25 Diaka, Davidi ti bamfumu ya bimvuka ya kisalu kabulaka ndambu ya bana ya Asafi, ya Emani, mpi ya Yedutuni+ sambu bo bikula ti bakidare, ti bima ya kubudila miziki ya kele ti bansinga,+ mpi ti basembale.+ Yai lisiti ya bantu yina vandaka ti kiyeka sambu na kisalu yai, 2 na bana ya Asafi: Zakure, Yozefi, Netania, mpi Asharela, bana ya Asafi yina vandaka na nsi ya lutwadisu ya Asafi, yina vandaka kubikula na nsi ya lutwadisu ya ntotila.