Ezekiele

11 Ebuna mpeve mosi tombulaka mono mpi nataka mono na kielo ya esti ya nzo ya Yehowa, kielo yina ke tala na ndambu ya esti.+ Kuna na munoko ya kielo, mono monaka babakala 25, mpi Yaazania mwana ya Azure, ti Pelatia mwana ya Benaya, bamfumu ya bantu,+ vandaka na kati na bo. 2 Ebuna Nzambi tubilaka mono nde: “Mwana ya muntu, bantu yai kele bantu yina ke kana mambu ya mbi mpi ke pesa bandongisila ya mbi na* mbanza yai. 3 Bo ke tuba nde, ‘Keti yo kele ve ntangu ya kutunga banzo?+ Mbanza* kele nzungu ya kulambila,*+ mpi beto kele misuni.’

4 “Yo yina, bikula sambu na bo. Mwana ya muntu, bikula.”+

5 Ebuna mpeve ya Yehowa kwisaka na zulu na mono,+ mpi Nzambi tubilaka mono nde: “Tuba nde, ‘Yehowa me tuba nde: “O nzo ya Izraele, mambu ya beno me tuba kele mbote, mpi mono me zaba mambu ya beno ke yindula.* 6 Beno me sala nde bantu mingi kufwa na mbanza yai, mpi beno me fulusa babala-bala na yandi ti bantu ya kufwa.”’”+ 7 “Yo yina, Yehowa Mfumu ya Kuluta Nene me tuba nde: ‘Bamvumbi yina beno me panza-panza na mbanza kele misuni, mpi mbanza kele nzungu ya kulambila.+ Kansi beno mosi, bo ta katula beno na kati na yo.’”

8 “‘Beno me wa mbele ya bitumba boma,+ mpi mono ta nata mbele ya bitumba sambu na kunwanisa beno,’ Yehowa Mfumu ya Kuluta Nene muntu me tuba. 9 ‘Mono ta basisa beno na kati na yandi, mono ta pesa beno na maboko ya banzenza mpi mono ta pesa beno ndola.+ 10 Beno ta fwa na mbele ya bitumba.+ Mono ta sambisa beno pene-pene ya ndilu ya Izraele,+ ebuna beno ta zaba nde mono kele Yehowa.+ 11 Mbanza ta vanda ve nzungu ya kulambila sambu na beno, mpi beno ta vanda ve misuni na kati na yo; mono ta sambisa beno pene-pene ya ndilu ya Izraele, 12 ebuna beno ta zaba nde mono kele Yehowa. Sambu beno zitisaka ve bansiku na mono ti balusambisu na mono,+ kansi beno salaka mambu na kuwakana ti balusambisu ya makanda yina kele na nziunga na beno.’”+

13 Kaka na ntangu ya mono manisaka kubikula, Pelatia mwana ya Benaya fwaka, ebuna mono fukamaka luse na ntoto mpi tubaka na ndinga ya ngolo nde: “O Yehowa Mfumu ya Kuluta Nene, mawa! Keti nge ta manisa bantu ya Izraele yina me bikala?”+

14 Ndinga ya Yehowa kwisilaka mono diaka nde: 15 “Mwana ya muntu, bantu ya Yeruzalemi me songa bampangi na nge, bayina kele ti nswa ya kusumba diaka, kumosi ti nzo ya mvimba ya Izraele, nde, ‘Beno vanda ntama ti Yehowa. Insi yai kele ya beto; bo me pesaka beto yo bonso kima na beto.’ 16 Yo yina tuba nde, ‘Yehowa Mfumu ya Kuluta Nene me tuba nde: “Ata mono me katula bo mpi me nata bo ntama ti makanda mpi mono me panza-panza bo na kati ya bansi,+ mono ta kuma sambu na bo kisika mosi ya santu sambu na mwa ntangu na bansi yina bo me kwenda.”’+

17 “Yo yina tuba nde, ‘Yehowa Mfumu ya Kuluta Nene me tuba nde: “Mono ta baka beno mpi na kati ya bantu, mono ta katula beno na bansi yina beno panzanaka mpi ta vukisa beno, ebuna mono ta pesa beno insi ya Izraele.+ 18 Bo ta vutuka kuna mpi ta katula bima na yo yonso ya nzanzi mpi mambu na yo yonso ya mbi na kati na yo.+ 19 Ebuna mono ta pesa bo ntima yina kele na bumosi,*+ mpi mono ta tula mpeve mosi ya mpa na kati na bo;+ mono ta katula ntima ya ditadi na nitu na bo+ mpi ta pesa bo ntima ya nsuni,*+ 20 sambu bo landa bansiku na mono, bo zitisa balusambisu na mono, mpi bo lemfukila yo. Ebuna bo ta vanda bantu na mono, mpi mono ta vanda Nzambi na bo.”’

21 “‘“Kansi sambu na bantu yina ntima na bo kele kaka ti lukanu ya kulanda bima na bo ya nzanzi mpi mambu na bo ya mbi, mono ta sala nde bo buka mbuma ya banzila na bo,” Yehowa Mfumu ya Kuluta Nene muntu me tuba.’”

22 Ntangu yai basherube tedimisaka mapapu na bo, mpi makulu vandaka pene-pene na bo,+ mpi nkembo ya Nzambi ya Izraele vandaka na zulu na bo.+ 23 Ebuna nkembo ya Yehowa+ katukaka na mbanza, yo tombukaka mpi telamaka na zulu ya ngumba na ndambu ya esti ya mbanza.+ 24 Na nima, mpeve mosi tombulaka mono—na nzila ya mbona-meso na nsadisa ya mpeve ya Nzambi—mpi nataka mono na bantu yina bo me nataka na Kaldea. Ebuna mbona-meso yina mono monaka vilaka na ntwala na mono. 25 Mpi mono yantikaka kusonga bantu yina bikisaka insi na bo mambu yonso yina Yehowa monisaka mono.