Yozue

22 Ebuna Yozue bingaka bana ya Rubeni, bana ya Gadi, mpi ndambu ya dikanda ya Manase 2 mpi yandi tubilaka bo nde: “Beno me sala mambu yonso yina Moize nsadi ya Yehowa songaka beno,+ mpi beno me zitisa ndinga na mono na mambu yonso yina mono songaka beno.+ 3 Beno me yambula ve bampangi na beno bilumbu yai yonso, tii bubu yai;+ mpi beno me zitisa nsiku ya Yehowa Nzambi na beno.+ 4 Ntangu yai Yehowa Nzambi na beno me pesa bampangi na beno ngemba, kaka mutindu yandi silaka bo.+ Ebuna ntangu yai, beno lenda vutuka na batenta na beno na ntoto yina Moize nsadi ya Yehowa pesaka beno na simu yina ya nkaka* ya Yordani.+ 5 Kansi beno sala yonso kibeni na kuzitisa ntuma mpi Nsiku yina Moize nsadi ya Yehowa pesaka beno+ nde beno zola Yehowa Nzambi na beno,+ beno tambula na banzila na yandi yonso,+ beno zitisa bantuma na yandi,+ beno kangama na yandi,+ mpi beno sadila yandi+ na ntima na beno ya mvimba mpi na moyo*+ na beno ya mvimba.”

6 Ebuna Yozue sakumunaka bo mpi pesaka bo nzila ya kuvutuka; mpi bo kwendaka na batenta na bo. 7 Moize pesaka ndambu ya dikanda ya Manase dikabu na Bashani,+ mpi Yozue pesaka ndambu yina ya nkaka ya dikanda ya Manase ntoto na ndambu ya westi ya Yordani,+ kumosi ti bampangi na bo. Diaka, ntangu Yozue pesaka bo nzila ya kuvutuka na batenta na bo, yandi sakumunaka bo 8 mpi tubilaka bo nde: “Beno vutuka na batenta na beno ti bimvwama mingi, ti bitwisi mingi kibeni, ti arza mpi wolo, kwivre mpi bibende, mpi bilele mingi kibeni.+ Beno baka bima yina beno botulaka+ na bambeni na beno mpi beno kabula yo ti bampangi na beno.”

9 Na nima, bana ya Rubeni, bana ya Gadi, mpi ndambu ya dikanda ya Manase bikisaka bantu yina ya nkaka ya Izraele na Shilo na insi ya Kanana, mpi bo vutukaka na ntoto ya Gileadi,+ ntoto yina bo pesaka bo mpi yina bo vandaka kuzinga na kulanda mambu yina Yehowa tubaka na nzila ya Moize.+ 10 Ntangu bo kumaka na ntoto ya Yordani na insi ya Kanana, bana ya Rubeni, bana ya Gadi, mpi ndambu ya dikanda ya Manase tungaka mesa-kimenga mosi kuna pene-pene ya Yordani, mesa-kimenga ya nene kibeni. 11 Na nima, bantu ya Izraele ya nkaka waka mambu yina+ mpi bo tubaka nde: “Tala! Bana ya Rubeni, bana ya Gadi, mpi ndambu ya dikanda ya Manase me tunga mesa-kimenga mosi na ndilu ya insi ya Kanana na ntoto ya Yordani na simu yina kele ya bantu ya Izraele.” 12 Ntangu bantu ya Izraele waka mambu yina, kimvuka ya mvimba ya bantu ya Izraele vukanaka na Shilo+ sambu na kukwenda kunwanisa bo.

13 Ebuna bantu ya Izraele tindaka Fineasi+ mwana ya nganga-nzambi Eleazare na kukwenda na bana ya Rubeni, na bana ya Gadi, mpi na ndambu ya dikanda ya Manase na ntoto ya Gileadi, 14 mpi bamfumu kumi vandaka ti yandi, mfumu mosi na konso nzo ya batata ya makanda yonso ya Izraele, konso muntu vandaka mfumu ya nzo ya batata na yandi na kati ya mafunda* ya Izraele.+ 15 Ntangu bo kumaka na bana ya Rubeni, na bana ya Gadi, mpi na ndambu ya dikanda ya Manase na ntoto ya Gileadi, bo tubilaka bo nde:

16 “Kimvuka ya mvimba ya bantu ya Yehowa me tuba nde: ‘Sambu na nki beno me sadila Nzambi ya Izraele diambu yai ya kukonda kwikama?+ Bubu yai beno me yambula kulanda Yehowa na mutindu beno me kuditungila mesa-kimenga mpi beno me kolama na Yehowa.+ 17 Keti kifu ya Peore fwanaka ve sambu na beto? Beto me kudikumisaka ve bunkete sambu na yo tii bubu yai, ata mpasi bwilaka kimvuka ya bantu ya Yehowa.+ 18 Ebuna bubu yai beno ke zola kuyambula kulanda Yehowa! Kana beno kolama na Yehowa bubu yai, ebuna mbasi yandi ta wila kimvuka ya mvimba ya bantu ya Izraele makasi.+ 19 Ntangu yai kana yo kele sambu ntoto yina bo pesaka beno kele mvindu, beno sabuka mpi beno kwisa na ntoto ya Yehowa+ kisika nzo-tenta ya Yehowa kele+ mpi beno zinga na kati na beto, kansi beno kolama ve na Yehowa, mpi beno kumisa beto ve bankolami na kutunga mesa-kimenga ya nkaka katula mesa-kimenga ya Yehowa Nzambi na beto.+ 20 Ntangu Akani+ mwana ya Zera salaka diambu ya kukonda kwikama na yina me tala bima yina yo lombaka nde bo fwa, keti Nzambi wilaka ve kimvuka ya mvimba ya bantu ya Izraele makasi?+ Yandi mpamba ve muntu fwaka sambu na kifu na yandi.’”+

