„სიყვარული სულგრძელია“

 9. როგორც ჩანს, რატომ უთხრა პავლემ კორინთელებს, რომ „სიყვარული სულგრძელია“?

⁹ პავლემ დაგვანახვა, რომ სიყვარულსა და სულგრძელობას შორის განსაკუთრებული კავშირი არსებობს. მან თქვა: „სიყვარული სულგრძელია“ (1 კორინთელთა 13:4). როგორც ბიბლეისტი ალბერტ ბარნზი ვარაუდობს, როდესაც პავლემ ამაზე გაამახვილა ყურადღება, მას კორინთის ქრისტიანულ კრებაში არსებული შუღლი და განხეთქილება ჰქონდა მხედველობაში (1 კორინთელთა 1:11, 12). ბარნზი ამბობს: „აქ ეს სიტყვა [სულგრძელობა] წინდაუხედავ მოქმედებასთან — ცხელ გულზე რაიმეს წამოსროლასთან და დასკვნების გაკეთებასთან, ადვილად გაღიზიანებასთან — არის დაპირისპირებული. იგი ისეთ განწყობაზე მიუთითებს, როდესაც ადამიანს შევიწროებისა და გაჯავრების მიუხედავად მდგომარეობის დიდხანს ატანა შეუძლია“. სიყვარული და სულგრძელობა კვლავაც მშვიდობის ბურჯია ქრისტიანულ კრებაში.

10. ა) როგორ გვეხმარება სიყვარული სულგრძელობის გამოვლენაში, და რა რჩევას გვაძლევს პავლე მოციქული ამასთან დაკავშირებით? ბ) რას ამბობს ერთი ბიბლეისტი ღვთის სულგრძელობასა და სიკეთეზე? (იხილეთ სქოლიო).

¹⁰ «სიყვარული სულგრძელია, სიყვარული ქველმოქმედია [„კეთილია“, აქ],.. თავისას არ ეძიებს, არ რისხდება». აქედან გამომდინარე, სიყვარული მრავალმხრივ გვეხმარება სულგრძელობის გამოვლენაშიa (1 კორინთელთა 13:4, 5). სიყვარული აღგვძრავს, მოთმინებით მოვეკიდოთ ერთმანეთს და გვახსოვდეს, რომ ყველანი არასრულყოფილები ვართ და ნაკლოვანებები და სისუსტეები გვაქვს. იგი გვეხმარება, ყურადღებიანები და მიმტევებლები ვიყოთ. პავლე მოციქული მოგვიწოდებს: „მთელი თავმდაბლობით, სიმშვიდითა და სულგრძელობით შეიწყნარეთ ერთმანეთი სიყვარულით. ეცადეთ შეინარჩუნოთ სულის ერთობა მშვიდობის საკვრელით“ (ეფესელთა 4:1—3).