Magam gun ai aten ngut na mahka re ai, ginding aga prat hpang jahtum shana hta, myit sawn sumru na, akyu hpyi na matu Getsemane sun na simsa ai shara de Yesu sa ai. Dai aten hta sha, sape ni hpe akyu hpyi ai hte seng ai ahkyak ai lam sharin ya ai. Yesu hte kasa ni Getsemane sun de du ai shaloi, nsin grai sin sai. Yesu gaw “maja nga” mu ngu tsun nna, akyu hpyi na matu sa mat ai. (Mat 26:37-39) Dai shaloi, sape ni yup pyaw mat ai. Shanhte yup pyaw nga ai hpe mu ai majaw, “maja nga ai hte akyu hpyi nga mu” ngu Yesu kalang bai n-gun jaw ai. (Mat 26:40, 41) Sape ni myit pu ba nga ai, “hkum shan mahtang n-gun kya nga ai” hpe Yesu chye na ya ai. Akyu hpyi na matu, lahkawng lang bai sa ai. Bai wa shagu sape ni yup pyaw nga ai.​—Mat 26:42-45. w22.01 28 ¶10-11

Yesu gaw sape ni hte kaja ai hku hkau lam nga ai hpe sagu rem hte sagu ni a lapran na hku hkau lam hte shingdaw wa ai. (Yhn 10:14, 15) Dai hku shingdaw ai gaw htap htuk ai. Sagu ni gaw sagu rem wa a nsen hpe chye nna madat ai. Dai hpe bu hkawm ai marai langai tatut hkrum wa ai. “Sagu nkau hpe sumla dem mayu ai majaw, makau de sa wa hkra galaw tim, anhte a nsen hpe n chye ai majaw, n sa ma ai. Sagu rem du wa nna, shaga dat ai shaloi hta gaw shi hpang de yawng hkan nang ma ai” ngu shi tsun ai. Dai bu hkawm ai wa a mahkrum madup gaw, sape ni hpe sagu hte shingdaw ai Yesu a ga hpe bai dum shangun ai. “Dai ni mung nye a nsen madat na ma ra ai” ngu Yesu tsun ai. Raitim, Yesu gaw sumsing lamu hta nga ai majaw, shi a nsen hpe anhte gara hku madat mai na kun? Madat mai ai madung lam gaw, Yesu a sharin achyin ai lam ni hpe prat hta, tatut hkan sa ai hku nna re.​—Mat 7:24, 25. w21.12 16 ¶1-2

Kasa Pawlu gaw baw ja ai wa, Hkristan ni hpe zingri ai wa re. Hpang hta, shi a mara ni hpe chye wa nna, myit jasat hte akyang lailen ni hpe sharawng awng let galai shai ai. (1Tm 1:12-16) Yehowa karum ya ai majaw, Pawlu gaw tsawra matsan dum myit nga ai, shagrit shanem ai sagu rem byin wa ai. Shi hta gawng kya ai lam law law nga tim, Yehowa mara raw ya na hpe kam ai. (Rom 7:21-25) Hkum tsup na hpe n myit mada ai. De a malai, Hkristan atsam ningja ni madun ai hta, rawt jat na matu shagrit shanem let shakut ai. Hkaw tsun magam awng dang na matu, Yehowa a karum shingtau lam hpe Pawlu kamhpa ai. (1Ko 9:27; Hpl 4:13) Hkum tsup ai majaw, myitsu salang hku nna lit ap hkrum ai n re. Raitim, tinang a mara ni hpe yin la na matu, Hkristan atsam ningja ni hpe shalat na matu, Yehowa myit mada ai. (Ehp 4:23, 24) Myitsu salang langai gaw, Chyum Laika hpe akyu jashawn nna tinang hkum tinang san jep ging ai. Ra ang ai hku galai shai ging ai. Rai yang, ngwi pyaw na matu, awng dang na matu, Yehowa karum ya na re.​—Yak 1:25. w22.03 29-30 ¶13-15