Luka

19 Yandi kotaka na Yeriko mpi yandi vandaka kuluta na kati na yo. 2 Muntu mosi vandaka pana, zina na yandi Zasheo; yandi vandaka mfumu ya bakalaki ya mpaku, mpi yandi vandaka mvwama. 3 Yandi vandaka kusosa kumona kana Yezu yina vandaka nani, kansi yandi lendaka ve kumona sambu bantu vandaka mingi mpi sambu yandi vandaka nkufi. 4 Yo yina, yandi kwendaka ntinu na ntwala mpi mataka na nti ya sikomore* sambu na kumona yandi, sambu Yezu zolaka kuluta na nzila yina. 5 Ntangu Yezu kumaka kisika yina, yandi talaka na zulu mpi tubilaka yandi nde: “Zasheo, kulumuka nswalu, sambu bubu yai mono fwete vanda na nzo na nge.” 6 Yandi kulumukaka nswalu mpi yandi yambaka Yezu na kiese yonso na nzo na yandi. 7 Ntangu bo monaka diambu yai, bo yonso yantikaka kubokuta nde: “Yandi me kwenda kuvanda na nzo ya muntu ya masumu.”+ 8 Kansi Zasheo telamaka mpi tubilaka Mfumu nde: “Mfumu, tala, mono ta pesa kati-kati ya bima na mono na bansukami, mpi konso kima yina mono botulaka na muntu,* mono ta vutula yo mbala iya.”+ 9 Ebuna Yezu tubilaka yandi nde: “Bubu yai luguluku me kwisa na nzo yai, sambu yandi mpi kele mwana ya Abrahami. 10 Sambu Mwana ya muntu kwisaka kusosa mpi kugulusa bantu yina vilaka.”+

11 Ntangu bo vandaka kuwa mambu yai, yandi pesaka mbandu ya nkaka, sambu yandi vandaka pene-pene ya Yeruzalemi mpi bo vandaka kuyindula nde Kimfumu ya Nzambi zolaka kumonana kaka na ntangu yina.+ 12 Yo yina, yandi tubaka nde: “Muntu mosi yina butukaka na dibuta ya kintotila kwendaka na insi mosi ya ntama+ sambu na kubaka kiyeka ya kintotila mpi kuvutuka. 13 Yandi bingaka bampika na yandi kumi, yandi pesaka bo bamine* kumi mpi yandi tubilaka bo nde, ‘Beno sala mumbongo ti bima yai tii kuna mono ta kwisa.’+ 14 Kansi bantu ya insi na yandi vandaka kumenga yandi mpi bo tindaka kimvuka ya mimonisi sambu na kulanda yandi mpi kutuba nde, ‘Beto ke zola ve nde muntu yai kukuma ntotila na beto.’

15 “Nsuka-nsuka ntangu yandi vutukaka na nima ya kubaka kiyeka ya kintotila,* yandi bingaka bampika yina yandi pesaka mbongo,* sambu na kuzaba mbongo yina bo bakaka na kisalu na bo ya mumbongo.+ 16 Mpika ya ntete kwisaka mpi tubaka nde, ‘Mfumu, mine na nge butaka bamine kumi.’+ 17 Yandi tubilaka yandi nde, ‘Nge me sala mbote, mpika ya mbote! Sambu nge me kudimonisa ya kwikama na diambu ya fioti kibeni, yala bambanza kumi.’+ 18 Ebuna mpika ya zole kwisaka mpi tubaka nde, ‘Mfumu, mine na nge butaka bamine tanu.’+ 19 Yandi tubilaka mpi mpika yai nde, ‘Nge mpi, yala bambanza tanu.’ 20 Kansi mpika ya nkaka kwisaka mpi tubaka nde, ‘Mfumu, mine na nge yo yai; mono bumbaka yo na lele. 21 Mono vandaka kuwa nge boma sambu nge kele makambu ngolo; nge ke bakaka bima yina nge bumbisaka ve, mpi nge ke katulaka bima yina nge kunaka ve.’+ 22 Yandi tubilaka yandi nde, ‘Mpika ya mbi, mono ke sambisa nge na mambu yina nge mosi me tuba. Nge zabaka nde mono kele makambu ngolo, mono ke bakaka bima yina mono bumbisaka ve mpi mono ke katulaka bima yina mono kunaka ve, mpidina ve?+ 23 Ebuna, sambu na nki nge tulaka ve mbongo na mono* na banki? Mpi ntangu mono zolaka kuvutuka, mono zolaka kubaka yo ti mbongo ya nkaka na zulu.’

