სიყვარულის გამოვლენა გაჭირვებულების მიმართ

ქრისტიანებს აქვთ როგორც მოვალეობა, ასევე პრივილეგია, სიყვარული გამოავლინონ გაჭირვებაში მყოფი და-ძმების მიმართ (1 იოანე 3:17, 18). მოციქული პავლე წერდა: „სიკეთე მოვიმოქმედოთ ყველასთვის და უფრო მეტად მათთვის, ვინც რწმენით ჩვენიანია“ (გალატელთა 6:10, „ახალი აღთქმა და ფსალმუნი“, 1990 წლის გამოცემა). ძმამ, რომელიც თითქმის ორმოცი წელია იეჰოვას ემსახურება, ამას წინათ იგემა ქრისტიანული საძმოს სიყვარული მეუღლის ავადმყოფობის განმავლობაში და შემდეგ, მისი დაღუპვისას. ის წერს:

«რადგანაც ავადმყოფ მეუღლეს სახლში ვუვლიდი, თითქმის ორი თვე ვერ ვმუშაობდი. როგორი შვება ვიგრძენი, როცა კრებიდან მეგობრები სიხარულით მოვიდნენ ჩვენს დასახმარებლად! დიდძალი ფულადი საჩუქრებით — რომლებიც, როგორც ღია ბარათებში ეწერა, „დამატებითი ხარჯების დასაფარავად“ იყო, — ანაზღაურებულ იქნა გირაო, კომუნალური მომსახურება და სხვა ხარჯები.

მეუღლის სიკვდილამდე ორი კვირით ადრე სარაიონო ზედამხედველმა მოგვინახულა და გაგვამხნევა. მან სლაიდებიც კი გვაჩვენა, რომლებიც კვირის ბოლოს კრებას უნდა ენახა. საშუალება მოგვეცა, ტელეფონით მოგვესმინა შეხვედრები — მათ შორის შეხვედრები სამქადაგებლო მსახურებისთვის, რომლებსაც სარაიონო ზედამხედველი უძღვებოდა. ერთ მათგანზე მან სამქადაგებლო მსახურების შეხვედრის ყველა დამსწრეს ჯგუფურად ათქმევინა „სალამი“ ჩემი მეუღლისთვის. ამგვარად, თუმცა ფიზიკურად მოწყვეტილი იყო, მას არასოდეს უგრძვნია მარტოობა.

მისი სიკვდილიდან ერთ საათში თითქმის ყველა უხუცესი ჩემს სახლში იყო. მარტო იმ დღეს ასზე მეტმა ძმამ და დამ შემოიარა. მაგიდაზე „სასწაულებრივად“ ჩნდებოდა საკვები ყველასთვის. შეუძლებელია, მოვყვე ყველა საჩუქარზე, თანაგრძნობაზე, სანუგეშო სიტყვებსა და ჩემთვის წარმოთქმულ ლოცვებზე. როგორი განმამტკიცებელი იყო ისინი! ბოლოს მომიწია, მეთხოვა ძმებისთვის, რომ შეეწყვიტათ საკვებით მომარაგება და სახლის დალაგებაში დახმარება!

სხვაგან სად შეგვიძლია ვიპოვოთ გულშემატკივრობის, მზრუნველობისა და სიყვარულის ასეთი უანგარო გამოხატვა, თუ არა იეჰოვას ორგანიზაციაში? დღეს უმეტესობას თითებზე ჩამოსათვლელი ნამდვილი მეგობრები ჰყავს. ჩვენ იეჰოვამ სულიერი და-ძმებისგან შემდგარი დიდი ოჯახით გვაკურთხა!» (მარკოზი 10:29, 30).