22 Bantu yonso ya bo solaka na kuvanda bankengidi ya bakielo ya nzo vandaka 212. Bo vandaka na babwala na bo, mutindu bo sonikaka bazina+ na bo na kulanda bandonga ya ba-nkaka na bo. Davidi mpi Samuele muntu ya ke monaka mambu+ tulaka bo na kisalu ya bo ke pesaka bantu yina bo lenda tudila ntima. 23 Bo ti bana na bo vandaka ti kisalu ya kukengila bakielo ya nzo ya Yehowa,+ nzo ya tenta. 24 Bankengidi ya bakielo vandaka na bandambu iya, na esti, na westi, na nordi, mpi na sudi.+ 25 Mbala na mbala bampangi na bo vandaka kukatuka na babwala na bo mpi kukwisa kusala ti bo bilumbu nsambwadi. 26 Na kisalu ya bo ke pesaka bantu yina bo lenda tudila ntima kuvandaka ti bamfumu* iya ya bankengidi ya bakielo. Bo vandaka Balevi, mpi bo vandaka na kiyeka ya kutala basuku* mpi bisika ya kubumba bimvwama ya nzo ya Nzambi ya kieleka.+ 27 Bo vandaka kulala na bisika na bo na nziunga ya nzo ya Nzambi ya kieleka, sambu bo vandaka ti kisalu ya kukengila mpi bo vandaka ti kiyeka ya kubumba nsabi, mpi bo vandaka kukangula nzo yina konso suka.