24 “Ebuna yandi tubilaka bantu yina telamaka pana nde, ‘Beno botula yandi mine yina mpi beno pesa yo na muntu yina kele ti bamine kumi.’+ 25 Kansi bo songaka yandi nde, ‘Mfumu, yandi kele ti bamine kumi!’— 26 ‘Mono ke tubila beno nde, konso muntu yina kele ti bima, bo ta yika yandi bima mingi, kansi muntu yina kele ve na bima, bo ta katula yandi ata bima yina yandi kele na yo.+ 27 Diaka, beno kwisa kunata bambeni na mono yina zolaka ve nde mono kuma ntotila na bo mpi beno fwa bo na ntwala na mono.’”

28 Ntangu Yezu manisaka kutuba mambu yai, yandi kwendaka na ntwala na bo, yandi tombukaka na Yeruzalemi. 29 Mpi ntangu yandi kumaka pene-pene ya Betfaze mpi ya Betania na ngumba ya bo ke bingaka Ngumba ya Banti ya Olive,+ yandi tindaka balongoki zole,+ 30 mpi tubaka nde: “Beno kwenda na bwala yina ke monana na ntwala, mpi ntangu beno ta kota na kati na yo, beno ta mona mwana-mpunda ya bo me kanga na nsinga, yina muntu mosi me vandaka ntete ve na zulu na yo. Beno kangula yo mpi beno nata yo awa. 31 Kansi kana muntu kuyula beno nde, ‘Sambu na nki beno ke kangula yo?’ Beno fwete tuba nde: ‘Mfumu kele ti mfunu na yo.’” 32 Ebuna bantu yina yandi tindaka kwendaka mpi monaka mambu mutindu yandi songaka bo.+ 33 Kansi ntangu bo vandaka kukangula mwana-mpunda, bankwa na yo yulaka bo nde: “Sambu na nki beno ke kangula mwana-mpunda yina?” 34 Bo tubaka nde: “Mfumu kele ti mfunu na yo.” 35 Bo nataka yo na Yezu, mpi bo losaka bilele na bo ya zulu na zulu ya mwana ya mpunda, ebuna bo tulaka Yezu na zulu na yo.+

36 Ntangu yandi vandaka kukwenda, bo vandaka kutanda bilele na bo ya zulu na nzila.+ 37 Ntangu yandi kumaka pene-pene ya nzila yina ke yantika na Ngumba ya Banti ya Olive, balongoki yonso yantikaka kuwa kiese mpi kukumisa Nzambi na ndinga ya ngolo sambu na bidimbu ya nkumbwa yonso yina bo monaka, 38 bo vandaka kutuba nde: “Bika nde muntu yina ke kwisa bonso Ntotila na zina ya Yehowa* kubaka lusakumunu! Ngemba na zulu, mpi nkembo na zulu!”+ 39 Kansi, Bafarize ya nkaka yina vandaka na kati ya kimvuka yina ya bantu tubilaka yandi nde: “Longi, nganina balongoki na nge.”+ 40 Kansi yandi vutulaka nde: “Mono ke tubila beno nde, kana bantu yai kuvanda pima, matadi ta tuba na ndinga ya ngolo.”

41 Ntangu yandi kumaka pene-pene, yandi monaka mbanza mpi yandi dilaka sambu na yo,+ 42 mpi yandi tubaka nde: “Kana nge mpi bakisaka na kilumbu yai mambu yina ke tadila ngemba—kansi ntangu yai bo me bumba yo na meso na nge.+ 43 Sambu bilumbu ta kwisa na zulu na nge ntangu bambeni na nge ta tunga na nziunga na nge lupangu mosi ya ngolo ya bo me sala na banti ya nsongi mpi ta ziunga nge mpi ta kangisa nge* na ndambu yonso.+ 44 Bo ta losa nge ti bana na nge yina kele na kati na nge na ntoto,+ mpi bo ta bika ve ata ditadi mosi na zulu ya ditadi na kati na nge,+ sambu nge bakisaka ve ntangu yina bo kwisaka kutala nge.”

45 Na nima yandi kotaka na tempelo mpi yandi yantikaka kukula bantu yina vandaka kuteka,+ 46 mpi yandi tubilaka bo nde: “Bo me sonikaka nde, ‘Nzo na mono ta vanda nzo ya bisambu,’+ kansi beno me kumisa yo nzo ya miyibi.”+

47 Yandi landaka kulonga konso kilumbu na tempelo. Kansi bamfumu ya banganga-nzambi, bansekudi, ti bantwadisi ya bantu vandaka kusosa kufwa yandi;+ 48 kansi bo monaka ve mutindu ya kusala yo, sambu bantu yonso vandaka kuwidikila yandi na dikebi yonso.+