2 Bantotila

24 Na bilumbu ya Yehoyakimi, Nebukadenezare+ ntotila ya Babilone kwisaka kunwanisa yandi, ebuna Yehoyakimi kumaka nsadi na yandi bamvula tatu. Kansi, Yehoyakimi balukilaka yandi mpi kolamaka. 2 Ebuna Yehowa yantikaka kutindila yandi bimvuka ya miyibi ya bantu ya Kaldea,+ ya bantu ya Siria, ya bantu ya Moabi, mpi ya bantu ya Amoni. Yandi landaka kutinda bo na kunwanisa Yuda sambu na kufwa yo, na kuwakana ti ndinga ya Yehowa+ yina yandi tubaka na nzila ya bansadi na yandi bambikudi. 3 Ya kieleka, mambu yai kuminaka Yuda sambu Yehowa muntu tubaka yo, sambu na kukatula bo na meso na yandi+ sambu na masumu yonso yina Manase salaka,+ 4 mpi menga ya bantu yina salaka mbi ve yina yandi tiamunaka,+ sambu yandi fulusaka Yeruzalemi ti menga ya bantu yina me sala mbi ve, mpi Yehowa buyaka kulolula.+

5 Sambu na mambu ya nkaka ya Yehoyakimi salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Yuda?+ 6 Mpi Yehoyakimi lalaka sambu na kupema ti ba-nkaka na yandi;+ ebuna mwana na yandi Yehoyakini kumaka ntotila na kisika na yandi.

7 Ntotila ya Ezipte bikaka kubasika diaka ve ata fioti na insi na yandi, sambu ntotila ya Babilone bakaka bansi yonso yina vandaka ya ntotila ya Ezipte,+ katuka na Muwanda* ya Ezipte+ tii na Nzadi ya Efrate.+

8 Yehoyakini+ vandaka ti bamvula 18 ntangu yandi kumaka ntotila, mpi yandi yalaka bangonda tatu na Yeruzalemi.+ Zina ya mama na yandi Nehushta mwana ya Elnatani muntu ya Yeruzalemi. 9 Yandi landaka kusala mambu ya mbi na meso ya Yehowa, na kuwakana ti mambu yonso yina tata na yandi salaka. 10 Na ntangu yina, bansadi ya Nebukadenezare ntotila ya Babilone kwisaka kunwanisa Yeruzalemi, mpi bo ziungaka mbanza.+ 11 Nebukadenezare ntotila ya Babilone kumaka na mbanza ntangu bansadi na yandi ziungaka yo.

12 Yehoyakini ntotila ya Yuda basikaka mpi kwendaka na ntotila ya Babilone,+ kumosi ti mama na yandi, bansadi na yandi, bamfumu na yandi, mpi bakapita ya nzo na yandi;+ ebuna ntotila ya Babilone nataka yandi na kimpika na mvula ya nana ya luyalu na yandi.+ 13 Na nima yandi bakaka bimvwama yonso yina vandaka na nzo ya Yehowa mpi bimvwama yina vandaka na nzo ya ntotila.+ Yandi pasulaka bisadilu yonso ya wolo yina Salomo ntotila ya Izraele salaka na tempelo ya Yehowa,+ kaka mutindu Yehowa tubaka. 14 Yandi bakaka Yeruzalemi ya mvimba, bamfumu yonso,+ basoda yonso ya ngolo, mpi bantu yonso yina ke salaka bisalu ya maboko ti bantu yonso yina ke salaka bima ya bibende* mpi nataka bo na insi ya nkaka+—yandi nataka bantu 10 000 na insi ya nkaka. Yandi bikaka ve ata muntu mosi katula kaka bansukami ya ngolo ya insi.+ 15 Na mutindu yina yandi nataka Yehoyakini+ na Babilone;+ yandi nataka mpi mama ya ntotila, bankento ya ntotila, bakapita ya nzo na yandi, mpi bantu ya kuluta mfunu ya insi, yandi bakaka bo na Yeruzalemi mpi nataka bo na Babilone. 16 Ntotila ya Babilone bakaka mpi basoda yonso, 7 000, mpi bantu 1 000 ya ke salaka bisalu ya maboko mpi ya ke salaka bima ya bibende* yandi nataka bo na Babilone, bo yonso yina vandaka babakala ya kikesa mpi bantu ya me zaba bitumba mbote-mbote. 17 Ntotila ya Babilone tulaka Matania, tata-leki ya Yehoyakini,+ ntotila na kisika na yandi mpi pesaka yandi zina ya nkaka Sidikiya.+

18 Sidikiya vandaka ti bamvula 21 ntangu yandi kumaka ntotila, mpi yandi yalaka bamvula 11 na Yeruzalemi. Zina ya mama na yandi Amutale+ mwana ya Yeremia muntu ya Libna. 19 Yandi landaka kusala mambu ya mbi na meso ya Yehowa, na kuwakana ti mambu yonso yina Yehoyakimi salaka.+ 20 Mambu yai salamaka na Yeruzalemi mpi na Yuda sambu Yehowa waka makasi, tii kuna yandi kulaka bo na meso na yandi.+ Ebuna Sidikiya kolamaka na ntotila ya Babilone.+