით ხელმძღვანელობს, მაგრამ მათზე დიდ გავლენას ახდენს ადამიანთა ფილოსოფიები და ტრადიციები. ხშირად რელიგიური წინამძღოლები, როგორც ჩანს, თავიანთი ცნობის სიზუსტეზე იმდენად არ ზრუნავენ, როგორც იმაზე, თუ მასები როგორ მიიღებენ ამ ცნობას. ზოგი ფიქრობს, რომ ღვთისთვის თაყვანისცემის ნებისმიერი ფორმა მისაღებია, თუ ის გულიდან გამომდინარეობს. მაგრამ იესომ განმარტა: „დგება ჟამი და უკვე აქ არის, როდესაც ჭეშმარიტი თაყვანისმცემელნი თაყვანს სცემენ მამას სულითა და ჭეშმარიტებით, რადგან მამაც სწორედ ასეთ თაყვანისმცემლებს ეძებს თავისთვის“ (იოანე 4:23).

თუ გვსურს ღმერთს მისთვის მისაღები სახით ვცეთ თაყვანი, ჭეშმარიტება უნდა ვიცოდეთ. ეს ძალიან მნიშვნელოვანი საკითხია. ამაზეა დამოკიდებული ჩვენი მარადიული ბედნიერება. ამიტომ თითოეულმა საკუთარ თავს უნდა დავუსვათ კითხვები: „მოსწონს ღმერთს ჩემი თაყვანისმცემლობის ფორმა? ნამდვილად ვარ დაინტერესებული ღვთის სიტყვის ჭეშმარიტების შესწავლით? ან იმის ხომ არ მეშინია, რაც შეიძლება გულმოდგინე კვლევა-ძიების შედეგად დავინახო?“