Joʼ li Jehobʼa, naqarahebʼ li kristiʼaan, joʼkan naq naqatenqʼahebʼ rikʼin li naʼajmank chiruhebʼ. Jun eetalil, ma nakaanaw ru junaq li hermaan li naraj xtzekemq malaj xtʼikr? Li Jehobʼa naru nakatroksi re xtenqʼankil rikʼin li naʼajmank chiru. Joʼ aj kʼanjel chiru li Jehobʼa, nawbʼil qu naq nokookʼehok chi anchal qachʼool naq nakʼulmank junaq li rahilal. Qakʼoxlaq li kikʼulmank chiru li COVID-19. Wankebʼ li hermaan xeʼxwotz li xtzekemq, li xtʼikr ut jalan chik li kʼaʼaq re ru rikʼinebʼ li xeʼxnumsi rahilal. Joʼkan ajwiʼ, naabʼalebʼ li hermaan xeʼxkʼe li tenqʼ tumin chi anchalebʼ xchʼool re xtenqʼankilebʼ li xeʼxkʼul junaq rahilal saʼ ruuchichʼochʼ. Chixjunilebʼ xeʼxyuʼami li naxye Hebreos 13:16: «Misach saʼ leechʼool xbʼaanunkil li us ut xwotzbʼal li kʼaru eere rikʼinebʼ li junchʼol xbʼaan naq ebʼ li mayej aʼin qʼaxal nawulak chiru li Yos». w24.09 27 raqal 6, 7

Kʼoxla aʼin: yookat xsikʼbʼal jun li kʼanjel re xwenteninkil laajunkabʼal ut nakaataw wiibʼ li kʼanjel bʼarwiʼ inkʼaʼ taaqʼet li xchaqʼrabʼ li Jehobʼa. Nakaatzʼil rix chiʼus chixjunil joʼ li hoonal, li xnajtil ut jalan chik ebʼ li naʼlebʼ. Maare twulaq chaawu jun rehebʼ li kʼanjel xbʼaan naq us tateʼxtoj abʼan wank jalan chik li naʼlebʼ li tento taakʼe saʼ ajl naq toj maajiʼ nakaasikʼ kʼaru xbʼaanunkil. Jun eetalil, ma jun rehebʼ li kʼanjel tixram chaawu wulak saʼ li chʼutam? Ma maakʼaʼaq chik aahoonal re xtenqʼankil laajunkabʼal rikʼin li naʼajmank chiru ut re xkawresinkil li xpaabʼal? Xbʼaanunkil ebʼ li patzʼom aʼin tatxtenqʼa re xkʼebʼal chiʼubʼej li wank xwankil: xloqʼoninkil ru li Jehobʼa ut li naʼajmank chiru laajunkabʼal ut inkʼaʼ li rusilal li naxkʼam chaq li bʼihomal. Wi taabʼaanu aʼin, li Jehobʼa trosobʼtesi li taasikʼ xbʼaanunkil. w25.01 17 raqal 11-13

Usta jalanebʼ chik li kristiʼaan xateʼxrahobʼtesi, chʼolchʼooq chaawu naq li Jehobʼa nakatxra ut oxloqʼat chiru. Wi laaʼat jun rehebʼ li «maakʼaʼ chik roybʼenihomebʼ», jultika naq li Jehobʼa kixkʼe reetal laachaabʼil naʼlebʼ ut kiraj naq tatwanq joʼ aj kʼanjel chiru (Juan 6:44). Junelik wanq aran re aatenqʼankil xbʼaan naq nakatxra. Xtzʼilbʼal rix chanru kinaʼlebʼak li Jesús tooxtenqʼa re xtawbʼal ru chanru narekʼa ribʼ li Jehobʼa. Naq li Jesús kiwank saʼ Ruuchichʼochʼ, chaabʼil kinaʼlebʼak rikʼinebʼ li kristiʼaan li kubʼenaqebʼ xwankil malaj li nekeʼrekʼa naq maakʼaʼ nekeʼok wiʼ saʼ xkʼabʼaʼ chanru nekeʼileʼk xbʼaan ebʼ li junchʼol (Mat. 9:​9-12). Naq jun li ixq li yook xnumsinkil jun li nimla yajel kixcheʼ li xtʼikr li Jesús xbʼaan naq naxkʼoxla naq tkʼiraaq, kikʼojobʼaak xchʼool ut kixye re naq chaabʼil kinaʼlebʼak saʼ xkʼabʼaʼ li xpaabʼal (Mar. 5:​25-34). Li Jesús naxkʼam re chi tzʼaqal re ru rikʼin li Xyuwaʼ (Juan 14:9). Joʼkan naq chʼolchʼooq chaawu naq li Jehobʼa nakatroxloqʼi ut naxkʼe saʼ ajl laachaabʼil naʼlebʼ joʼ laapaabʼal ut laarahom chirix. w24.10 7 raqal 4, 5