Bingana

12 Muntu yina ke zolaka ndola ke zolaka nzayilu,+

Kansi muntu yina ke zolaka ve nde bo nganina yandi me konda mayele.*+

 2 Yehowa ke ndimaka muntu ya mbote,

Kansi yandi ke bedisaka muntu ya kele ti balukanu ya mbi.+

 3 Muntu mosi ve ke telamaka ngolo na nsadisa ya mambu ya mbi,+

Kansi bo ta tumuna ve bantu ya lunungu ata fioti.

 4 Nkento yina me fwana kele mpu ya kimfumu sambu na bakala na yandi,+

Kansi nkento yina ke salaka mambu ya nsoni kele bonso maladi yina me dia mikwa na yandi.+

 5 Mabanza ya bantu ya lunungu kele mbote,

Kansi lutwadisu ya bantu ya mbi kele luvunu.

 6 Bangogo ya bantu ya mbi kele mutambu ya ke fwaka,*+

Kansi munoko ya bantu ya mbote ke gulusaka bo.+

 7 Kana bo me bwisa bantu ya mbi, bo ke vandaka diaka ve,

Kansi nzo ya bantu ya lunungu ta bikala ya kutelama.+

 8 Bo ke kumisaka muntu sambu na mambu ya ngangu yina ke basikaka na munoko na yandi,+

Kansi muntu yina kele na ntima ya luvunu, bo ta sadila yandi mambu ti kuvweza.+

 9 Kuvanda muntu ya bo ke zitisaka mingi ve kansi kuvanda ti nsadi kele mbote

Kuluta kudikumisa kansi kukonda madia.*+

10 Muntu ya lunungu ke kebaka bambisi na yandi ya bwala,*+

Kansi mawa ya bantu ya mbi ke vandaka nku.

11 Muntu yina ke sala bilanga na yandi ta dia mpi ta fuluka,+

Kansi muntu yina ke landaka mambu ya kukonda mfunu me konda mabanza ya mbote.*

12 Muntu ya mbi ke lulaka bima yina bantu ya nkaka ya mbi me kanga,

Kansi musisa ya bantu ya lunungu ke butaka mbuma.

13 Muntu ya mbi ke kangamaka na mutambu ya kutuba na yandi ya masumu,+

Kansi muntu ya lunungu ke gulukaka na bampasi.

14 Mambu yina muntu ke tubaka na munoko na yandi kele bonso madia ya mbote yina ke fulusa divumu na yandi,+

Mpi kisalu ya maboko na yandi ta pesa yandi lufutu.

15 Nzila ya zoba kele mbote na meso na yandi mosi,+

Kansi muntu ya mayele ke ndimaka ndongisila.+

16 Zoba ke monisaka kiseku na yandi nswalu,*+

Kansi muntu ya mayele ke monaka mafingu mpamba.*

17 Muntu yina ke ta kimbangi na kwikama ta tuba masonga,*

Kansi mbangi ya luvunu ke tubaka mambu ya luvunu.

18 Kutuba kukonda kuyindula kele bonso kulwadisa muntu na mbele ya bitumba,

Kansi ludimi ya bantu ya mayele ke belulaka.+

19 Bikobo ya ke tubaka kieleka ta zinga kimakulu,+

Kansi ludimi yina ke kusaka ta zinga kaka ntangu fioti.+

20 Luvunu ke vandaka na ntima ya bantu yina ke kanaka mambu ya mbi,

Kansi bantu yina ke siamisaka* ngemba ke vandaka na kiese.+

21 Mpasi mosi ve ta bwila muntu ya lunungu,+

Kansi bantu ya mbi ta kutana ti bampasi mingi kibeni.+

22 Munoko yina ke kusaka kele kima ya nzanzi na meso ya Yehowa,+

Kansi bantu yina ke salaka mambu na kwikama yonso ke pesaka yandi kiese.

23 Muntu ya mayele ke bumbaka mambu yina yandi me zaba,

Kansi ntima ya zoba ke basisaka buzoba na yandi.+

24 Diboko ya bantu yina ke salaka ngolo ta yala,+

Kansi maboko ya bamolo, bo ta pesa yo kisalu ya ngolo.+

25 Basusi na ntima ya muntu ke lembisaka ntima,*+

Kansi ndinga ya mbote ke pesaka yo kikesa.+

26 Muntu ya lunungu ke talaka banseke na yandi,

Kansi nzila ya bantu ya mbi ke vidisaka bo nzila.

27 Molo ke kudikisaka ve mbisi ya kukanga,+

Kansi kikesa kele kima ya mfunu yina muntu kele na yo.

28 Nzila ya lunungu ke nataka na luzingu;+

Lufwa kele ve na nzila na yo.