Yeremia

24 Na nima Yehowa songaka mono bitunga zole ya bafige yina bo tulaka na ntwala ya tempelo ya Yehowa, ntangu Nebukadenezare* ntotila ya Babilone nataka na insi ya nkaka Yekonia*+ mwana ya Yehoyakimi,+ ntotila ya Yuda, kumosi ti bamfumu ya Yuda, bantu ya ke salaka bisalu ya maboko, mpi bantu ya ke salaka bima ya bibende;* yandi bakaka bo na Yeruzalemi mpi nataka bo na Babilone.+ 2 Kitunga mosi vandaka ti bafige ya mbote kibeni, bonso bafige ya ntete, kansi kitunga yina ya nkaka vandaka ti bafige ya mbi kibeni, yo vandaka mbi kibeni mpila ya kudia yo vandaka ve.

3 Na nima Yehowa yulaka mono nde: “Yeremia, nki nge ke mona?” Mono tubaka nde: “Bafige; bafige ya mbote kele mbote kibeni, kansi bafige ya mbi kele mbi kibeni, yo kele mbi kibeni mpila ya kudia yo kele ve.”+

4 Ebuna ndinga ya Yehowa kwisilaka mono nde: 5 “Yehowa Nzambi ya Izraele ke tuba nde, ‘Bonso bafige yai ya mbote, mono ta mona na mutindu ya mbote bantu ya Yuda yina bo nataka na insi ya nkaka, bayina mono katulaka na kisika yai mpi tindaka na insi ya bantu ya Kaldea. 6 Mono ta keba bo sambu na mambote na bo, mpi mono ta vutula bo na insi yai.+ Mono ta tunga bo, kansi mono ta bwisa ve; mono ta kuna bo, kansi mono ta tumuna ve.+ 7 Mono ta pesa bo ntima ya kuzaba mono, nde mono kele Yehowa.+ Bo ta kuma bantu na mono, mpi mono ta kuma Nzambi na bo,+ sambu bo ta vutukila mono na ntima na bo ya mvimba.+

8 “‘Kansi sambu na bafige ya mbi yina kele mbi kibeni na mpila nde bo lenda dia yo ve,+ Yehowa ke tuba: “Mutindu yo yina mono ta mona Sidikiya+ ntotila ya Yuda, bamfumu na yandi, bantu ya Yeruzalemi yina me bikala na insi yai, mpi bantu yina ke zinga na insi ya Ezipte.+ 9 Mono ta kumisa bo kima ya ke pesa boma mpi ya ke nata mpasi na bimfumu yonso ya nsi-ntoto,+ kima ya nsoni, kingana, kima ya bo ke seka,+ mpi kima ya kusinga na bisika yonso yina mono ke panza bo.+ 10 Mpi mono ta tindila bo mbele ya bitumba,+ nzala, mpi kipupa,*+ tii kuna bo ta fwa na insi yina mono pesaka bo ti ba-nkaka na bo.”’”