Viernes 4 re septiembre
Li Qaawaʼ xikʼ narilebʼ li inkʼaʼ usebʼ xnaʼlebʼ, abʼan naxrahebʼ li tiikebʼ xchʼool (Prov. 3:32).
Jwal wank xwankil naq tqaye li yaal chi anchal qachʼool, aʼin tooruuq rilbʼal rikʼin li kikʼulmank naq laj Felipe kixbʼoq laj Natanael re naq tixnaw ru li Jesús. Usta inkʼaʼ naxnaw ru laj Natanael, li Jesús kixye: «Kʼehomaq reetal, chʼolchʼo naq li winq aʼin aj Israel ut inkʼaʼ nabʼalaqʼik» (Juan 1:47). Li Jesús kixkʼe reetal naq laj Natanael qʼaxal wiʼ chik naxyuʼami li naʼlebʼ aʼin. Joʼ laaʼo, laj Natanael moko tzʼaqal ta re ru li xyuʼam, abʼan moko aj kaʼpakʼal u ta ut nanaʼlebʼak chi chaabʼil saʼ chixjunil. Joʼkan naq li Jesús kixye naq chaabʼil xnaʼlebʼ xbʼaan naq junelik naxye li yaal. Li xkʼihalil li naʼlebʼ li nawulak chiru li Jehobʼa li natawmank saʼ li Salmo 15 naʼaatinak chirix chanru rilbʼalebʼ li junchʼol. Saʼ li Salmo 15:3 naxye naq li kristiʼaan li naxkʼulubʼa li Jehobʼa saʼ li xmuhebʼaal aʼan li «inkʼaʼ nayoobʼank aatin chirix anihaq; li inkʼaʼ naxbʼaanu maaʼusilal re li ras riitzʼin chi moko naʼaatinak chirix xjolom li rechkabʼal». Wi moko us ta naqoksi li ruʼuj qaqʼ, tooruuq xrahobʼtesinkil xchʼoolebʼ (Sant. 1:26). w24.06 10 raqal 7, 9; 11 raqal 10
Sábado 5 re septiembre
Qaawaʼ, ebʼ li maaʼus aj musiqʼej nekeʼabʼink ajwiʼ chiqu naq naqoksi laakʼabʼaʼ (Luc. 10:17).
Wi taakawresi aawibʼ chiʼus choʼq re li puktesink chʼolchʼo naq sa taawekʼa aawibʼ naq tat-aatinaq rikʼinebʼ li poyanam. Li Jesús kixkawresi ebʼ li xtzolom naq toj maajiʼ kixtaqlahebʼ chi puktesink (Luc. 10:1-11). Saʼ xkʼabʼaʼ naq xeʼxyuʼami li kixkʼut li Jesús chiruhebʼ, sa xeʼrekʼa ribʼ xbʼaan li xeʼxbʼaanu. Chanru tooruuq xkawresinkil qibʼ choʼq re li puktesink? Qakʼoxlaq chanru tooruuq xyeebʼal li esil chirix li yaal rikʼin li aatin li kʼaynaqo roksinkil. Joʼkan ajwiʼ, rubʼelaj qakʼoxlaq wiibʼ oxibʼ li naʼlebʼ li nekeʼxye li poyanam saʼ li teep ut li tooruuq xyeebʼal saʼ li junjunq chi naʼlebʼ. Chi joʼkan, naq tooʼaatinaq rikʼinebʼ sa tqekʼa qibʼ, tooseʼeq ut tooʼaatinaq saʼ tuulanil. w24.04 15, 16 raqal 6, 7
Domingo 6 re septiembre
At Jehobʼa li Qayos, aakʼulubʼ xkʼulbʼal li loqʼal, li nimaak ut li wankilal xbʼaan naq laaʼat xatyobʼtesink re chixjunil (Apoc. 4:11).
Li xnimal ru xyaalal kʼaʼut nokoopuktesink aʼan xbʼaan naq naqara li Jehobʼa ut li xkʼabʼaʼ. Ut naq naqabʼaanu naqakʼe xloqʼal li Yos. Chʼolchʼo chiqu naq li Jehobʼa xkʼulubʼ chi «xkʼulbʼal li loqʼal, li nimaak ut li wankilal». Naqabʼaanu naq tkʼemanq xloqʼal ut tnimaaq ru, naq naqachʼolobʼ chiruhebʼ li kristiʼaan naq li Jehobʼa kiyobʼtesink re chixjunil ut kixkʼe qayuʼam. Naqakʼe xwankil naq naqoksi li qahoonal, li qametzʼew ut li kʼaru wank qe re puktesink joʼ naxkʼe ribʼ chiqu (Mat. 6:33; Luc. 13:24; Col. 3:23). Jwal nawulak chiqu aatinak chirix li Yos li naqara, chirix li xkʼabʼaʼ ut li naraj xyeebʼal. w24.05 17 raqal 11