Kusonga

3 “Sonikila wanzio ya dibundu yina kele na Sarde nde: Muntu yina kele ti bampeve nsambwadi ya Nzambi+ mpi bambwetete nsambwadi,+ ke tuba nde: ‘Mono me zaba bisalu na nge, mpi bantu me zaba nde nge kele na luzingu, kansi nge kele ya kufwa.+ 2 Kangula meso,+ mpi pesa kikesa na bima ya me bikala yina zolaka kufwa, sambu mono me mona nde nge me lungisa* ve mbote-mbote bisalu na nge na ntwala ya Nzambi na mono. 3 Yo yina, landa kuyibuka mambu yina nge me bakaka mpi yina nge me waka, landa kutanina yo, mpi balula ntima.+ Ya kieleka, kana nge sikama ve, mono ta kwisa bonso muyibi,+ mpi nge ta zaba ve ata fioti na nki ntangu mono ta kwisa na nge.+

4 “‘Kansi, nge kele ti bantu* ya nkaka na Sarde yina bebisaka ve bilele na bo ya zulu,+ mpi bo ta tambula ti mono na bilele ya mpembe,+ sambu bo me fwana. 5 Muntu yina ta nunga,+ bo ta lwatisa yandi bilele ya zulu ya mpembe,+ mpi mono ta vwansa* ve ata fioti zina na yandi na mukanda ya luzingu,+ kansi mono ta ndima na ntwala ya Tata na mono mpi na ntwala ya bawanzio na yandi+ nde mono me zaba zina na yandi. 6 Bika muntu yina kele ti makutu kuwa mambu yina mpeve ke tuba na mabundu.’

7 “Sonikila wanzio ya dibundu yina kele na Filadelfia nde: Muntu yina kele santu,+ yina ke tubaka kieleka,+ yina kele ti nsapi ya Davidi;+ yandi ke kangulaka kielo ebuna muntu mosi ve lenda kanga, mpi yandi ke kangaka ebuna muntu mosi ve lenda kangula, ke tuba nde: 8 ‘Mono me zaba bisalu na nge—wa: mono me tula na ntwala na nge kielo mosi ya kukanguka,+ yina muntu mosi ve lenda kanga. Mpi mono me zaba nde nge kele ti ngolo fioti, mpi nde nge lemfukaka na ndinga na mono mpi nge buyaka ve zina na mono. 9 Wa: mono ta sala nde bantu ya sinagoga ya Satana, bayina ke tubaka nde bo kele Bayuda, kisi bo kele Bayuda ve,+ kansi bo ke kusa—wa: mono ta sala nde bo kwisa mpi bo fukama na ntwala ya makulu na* nge mpi mono ta sala nde bo zaba nde mono me zolaka nge. 10 Sambu nge landaka mbandu ya kukanga-ntima na mono,+ mono ta tanina nge mpi na ntangu ya kumekama+ yina fwete kwisa na ntoto ya mvimba, sambu na kumeka bantu yina ke zingaka na ntoto. 11 Mono ke kwisa nswalu.+ Landa kusimba ngolo mambu yina nge kele na yo, sambu muntu mosi ve kubaka mpu na nge ya kimfumu.+

12 “‘Muntu yina ta nunga—mono ta kumisa yandi dikunzi na tempelo ya Nzambi na mono, yandi ta basika diaka ve ata fioti na kati na yo, mpi mono ta sonika na zulu na yandi zina ya Nzambi na mono+ mpi zina ya mbanza ya Nzambi na mono, Yeruzalemi ya Mpa+ yina ke kulumuka katuka na zulu na kisika ya Nzambi na mono, mpi zina na mono ya mpa.+ 13 Bika muntu yina kele ti makutu kuwa mambu yina mpeve ke tuba na mabundu.’

14 “Sonikila wanzio ya dibundu yina kele na Laodisea+ nde: Amen,+ mbangi+ ya kwikama mpi ya ke tubaka kieleka,+ luyantiku ya lugangu ya Nzambi,+ ke tuba nde: 15 ‘Mono me zaba bisalu na nge, nde nge kele madidi ve tiya mpi ve. Mono ke zola nde nge vanda madidi to tiya. 16 Yo yina, sambu nge kele mwa-tiya mpi nge kele madidi+ ve tiya+ mpi ve, mono ta luka nge na munoko na mono. 17 Sambu nge ke tuba nde: “Mono kele mvwama,+ mono me zwaka bimvwama, mpi mono kele na mfunu ata ya kima mosi ve,” kansi nge ke zaba ve nde nge kele muntu ya mpasi, muntu ya mawa, nsukami, kifwa-meso, mpi kinkonga, 18 mono ke longisila nge na kukwisa kusumba na mono wolo ya bo me katula mvindu na tiya sambu nge kuma mvwama, bilele ya zulu ya mpembe sambu nge lwata ebuna bantu kumona ve kinkonga na nge mpi nge wa ve nsoni,+ mpi nkisi ya meso sambu nge pakula yo na meso na nge+ sambu nge mona.+

19 “‘Bantu yonso yina mono ke zolaka, mono ke nganinaka bo mpi ke pesaka bo ndola.+ Yo yina, vanda kikesa mpi balula ntima.+ 20 Wa! Mono me telama na kielo mpi mono ke bula. Kana muntu kuwa ndinga na mono mpi kukangula kielo, mono ta kota na nzo na yandi mpi mono ta dia madia ya nkokila ti yandi mpi yandi ti mono. 21 Muntu yina ta nunga,+ mono ta pesa yandi nswa ya kuvanda ti mono na kiti na mono ya kimfumu,+ mutindu mono nungaka mpi me vandaka+ ti Tata na mono na kiti na yandi ya kimfumu. 22 Bika muntu yina kele ti makutu kuwa mambu yina mpeve ke tuba na mabundu.’”