Esdrasi

6 Na ntangu yina, ntotila Dariusi pesaka nsiku, ebuna bo zikisaka na mikanda* kisika bo vandaka kutula bimvwama na Babilone. 2 Bo monaka rulo mosi na kisika ya ngolo na Ekbatane, na provense* ya Media, mpi na rulo yina bo sonikaka bangogo yai:

3 Na mvula ya ntete ya ntotila Sirusi, ntotila Sirusi pesaka nsiku sambu na nzo ya Nzambi na Yeruzalemi+ nde: ‘Bika nde bo tunga diaka nzo yina sambu yo vanda kisika ya bo fwete pesaka bimenga, mpi bo fwete tula bafondasio na yo na kisika na yo; nda na yo katuka na ntoto tii na zulu fwete vanda maboko* 60, mpi nene na yo maboko 60,+ 4 ti bandonga tatu ya matadi ya nene mpi ndonga mosi ya mabaya;+ mpi mbongo yina bo ta sadila, bika nde bo baka yo na nzo ya ntotila.+ 5 Diaka, bika nde bo vutula malonga ya wolo ti ya arza ya nzo ya Nzambi yina Nebukadenezare basisaka na tempelo yina vandaka na Yeruzalemi mpi nataka na Babilone,+ sambu bo tula yo na kisika na yo na tempelo na Yeruzalemi mpi bo tula yo na nzo ya Nzambi.’+

6 Ntangu yai, Tatenai mfumu ya luyalu ya ntoto yina kele na Simu ya Nzadi,* Shetare-bozenai, mpi bantu yina beno ke salaka ti bo, bamfumu ya nkaka ya bambanza ya ntoto yina kele na Simu ya Nzadi+—beno vanda ntama ti kisika yina. 7 Beno kota ve na mambu ya kisalu ya nzo yina ya Nzambi. Mfumu ya mbanza ya Bayuda ti bankuluntu ya Bayuda ta tunga diaka nzo yina ya Nzambi na kisika yina yo vandaka ntete. 8 Diaka, mono ke pesa nsiku sambu na mambu yina beno fwete sala sambu na bankuluntu yai ya Bayuda sambu na kutunga diaka nzo yina ya Nzambi: Mbongo yina bo ta pesa kukonda kusukinina na bantu yina sambu bo landa kusala kisalu kukonda kuzenga+ fwete katuka na bimvwama ya ntotila,+ na mpaku yina bo me baka na ntoto yina kele na Simu ya Nzadi. 9 Ebuna konso kima yina bo kele na yo mfunu—bana-bangombe ya babakala,+ mameme ya babakala,+ ti bana-mameme+ sambu na makabu ya kuyoka sambu na Nzambi ya zulu, ble,+ mungwa,+ vinu,+ mpi mafuta,+ kaka mutindu banganga-nzambi yina kele na Yeruzalemi me tuba—bo fwete pesa bo yo mbala na mbala mpi konso kilumbu kukonda kusukinina, 10 na mpila nde bo pesa mbala na mbala makabu yina ke sepedisaka Nzambi ya zulu mpi bo samba sambu na luzingu ya ntotila mpi ya bana na yandi.+ 11 Mono me pesa mpi nsiku nde kana muntu mosi kufwa nsiku yai, bo ta tumuna dibaya mosi na nzo na yandi mpi bo ta tedimisa yandi mpi ta kangisa yandi na zulu na yo,* ebuna bo ta kumisa nzo na yandi kabine ya bantu yonso* sambu na mbi yai. 12 Bika nde Nzambi yina salaka nde zina na yandi kuvanda kuna+ kukatula konso ntotila mpi konso muntu yina ta nangula diboko sambu na kufwa nsiku yai mpi kufwa nzo yina ya Nzambi ya kele na Yeruzalemi. Mono, Dariusi, muntu me pesa nsiku yai. Bika nde yo salama kukonda kusukinina.”

13 Ebuna, Tatenai mfumu ya mbanza ya ntoto yina kele na Simu ya Nzadi, Shetare-bozenai,+ mpi bantu yina bo vandaka kusala ti bo nataka kukonda kusukinina bima yonso yina ntotila Dariusi pesaka nsiku. 14 Bankuluntu ya Bayuda landaka kutunga mpi kukwenda na ntwala,+ mpi bambikudulu ya mbikudi Agai+ mpi mbikudi Zekaria+ mutekolo ya Ido vandaka kupesa bo kikesa; bo manisaka kutunga yo na nsiku ya Nzambi ya Izraele+ mpi na nsiku ya Sirusi,+ ya Dariusi,+ ti ya Artazeresesi+ ntotila ya Persia. 15 Bo manisaka nzo yina na kilumbu ya tatu ya ngonda ya Adare,* na mvula ya sambanu ya luyalu ya ntotila Dariusi.

16 Ebuna bantu ya Izraele, banganga-nzambi, Balevi,+ mpi bantu ya nkaka yina vandaka ntete bampika yantikaka kusadila* nzo yina ya Nzambi na kiese. 17 Sambu na kuyantika kusadila nzo yina ya Nzambi, bo nataka bangombe ya babakala 100, mameme ya babakala 200, bana-mameme 400, mpi bankombo ya babakala 12 bonso dikabu sambu na disumu sambu na Izraele ya mvimba, na kuwakana ti ntalu ya makanda ya Izraele.+ 18 Ebuna bo tulaka banganga-nzambi na bimvuka na bo mpi Balevi na bimvuka na bo sambu na kisalu ya Nzambi na Yeruzalemi,+ na kuwakana ti mambu yina bo me sonikaka na mukanda ya Moize.+

19 Ebuna bantu yina vandaka ntete bampika salaka Paki na kilumbu ya 14 ya ngonda ya ntete.+ 20 Banganga-nzambi yonso ti Balevi yonso kudikumisaka bunkete,+ ebuna bo yonso vandaka bunkete; bo fwaka kimenga ya Paki sambu na bantu yonso yina vandaka ntete bampika, sambu na bampangi na bo banganga-nzambi, mpi sambu na bo mosi. 21 Ebuna bantu ya Izraele yina katukaka na kimpika mpi kwisaka kuvutuka, bo diaka yo, kumosi ti konso muntu yina vukanaka ti bo mpi kudikatulaka na mvindu ya makanda ya insi yina sambu na kusambila* Yehowa Nzambi ya Izraele.+ 22 Bo salaka mpi na kiese yonso Nkinsi ya Mampa ya Kukonda Levire+ bilumbu nsambwadi, sambu Yehowa salaka nde bo wa kiese mpi yandi salaka nde ntima ya ntotila ya Asiria kundima bo,+ yo yina yandi sadisaka bo* na kisalu ya nzo ya Nzambi ya kieleka, Nzambi ya Izraele.