ბარიესო

[ძე იესოსი]

იუდეველი კაცი, რომელიც პირველ საუკუნეში ქალაქ პაფოსში (კუნძული კვიპროსი) ცხოვრობდა. იგი „ჯადოქარი და ცრუწინასწარმეტყველი“ იყო (სქ. 13:6). მან დაირქვა სახელი ელიმა, რაც ჯადოქარს ნიშნავდა. ეს სახელი მის საქმიანობაზე მიუთითებდა (იხ. ელიმა).

ბარიესო, როგორც ჩანს, სასახლის კარზე მეტად გავლენიანი ჯადოქარი და ქალაქ პაფოსის რომაელი პროკონსულის, სერგიუს პავლუსის მრჩეველი იყო. ბარიესო მისნობის კულტის მსახური, ქურუმი იყო, ამიტომ ბუნებრივია, ქრისტიანობის წინააღმდეგ ილაშქრებდა და ცდილობდა, გავლენა არ დაეკარგა. იგი გააფთრებით ებრძოდა პავლესა და ბარნაბას. სერგიუს პავლუსს „ძალიან უნდოდა ღვთის სიტყვის მოსმენა“, მაგრამ ელიმა „შეეწინააღმდეგა მათ [ბარნაბასა და პავლეს] და ცდილობდა პროკონსულისთვის რწმენა დაეკარგვინებინა“ (სქ. 13:7, 8).

წმინდა სულით აღვსილმა პავლემ შეხედა მას და უთხრა: „ოჰ, ყოველგვარი მზაკვრობითა და ბოროტებით სავსევ, ეშმაკის შვილო, ყოველივე მართლის მტერო, არ მოეშვები იეჰოვას სწორი გზების გამრუდებას? იეჰოვას ხელია შენზე: დაბრმავდები და დროებით ვეღარ დაინახავ მზის შუქს“. ბარიესო მაშინვე დაბრმავდა. პროკონსული, რომელიც წმინდა წერილებში ჩაწერილი პავლეს პირველი სასწაულის მოწმე გახდა, „განცვიფრებული იყო იეჰოვას სწავლებით“. მან მაშინვე ირწმუნა (სქ. 13:9—12).