Yezaya

39 Na ntangu yina, ntotila ya Babilone Merodaki-baladani mwana ya Baladani tindilaka Ezekiasi+ mikanda mpi dikabu, sambu yandi waka nde Ezekiasi belaka mpi belukaka.+ 2 Ezekiasi yambaka bo na kiese* mpi songisaka bo nzo na yandi ya kubumbila bima ya ntalu+—arza, wolo, mafuta ya balsami ti mafuta ya nkaka ya ntalu, binwaninu na yandi yonso, mpi bima yonso yina vandaka na bisika na yandi ya kubumba bimvwama. Kuvandaka ve ata ti kima mosi yina Ezekiasi songisaka bo ve na nzo na yandi* mpi na kimfumu na yandi ya mvimba.

3 Na nima, mbikudi Yezaya kotaka kisika ntotila Ezekiasi vandaka mpi yulaka yandi nde: “Bantu yai me tuba nki, mpi bo me katuka na wapi?” Ezekiasi tubaka nde: “Bo me katuka na insi mosi ya ntama, na Babilone.”+ 4 Na nima yandi yulaka nde: “Inki bo me mona na nzo na nge?”* Ezekiasi vutulaka nde: “Bo me mona bima yonso yina kele na nzo na mono.* Kele ve ata ti kima mosi ya mono me songa bo ve na bisika na mono ya kubumba bimvwama.”

5 Ebuna Yezaya tubilaka Ezekiasi nde: “Wa ndinga ya Yehowa ya makesa, 6 ‘Bilumbu ke kwisa, mpi bima yonso yina kele na nzo na nge* ti bima yonso yina ba-nkaka na nge me bumbaka tii bubu yai bo ta nata yo na Babilone. Ata kima mosi ve ta bikala.’+ Yehowa+ muntu me tuba. 7 ‘Mpi bana na nge ya nkaka ya babakala yina nge ta buta, bo ta baka bo mpi bo ta kuma bakapita na nzo ya ntotila ya Babilone.’”+

8 Ebuna Ezekiasi tubilaka Yezaya nde: “Ndinga ya Yehowa yina nge me tuba kele mbote.” Yandi yikaka nde: “Sambu ngemba mpi lutaninu* ta vanda ntangu mono kele na luzingu.”*+