Mutindu beto me tubila yo na luyantiku, ntotila Davidi salaka disumu ya nene. Kansi ntangu profete Natani songaka yandi mutindu Yehowa waka sambu na disumu yina, Davidi balulaka ntima na kudikulumusa yonso. (Nk. 51:3, 4, 17, bangogo yina kele na zulu ya kapu) Ntotila Ezekiasi salaka mpi disumu na meso ya Yehowa. (2 Bans. 32:25) Kansi bonso Davidi, Ezekiasi balulaka ntima na kudikulumusa yonso. (2 Bans. 32:26) Yo yina, Yehowa tubaka nde yandi vandaka ntotila ya mbote sambu yandi “landaka kusala mambu ya mbote. (2 Bant. 18:3) Yo ke longa beto nki? Beto fwete balula ntima na masumu na beto mpi beto fwete sala yonso sambu na kuvutukila yo diaka ve. Ebuna, nki beto fwete sala kana bankuluntu me pesa beto bandongisila ata na mambu ya fioti-fioti? Beto fwete yindula ve nde Yehowa ke zola beto ve to nde bankuluntu mpi ke zola beto ve. Ata bantotila ya mbote mpi, Yehowa pesaka bo bandongisila mpi yandi sungikaka bo. (Baeb. 12:6) Kana bo me sungika beto, beto fwete (1) ndima ndongisila mpi kudikulumusa, (2) kusala bansoba ya me fwana mpi (3) kulanda kusadila Yehowa na ntima ya mvimba. Kana beto balula ntima na masumu na beto, Yehowa ta lolula beto.​—2 Bak. 7:9, 11. w24.07 21 § 8; 22 § 9, 11

Muntu yina me sala disumu me zola nde bo katula yandi na dibundu; bo me bakila yandi kaka lukanu yina yandi me zola. Sambu yandi me buya kuwila bankuluntu ata bo me sala bikesa mingi na kusadisa yandi na kubalula ntima. (2 Bant. 17:12-15) Yandi me monisa nde yandi ke zola ve kuzitisa bansiku ya Yehowa. (Kul. 30:19, 20) Bankuluntu ke pesaka luzayisu na dibundu nde muntu yango kele diaka ve Mbangi ya Yehowa. Bo ke pesaka ve luzayisu yina sambu na kupesa muntu yina me sala disumu nsoni. Kansi, sambu bampangi kuzitisa nsiku yai ya Biblia: ‘Beno yambula kuvukana’ ti muntu yina mpi “kudia nkutu ve ti muntu ya mutindu yina.” (1 Bak. 5:9-11) Nzambi me pesaka nsiku yai ti kikuma. Ntumwa Polo tubaka nde: “Ndambu ya levire ke vimbisaka pate yonso ya fufu.” (1 Bak. 5:6) Muntu yina me sala disumu ya nene mpi me balula ve ntima lenda lembisa bampangi yina ke sala ngolo sambu na kuzitisa bansiku ya Yehowa.​—Bing. 13:20; 1 Bak. 15:33. w24.08 27 § 3-4

Beto ta kuka ve kupesa bantu ya nkaka ngolo na beto mutindu Yehowa ke salaka yo. Kansi beto lenda sadila ngolo na beto sambu na kusadisa bo. Beto lenda sadisa bampangi ya minunu to bampangi yina ke bela. Mu mbandu beto lenda sadisa bo na bisalu ya nzo to kukwenda kusumbila bo bima. To beto lenda sadisa na kutula bunkete na Nzo ya Kimfumu mpi na kusala bisalu ya kuyidika yo. Kuvila mpi ve nde bangogo ke pesaka ngolo. Keti nge me zaba muntu mosi yina lenda baka kikesa kana nge songa yandi nde nge ke sepela ti mambu yina yandi ke sala? Keti nge me zaba muntu mosi yina kele ti mfunu ya kikesa? Kana mpidina, sala yonso sambu na kusonga yandi nde nge ke tudilaka yandi dikebi. Nge lenda kwenda kutala yandi kimuntu-kimuntu to nge lenda binga yandi na telefone to mpi nge lenda tindila yandi karti, message to texto. Kudiyangisa ve mingi sambu na mambu yina nge ta tuba. Mwa mambu fioti mpamba ya ke katuka na ntima yina nge lenda tuba, lenda vanda kibeni mambu yina mpangi yina vandaka ti yo mfunu sambu yandi landa kusadila Yehowa na mutindu ya mbote to sambu yandi kudiwa mbote.​—Bing. 12:25; Baef. 4:29. w24.09 28 § 8-10