Yoane vandaka ntumwa yina Yezu Kristu vandaka kuzola mingi. (Mat. 10:2) Yoane tambulaka ti Yezu ntangu Yezu vandaka kulonga, yandi monaka mambu ya kuyituka yina Yezu vandaka kusala mpi yandi vandaka ti Yezu na bantangu ya mpasi. Mu mbandu, yandi monaka mutindu bo vandaka kufwa Yezu mpi yandi monaka Yezu na nima ya lufutumuku na yandi. Yandi monaka mpi kuyela ya dibundu ya Bukristu na bilumbu ya Bakristu ya ntete, disongidila banda na luyantiku na yo tii ntangu bo “longaka [nsangu ya mbote] na lugangu ya mvimba yina kele na nsi ya zulu.” (Bakol. 1:23) Ntangu Yoane kumaka mununu, yandi zwaka dibaku ya nene ya kusonika mpi Ndinga ya Nzambi. Yoane sonikaka mambu ya kuyituka yina “Yezu Kristu [songaka yandi].” (Kus. 1:1) Yandi sonikaka Evanzile ya Yoane ti mukanda ya 1 Yoane, ya 2 Yoane mpi ya 3 Yoane na nsadisa ya mpeve santu. Mukanda ya 3 Yoane, yandi sonikilaka Gayusi, Mukristu mosi ya kwikama, yina yandi vandaka kuzola kibeni bonso mwana na yandi. (3 Yoa. 1) Mambu yina Mukristu yai ya kwikama sonikaka ke natilaka balongoki yonso ya Yezu mambote tii bubu yai. w24.11 12 § 15-16

Bakala yina ke zolaka nkento na yandi ke bakaka yandi na valere mpi ke sepelaka ti yandi. Sambu na yandi, nkento na yandi kele dikabu ya mfunu mingi yina Yehowa me pesaka yandi. (Bing. 18:22; 31:10) Yo yina, yandi ke sadilaka nkento na yandi mambu na mawete mpi na luzitu nkutu ata ntangu bo ke vukisa nitu. Yandi ke pusaka ve nkento na yandi na kuvukisa nitu ti yandi na mutindu ya mbi, na mutindu yina ta sala nde nkento na yandi kudiwa mbote ve to na mutindu yina ta yangisa kansansa ya nkento na yandi. Bakala fwete sala mpi ve kima mosi yina ta yangisa kansansa na yandi mosi ntangu yandi ke vukisa nitu ti nkento na yandi. (Bis. 24:16) Bakala, kuvila ve nde Yehowa ke monaka mpi ke sepelaka ti bikesa yonso ya nge ke salaka sambu na kupesa nkento na nge lukumu na mambu yonso. Vanda ti lukanu ya kupesaka nkento na nge lukumu, disongidila kubuya kusala mambu yonso ya mbi yina lenda pesa yandi mpasi mpi kuvanda mawete ti yandi, kuzitisa yandi mpi kuzola yandi mingi. Kana nge ke sala mambu yai, yo ta monisa mpenza nde nge ke zolaka nkento na nge mpi nde nge ke bakaka yandi na valere. Diaka, nge ta tanina kima yai ya kuluta mfunu: Kinduku na nge ti Yehowa.​—Nk. 25:14. w25.01 13 § 17-18

Bansadi ya Yehowa ke longaka nsangu ya mbote ti kikesa mpenza mpi yo ke salaka nde bo swaswana ti bantu yina ke kudibingaka Bakristu. Inki lenda sadisa beto na kulanda kuvanda kikesa na kisalu ya kulonga nsangu ya mbote to nkutu na kulonga yo diaka ti kikesa mingi? Kulonguka mbandu ya Yezu ta sadisa beto na kulonga nsangu ya mbote ti kikesa. Ntangu Yezu vandaka na ntoto, yandi vandaka kulonga nsangu ya mbote ti kikesa ntangu yonso. Ya kieleka, kikesa na yandi vandaka kaka kukuma mingi konso kilumbu. Yandi pesaka mbandu ya muntu ya ke salaka na bilanga ya vinu. Muntu yango kunaka nti ya bafige mpi salaka bamvula tatu sambu na kuyedisa yo, kansi yo butaka ve mbuma. Mutindu mosi mpi, Yezu salaka bamvula kiteso ya tatu sambu na kulonga Bayuda nsangu ya mbote kansi mingi na kati na bo ndimaka yo ve. Kansi, mutindu muntu ya ke salaka na bilanga ya vinu vandaka kaka ti kivuvu nde nti na yandi ya bafige ta buta mbuma, Yezu mpi yambulaka ve bantu mpi yandi bwaka ve madidi na kulonga bo nsangu ya mbote. (Luka 13:6-9) Beto ta landa kuvanda kikesa kana beto ke lemfuka na mambu yina yandi longaka mpi kana beto ke sala mambu yina yandi salaka. w25.03 14-15 § 1-4