Esdrasi

4 Ntangu bambeni ya Yuda ti ya Benyamini+ waka nde bantu yina katukaka na kimpika+ vandaka kutunga tempelo sambu na Yehowa Nzambi ya Izraele, 2 na mbala mosi bo pusanaka pene-pene ya Zorobabele ti ya bamfumu ya banzo ya batata mpi tubilaka bo nde: “Bika nde beto tunga ti beno; sambu beto ke sambilaka* Nzambi na beno+ bonso beno, mpi beto ke pesaka yandi bimenga katuka bilumbu ya ntotila Esare-hadoni+ ya Asiria, yina nataka beto awa.”+ 3 Kansi Zorobabele, Yeshua, ti bamfumu ya nkaka ya banzo ya batata ya Izraele tubilaka bo nde: “Beno kele ve ata ti nswa mosi ya kutunga ti beto nzo sambu na Nzambi na beto,+ beto mosi ta tunga yo sambu na Yehowa Nzambi ya Izraele, kaka mutindu ntotila Sirusi ntotila ya Persia songaka beto.”+

4 Ebuna bantu ya insi vandaka kulembisa bantu ya Yuda nitu* mbala na mbala mpi kumanisa bo kikesa sambu bo yambula kutunga.+ 5 Bo futaka bandongisi sambu na kubebisa mambu na bo ya bo kanaka kusala,+ bilumbu yonso ya ntotila Sirusi ya Persia tii na luyalu ya ntotila Dariusi+ ya Persia. 6 Na luyantiku ya luyalu ya Asuerusi, bo sonikaka mukanda mosi sambu na kufunda bantu ya Yuda mpi ya Yeruzalemi. 7 Na bilumbu ya Artazeresesi ntotila ya Persia, Bishlami, Mitredati, Tabeele, ti bantu na yandi ya nkaka yina vandaka kusala ti yandi sonikilaka ntotila Artazeresesi; bo balulaka mukanda yina na Kiarami,+ mpi bo sonikaka yo na bisono ya Kiarami.*

8 * Rehumi mfumu ya luyalu ti nsekudi Shimshai sonikaka mukanda mosi sambu na kufunda Yeruzalemi na ntotila Artazeresesi nde: 9 (Yo katukaka na Rehumi mfumu ya luyalu, na nsekudi Shimshai ti bantu na bo ya nkaka yina vandaka kusala ti bo, na bazuzi ti na bamfumu ya nkaka ya bambanza, na ba sekretere, na bantu ya Ereki,+ na bantu ya Babilonia, na bantu ya Suze,+ disongidila, bantu ya Elami,+ 10 mpi na makanda ya nkaka yina muntu ya nene mpi ya lukumu Asenapare nataka na kimpika mpi tulaka na bambanza ya Samaria,+ mpi na bantu ya nkaka yina vandaka na ntoto yina kele na Simu ya Nzadi,* ebuna 11 yai mambu yina kele na kati ya mukanda yina bo tindilaka yandi.)

“Na ntotila Artazeresesi, mukanda ya me katuka na bansadi na nge, bantu ya ntoto yina kele na Simu ya Nzadi: Ntangu yai 12 bika ntotila kuzaba nde Bayuda yina katukaka na nge mpi tombukaka awa na beto, bo me kuma na Yeruzalemi. Bo ke tunga diaka mbanza yai ya nkolami mpi ya mbi, mpi bo ke manisa kutunga bibaka+ mpi kuyidika bafondasio. 13 Ntangu yai, bika ntotila kuzaba nde kana bo tunga diaka mbanza yai mpi bo manisa kutunga bibaka na yo, bo ta futaka diaka ve mpaku, kitadi,+ to mpaku ya nzila, mpi yo ta sala nde bima kukota diaka ve na bisika ya kubumba bimvwama ya bantotila. 14 Sambu beto ke diaka mungwa ya nzo ya ntotila* mpi yo me fwana ve nde beto mona bo ke bebisa bima ya ntotila, yo yina beto me tinda mukanda yai sambu ntotila kuzaba mambu yai, 15 na mpila nde bo zikisa na mukanda ya mambu ya ba-nkaka na nge.+ Nge ta mona na mukanda yina ya mambu mpi ta zaba nde mbanza yai kele mbanza mosi ya nkolami, ya ke salaka mbi na bantotila ti na baprovense,* mpi na kati na yo kuvandaka ti bantu yina vandaka kupusa bantu na kukolama katuka bantangu ya ntama. Yo yina bo fwaka mbanza yai.+ 16 Beto ke zabisa ntotila nde kana bo tunga diaka mbanza yai mpi bibaka na yo kumana, nge ta yala ve* ntoto yina kele na Simu ya Nzadi.”+

17 Ntotila tindaka ndinga na Rehumi mfumu ya luyalu mpi na nsekudi Shimshai mpi na bantu ya nkaka yina vandaka kusala ti bo mpi yina vandaka kuzinga na Samaria mpi na bantu ya nkaka yina vandaka kuzinga na ntoto yina kele na Simu ya Nzadi nde:

“Mbote! Ntangu yai 18 mukanda yina beno tindilaka beto bo me tanga yo mbote-mbote* na ntwala na mono. 19 Mono songaka bantu na kuzikisa, mpi bo me mona nde katuka ntama, mbanza yina ke nwanisaka bantotila, mpi kukolama ti mavwanga ke salamaka kuna.+ 20 Kuvandaka ti bantotila ya ngolo na Yeruzalemi yina vandaka kuyala ntoto ya mvimba yina kele na Simu ya Nzadi, mpi bo vandaka kufuta mpaku, kitadi, to mpaku ya nzila na maboko na bo. 21 Ntangu yai, beno pesa nsiku sambu bantu yai kubika kutunga, sambu bo tunga diaka ve mbanza yina tii kuna mono ta pesa nsiku. 22 Beno keba, beno yambula ve na kusala diambu yai, sambu bo sala diaka ve mbi na bima ya ntotila.”+

23 Na nima, ntangu bo tangaka mambu ya mukanda ya ntotila Artazeresesi na ntwala ya Rehumi, ya nsekudi Shimshai, mpi ya bantu yina vandaka kusala ti bo, bo kwendaka nswalu na Yeruzalemi kisika Bayuda vandaka mpi bo pimisaka bo na kingolo-ngolo. 24 Ebuna na ntangu yina, kisalu ya nzo ya Nzambi, yina vandaka na Yeruzalemi, telamaka; yo bikalaka mutindu yina kukonda kumana tii na mvula ya zole ya luyalu ya Dariusi ntotila ya Persia.+