Yeremia

36 Na mvula ya iya ya Yehoyakimi+ mwana ya Yoziasi, ntotila ya Yuda, yai mambu yina katukaka na Yehowa mpi kwisilaka Yeremia: 2 “Baka rulo* mosi mpi sonika na zulu na yo mambu yonso yina mono tubilaka nge sambu na Izraele, Yuda,+ mpi makanda yonso,+ katuka na kilumbu ya ntete yina mono tubilaka nge na bilumbu ya Yoziasi tii bubu yai.+ 3 Mbala ya nkaka ntangu bantu ya nzo ya Yuda ta wa bampasi yonso yina mono ke kana kunatila bo, bo lenda yambula banzila na bo ya mbi, sambu mono lolula kifu na bo mpi disumu na bo.”+

4 Ebuna Yeremia bingaka Baruki+ mwana ya Neria, mpi Yeremia songaka yandi mambu yonso yina Yehowa tubilaka yandi, mpi Baruki sonikaka yo na rulo*+ yina. 5 Na nima, Yeremia songaka Baruki nde: “Bo me kanga mono mpi mono lenda kota ve na nzo ya Yehowa. 6 Yo yina, nge muntu fwete kota mpi kutanga na ndinga ya ngolo mambu ya Yehowa yina kele na rulo yina nge sonikaka mambu yina mono songaka nge. Tanga yo na makutu ya bantu na nzo ya Yehowa na kilumbu ya kubuya madia; mpidina nge ta tangila yo bantu yonso ya Yuda yina ke katuka na bambanza na bo mpi ke kwisa kukota. 7 Mbala ya nkaka mambu ya bo ke lomba sambu yandi wila bo mawa ta kumina Yehowa, mpi konso muntu na kati na bo ta yambula banzila na yandi ya mbi, sambu makasi mpi nganzi yina Yehowa me wila bantu yai kele mingi.”

8 Yo yina, Baruki mwana ya Neria salaka mambu yonso yina mbikudi Yeremia songaka yandi; yandi tangaka na ndinga ya ngolo mambu ya Yehowa yina vandaka na rulo* yina, na nzo ya Yehowa.+

9 Kansi na mvula ya tanu ya Yehoyakimi+ mwana ya Yoziasi, ntotila ya Yuda, na ngonda ya uvwa, bantu yonso yina vandaka na Yeruzalemi mpi bantu yonso yina katukaka na bambanza ya Yuda mpi kwisaka na Yeruzalemi, tubaka nde bo buya madia na ntwala ya Yehowa.+ 10 Ebuna Baruki tangaka na ndinga ya ngolo mambu ya Yehowa yina vandaka na rulo* yina na nzo ya Yehowa, na suku* ya Gemaria+ mwana ya Shafani,+ kalaki ya mikanda,* na kibansala ya zulu, na munoko ya kielo ya mpa ya nzo ya Yehowa,+ na makutu ya bantu yonso.

11 Ntangu Mikaya mwana ya Gemaria mwana ya Shafani waka mambu yonso ya Yehowa tubaka yina vandaka na rulo* yina, 12 yandi kwendaka na nzo ya ntotila, na suku ya sekretere. Bamfumu yonso* vandaka kuna: sekretere Elishama,+ Delaya mwana ya Shemaya, Elnatani+ mwana ya Akbore,+ Gemaria mwana ya Shafani, Sidikiya mwana ya Hanania, mpi bamfumu yonso ya nkaka. 13 Mikaya songaka bo mambu yonso yina yandi waka ntangu Baruki tangaka rulo* na makutu ya bantu.

14 Ebuna bamfumu yonso tindaka Yehudi mwana ya Netania mwana ya Shelemia mwana ya Kushi na Baruki; bo tubaka nde: “Kwisa mpi nata rulo yina nge tangaka na makutu ya bantu.” Baruki mwana ya Neria bakaka rulo yina na diboko na yandi mpi kwendaka kisika bo vandaka. 15 Bo tubilaka yandi nde: “Pardo, vanda mpi tangila beto yo na ndinga ya ngolo.” Ebuna Baruki tangilaka bo yo.