21 Ebuna bana ya Rubeni, bana ya Gadi, mpi ndambu ya dikanda ya Manase vutudilaka bamfumu ya mafunda* ya Izraele+ nde: 22 “Nzambi ya banzambi, Yehowa!* Nzambi ya banzambi, Yehowa!+ Yandi me zaba, Izraele mpi ta zaba. Kana beto kolamaka mpi kondaka kwikama na Yehowa, kubikisa beto ve na luzingu bubu yai. 23 Kana beto kuditungilaka mesa-kimenga sambu na kuyambula kulanda Yehowa mpi sambu na kupesa makabu ya kuyoka, makabu ya bambuma, mpi bimenga ya kinduku na zulu na yo, Yehowa ta pesa beto ndola.+ 24 Kansi, beto salaka yo sambu na kikuma ya nkaka, sambu beto tubaka nde, ‘Na bilumbu ke kwisa, bana na beno ta tubila bana na beto nde: “Inki diambu beno kele na yo ti Yehowa Nzambi ya Izraele? 25 Yehowa me tulaka Yordani bonso ndilu na kati na beto ti beno, bana ya Rubeni mpi bana ya Gadi. Beno kele ve ti dikabu na Yehowa.” Ebuna bana na beno ta kanga bana na beto nzila ya kusambila* Yehowa.’

26 “Yo yina beto tubaka nde, ‘Bika beto kuditungila mesa-kimenga; yo kele ve sambu na makabu ya kuyoka to bimenga, 27 kansi sambu yo vanda mbangi na kati na beno ti beto+ mpi bana* na beto nde beto ta lungisa kisalu na beto sambu na Yehowa na ntwala na yandi ti makabu na beto ya kuyoka, bimenga na beto, mpi bimenga na beto ya kinduku,+ sambu na bilumbu ke kwisa bana na beno kutubila ve bana na beto nde: “Beno kele ve ti dikabu na Yehowa.”’ 28 Yo yina beto tubaka nde, ‘Kana bo tubila beto ti bana* na beto mambu yai na bilumbu ke kwisa, beto ta tubila bo nde: “Beno tala mesa-kimenga yina ba-nkaka na beto salaka yina me fwanana ti mesa-kimenga ya Yehowa; bo salaka yo ve sambu na makabu ya kuyoka to bimenga, kansi sambu yo vanda mbangi na kati na beno ti beto.”’ 29 Ngindu lenda kwisila beto ve ata fioti na kukolama na Yehowa mpi na kuyambula kulanda Yehowa+ bubu yai mpi kutunga mesa-kimenga ya nkaka sambu na makabu ya kuyoka, makabu ya bambuma, mpi bimenga, katula mesa-kimenga ya Yehowa Nzambi na beto yina kele na ntwala ya nzo-tenta na yandi!”+

30 Ntangu nganga-nzambi Fineasi, bamfumu ya bantu ya Izraele, mpi bamfumu ya mafunda* ya Izraele yina vandaka ti yandi waka mambu yina bana ya Rubeni, ya Gadi, mpi ya Manase tubaka, bo waka kiese.+ 31 Ebuna Fineasi mwana ya nganga-nzambi Eleazare tubilaka bana ya Rubeni, ya Gadi, mpi ya Manase nde: “Bubu yai beto me zaba nde Yehowa kele na kati na beto, sambu beno me sadila ve Yehowa diambu yai ya kukonda kwikama. Ntangu yai beno me gulusa bantu ya Izraele na maboko ya Yehowa.”

32 Na nima, Fineasi mwana ya nganga-nzambi Eleazare ti bamfumu katukaka na ntoto ya Gileadi, na bana ya Rubeni mpi bana ya Gadi, bo vutukaka na insi ya Kanana, mpi bo natilaka bantu ya nkaka ya Izraele nsangu yina. 33 Ebuna bantu ya Izraele waka kiese na nsangu yina. Bo pesaka Nzambi nkembo, mpi bo tubilaka diaka ve mambu ya kukwenda kunwanisa bana ya Rubeni mpi bana ya Gadi sambu na kufwa insi yina bo vandaka kuzinga.

34 Ebuna bana ya Rubeni ti bana ya Gadi pesaka mesa-kimenga yina zina,* sambu “yo kele mbangi na kati na beto ya ke monisa nde Yehowa kele Nzambi ya kieleka.”