2 Bantotila

21 Manase+ vandaka ti bamvula 12 ntangu yandi kumaka ntotila, mpi yandi yalaka bamvula 55 na Yeruzalemi.+ Zina ya mama na yandi Efsiba. 2 Yandi salaka mambu ya mbi na meso ya Yehowa, yandi landaka mambu ya mbi ya makanda+ yina Yehowa kulaka na ntwala ya bantu ya Izraele.+ 3 Yandi tungaka diaka bisika ya kunanguka yina tata na yandi Ezekiasi fwaka,+ yandi tedimisaka bamesa-kimenga sambu na Baale mpi salaka nti ya santu,*+ kaka mutindu Ahabi ntotila ya Izraele salaka.+ Mpi yandi fukiminaka makesa yonso ya zulu mpi sadilaka yo.+ 4 Yandi tungaka mpi bamesa-kimenga na nzo ya Yehowa,+ yina Yehowa tubaka sambu na yo nde: “Mono ta tula zina na mono na Yeruzalemi.”+ 5 Yandi tungilaka makesa yonso ya zulu+ bamesa-kimenga na bibansala zole ya nzo ya Yehowa.+ 6 Mpi yandi yokaka* mwana na yandi na tiya; yandi salaka mazi, yandi sosaka bidimbu ya mambu yina ta kwisa,+ mpi yandi tulaka bantu yina ke solulaka ti bampeve ya bafwa mpi bantu yina ke zabisaka bantu mambu yina ta kumina bo+. Yandi salaka mambu ya mbi na kiteso mosi ya nene na meso ya Yehowa, sambu na kupesa yandi makasi.

7 Yandi tulaka kiteki ya nti ya santu*+ yina yandi salaka na nzo yina Yehowa tubilaka Davidi mpi mwana na yandi Salomo sambu na yo nde: “Na nzo yai mpi na Yeruzalemi, yina mono me sola na kati ya makanda yonso ya Izraele, mono ta tula zina na mono kimakulu.+ 8 Mpi mono ta sala diaka ve ata fioti nde makulu ya Izraele kuyungana-yungana ntama ti insi yina mono pesaka ba-nkaka na bo,+ kana bo zitisa mbote-mbote mambu yonso yina mono songaka bo,+ Nsiku yonso yina nsadi na mono Moize songaka bo na kulanda.” 9 Kansi bo lemfukaka ve, mpi Manase landaka kuvidisa bo nzila, yandi pusaka bo na kusala mambu ya mbi ya nene kuluta makanda yina Yehowa manisaka na ntwala ya bantu ya Izraele.+

10 Yehowa landaka kutuba na nzila ya bansadi na yandi bambikudi+ nde: 11 “Manase ntotila ya Yuda salaka mambu yai yonso ya nzanzi; yandi me sala mambu ya mbi kuluta bantu ya Amore yonso+ yina zingaka na ntwala na yandi,+ mpi yandi me pusa Yuda na kusala masumu ti biteki na yandi ya nzanzi.* 12 Yo yina Yehowa Nzambi ya Izraele me tuba nde: ‘Mono ke nata mpasi mosi na Yeruzalemi+ mpi na Yuda, ebuna konso muntu yina ta wa yo, makutu na yandi yonso zole ta wa mpasi.+ 13 Mpi mono ta tandula na zulu ya Yeruzalemi nsinga ya kutesila+ yina bo sadilaka sambu na Samaria+ mpi mono ta sadila nivo* yina bo sadilaka sambu na nzo ya Ahabi;+ mono ta yobisa Yeruzalemi, kaka mutindu bo ke yobisaka bolo, ke dipaka yo mpi ke balulaka yo munoko na nsi.+ 14 Mono ta yambula bantu ya dikabu+ na mono yina me bikala mpi mono ta pesa bo na maboko ya bambeni na bo, mpi bo ta kuma bima ya kuyiba mpi bima ya kubotula sambu na bambeni na bo yonso,+ 15 sambu bo salaka mambu ya mbi na meso na mono mpi bo vandaka kupesa mono makasi mbala na mbala yantika kilumbu yina ba-nkaka na bo basikaka na Ezipte tii bubu yai.’”+

16 Manase tiamunaka mpi menga mingi kibeni ya bantu yina salaka mbi ve tii kuna yandi fulusaka Yeruzalemi yantika na nsongi mosi tii na nsongi ya nkaka,+ katula disumu yina yandi salaka na mutindu yandi pusaka Yuda na kusala disumu mpi kusala mambu ya mbi na meso ya Yehowa. 17 Sambu na mambu ya nkaka ya Manase salaka, yonso yina yandi salaka, mpi masumu yina yandi salaka, keti bo me sonikaka yo ve na mukanda ya bansangu ya bantotila ya Yuda? 18 Ebuna Manase lalaka sambu na kupema ti ba-nkaka na yandi mpi bo zikaka yandi na kilanga ya nzo na yandi, na kilanga ya Uza;+ ebuna mwana na yandi Amone kumaka ntotila na kisika na yandi.

19 Amone+ vandaka ti bamvula 22 ntangu yandi kumaka ntotila, mpi yandi yalaka bamvula zole na Yeruzalemi.+ Zina ya mama na yandi Meshulemeti mwana ya Arusi muntu ya Yotba. 20 Yandi landaka kusala mambu ya mbi na meso ya Yehowa, kaka mutindu tata na yandi Manase salaka.+ 21 Yandi landaka kutambula na banzila yonso yina tata na yandi tambulaka, mpi yandi landaka kusadila mpi kufukimina biteki ya nzanzi yina tata na yandi sadilaka.+ 22 Na mutindu yina, yandi yambulaka Yehowa Nzambi ya ba-nkaka na yandi, mpi yandi tambulaka ve na nzila ya Yehowa.+ 23 Nsuka-nsuka bansadi ya Amone sadilaka yandi komplo mpi bo fwaka ntotila na nzo na yandi. 24 Kansi bantu ya insi yina fwaka bantu yonso yina sadilaka ntotila Amone komplo, ebuna bo tulaka mwana na yandi Yoziasi ntotila na kisika na yandi.+ 25 Sambu na mambu ya nkaka ya Amone salaka, mambu yina yandi salaka, keti bo me sonikaka yo ve na mukanda ya bansangu ya bantotila ya Yuda? 26 Bo zikaka yandi na maziamu na yandi na kilanga ya Uza,+ ebuna mwana na yandi Yoziasi+ kumaka ntotila na kisika na yandi.