16 Ntangu bo waka mambu yina yonso, bo talanaka na boma ya ngolo, mpi bo tubilaka Baruki nde: “Beto fwete zabisa kibeni ntotila mambu yai yonso.” 17 Ebuna bo yulaka Baruki nde: “Pardo songa beto, nki mutindu nge sonikaka mambu yai yonso. Keti yandi vandaka kutuba ebuna nge ke sonika?” 18 Baruki vutudilaka bo nde: “Yandi tubilaka mono mambu yai yonso, ebuna mono sonikaka yo ti tinta na rulo* yai.” 19 Bamfumu tubilaka Baruki nde: “Kwenda mpi beno bumbana, nge ti Yeremia, mpi beno bika ve nde muntu kuzaba kisika beno kele.”+

20 Ebuna bo kwendaka kisika ntotila vandaka, na kibansala, mpi bo tululaka rulo yina na suku ya sekretere Elishama, mpi bo songaka ntotila mambu yonso ya bo waka.

21 Yo yina, ntotila tindaka Yehudi+ na kubaka rulo yina, ebuna yandi kwendaka kubaka yo na suku ya sekretere Elishama mpi nataka yo. Yehudi yantikaka kutanga yo na makutu ya ntotila mpi ya bamfumu yonso yina telamaka pene-pene ya ntotila. 22 Ntotila vandaka na nzo ya nsungi ya madidi, na ngonda ya uvwa,* mpi tiya vandaka kupela na mbabula na ntwala na yandi. 23 Ntangu Yehudi vandaka kumanisa kutanga bandonga tatu to iya, ntotila vandaka kuzenga kitini yina ti mbele ya sekretere mpi kulosa yo na tiya yina vandaka kupela na mbabula, tii kuna rulo ya mvimba manaka na tiya yina vandaka na mbabula. 24 Kansi bo waka ve boma ya ngolo; yo vanda ntotila to bansadi na yandi yonso yina waka mambu yai yonso, bo pasulaka ve bilele na bo. 25 Ata Elnatani,+ Delaya,+ mpi Gemaria+ bondilaka ntotila na kuyoka ve rulo yina, yandi wilaka bo ve. 26 Diaka, ntotila songaka Yerameele mwana ya ntotila, Seraya mwana ya Azriele, mpi Shelemia mwana ya Abdeele na kukanga sekretere Baruki mpi mbikudi Yeremia, kansi Yehowa bumbaka bo.+

27 Ebuna ndinga ya Yehowa kwisilaka diaka Yeremia ntangu ntotila manisaka kuyoka rulo yina vandaka ti mambu yina Yeremia tubaka+ yina Baruki sonikaka: 28 “Baka rulo ya nkaka mpi sonika na zulu na yo mambu yonso yina vandaka na rulo ya ntete, yina ntotila Yehoyakimi ya Yuda yokaka na tiya.+ 29 Mpi nge fwete tubila Yehoyakimi ntotila ya Yuda nde, ‘Yehowa ke tuba nde: “Nge me yoka rulo yai na tiya mpi nge me tuba nde, ‘Sambu na nki nge me sonika na zulu na yo nde: “Ntotila ya Babilone ta kwisa kibeni mpi ta fwa insi yai mpi ta bikisa yo mpamba, kukonda muntu mpi mbisi”?’+ 30 Yo yina, Yehowa ke tubila Yehoyakimi ntotila ya Yuda nde, ‘Yandi ta vanda ve ti muntu sambu na kuvanda na kiti ya kimfumu ya Davidi,+ mpi bo ta bikisa mvumbi na yandi na nsi ya ntangu na mwini mpi na nsi ya madidi na mpimpa.+ 31 Mono ta sambisa yandi, bana* na yandi, mpi bansadi na yandi sambu na kifu na bo, mpi mono ta natila bo, bantu ya Yeruzalemi, mpi bantu ya Yuda bampasi yonso yina mono tubaka sambu na bo,+ kansi bo waka ve.’”’”+

32 Ebuna Yeremia bakaka rulo ya nkaka mpi pesaka yo na Baruki mwana ya Neria, sekretere,+ mpi Yeremia vandaka kutuba ebuna yandi sonikaka na kati na yo mambu yonso yina vandaka na rulo* yina Yehoyakimi ntotila ya Yuda yokaka na tiya.+ Mpi bo yikaka mambu mingi ya nkaka ya mutindu mosi.