Ezekiele

20 Na mvula ya nsambwadi, na ngonda ya tanu, na kilumbu ya kumi ya ngonda, bankuluntu ya nkaka ya Izraele kwisaka mpi vandaka na ntwala na mono sambu na kuyula Yehowa. 2 Ebuna ndinga ya Yehowa kwisilaka mono nde: 3 “Mwana ya muntu, solula ti bankuluntu ya Izraele mpi songa bo nde, ‘Yehowa Mfumu ya Kuluta Nene me tuba nde: “Keti beno ke kwisa sambu na kuyula mono? ‘Ya kieleka mutindu mono kele na luzingu, mono ta pesa ve mvutu na bangiufula na beno,’+ Yehowa Mfumu ya Kuluta Nene muntu me tuba.”’

4 “Keti nge me yilama sambu na kusambisa bo?* Mwana ya muntu, keti nge me yilama sambu na kusambisa bo? Zabisa bo mambu ya nzanzi yina ba-nkaka na bo salaka.+ 5 Songa bo nde, ‘Yehowa Mfumu ya Kuluta Nene me tuba nde: “Kilumbu yina mono solaka Izraele,+ mono zengaka mpi kieleka* na bana* ya nzo ya Yakobi, mpi mono salaka nde bo zaba mono na insi ya Ezipte.+ Ee, mono zengaka kieleka na ntwala na bo mpi tubaka nde, ‘Mono kele Yehowa Nzambi na beno.’ 6 Kilumbu yina, mono zengaka kieleka nde mono ta basisa bo na insi ya Ezipte sambu na kunata bo na insi yina mono sosaka* sambu na bo, insi yina mabele ti bwiki kele mingi.+ Yo vandaka insi ya kuluta bansi yonso na kitoko. 7 Ebuna mono tubilaka bo nde, ‘Konso muntu na kati na beno fwete losa bima ya nzanzi yina kele na ntwala na beno; beno kudibebisa ve ti biteki ya nzanzi* ya Ezipte.+ Mono kele Yehowa Nzambi na beno.’+

8 “‘“Kansi, bo kolamaka na mono mpi zolaka ve kuwila mono. Bo losaka ve bima ya nzanzi yina vandaka na ntwala na bo, mpi bo yambulaka ve biteki ya nzanzi ya Ezipte.+ Yo yina mono silaka na kumonisila bo makasi na mono mpi na kuwila bo nganzi na insi ya Ezipte. 9 Kansi mono salaka mambu sambu na zina na mono na mpila nde bo vweza yo ve na ntwala ya makanda yina bo vandaka kuzinga na kati na yo.+ Sambu mono salaka nde bo* zaba mono na ntwala ya makanda yina ntangu mono basisaka bo* na insi ya Ezipte.+ 10 Yo yina mono basisaka bo na insi ya Ezipte mpi twadisaka bo na ntoto-makanga.+

11 “‘“Ebuna mono pesaka bo bansiku na mono mpi mono salaka nde bo zaba bankanu na mono,+ na mpila nde muntu yina ke landa yo kubaka luzingu na nzila na yo.+ 12 Mono pesaka bo+ mpi bisabatu na mono bonso kidimbu na kati na mono ti bo,+ sambu bo zaba nde mono, Yehowa, mono muntu ke santisa bo.

13 “‘“Kansi nzo ya Izraele kolamaka na mono na ntoto-makanga.+ Bo zitisaka ve bansiku na mono mpi bo buyaka bankanu na mono, yina kana muntu kulanda yo, yandi ta baka luzingu na nzila na yo. Bo vwezaka kibeni bisabatu na mono. Yo yina mono silaka na kumonisila bo makasi na mono na ntoto-makanga sambu na kumanisa bo.+ 14 Mono salaka mambu sambu na zina na mono na mpila nde bo vweza yo ve na ntwala ya makanda yina monaka ntangu mono basisaka bo.*+ 15 Mono zengaka mpi kieleka na ntwala na bo na ntoto-makanga nde mono ta nata bo ve na insi yina mono pesaka bo+—insi yina miliki* ti bwiki kele mingi,+ insi ya kuluta bansi yonso na kitoko— 16 sambu bo buyaka bankanu na mono, bo zitisaka ve bansiku na mono, mpi bo vwezaka bisabatu na mono, sambu ntima na bo vandaka kulanda biteki na bo ya nzanzi.+

17 “‘“Kansi mono* wilaka bo mawa, mpi mono fwaka bo ve; mono manisaka bo ve na ntoto-makanga. 18 Mono tubilaka bana na bo na ntoto-makanga+ nde, ‘Beno tambula ve na bansiku ya ba-nkaka na beno,+ beno landa ve balusambisu na bo, mpi beno kudikumisa ve mvindu ti biteki na bo ya nzanzi. 19 Mono kele Yehowa Nzambi na beno. Beno zitisa bansiku na mono, beno landa bankanu na mono, mpi beno zitisa yo.+ 20 Beno santisa bisabatu na mono,+ ebuna yo ta vanda bonso kidimbu na kati na mono ti beno sambu beno zaba nde mono kele Yehowa Nzambi na beno.’+

21 “‘“Kansi bana yina yantikaka kukolama na mono.+ Bo zitisaka ve bansiku na mono mpi bo landaka ve mpi zitisaka ve bankanu na mono, yina kana muntu kulanda yo, yandi ta baka luzingu na nzila na yo. Bo vwezaka bisabatu na mono. Yo yina mono silaka na kumonisila bo makasi na mono mpi na kuwila bo kibeni nganzi na ntoto-makanga.+ 22 Kansi mono buyaka kusala yo+ mpi salaka mambu sambu na zina na mono,+ na mpila nde bo vweza yo ve na ntwala ya makanda yina mono basisaka bo* na meso na bo. 23 Diaka, mono zengaka kieleka na ntwala na bo na ntoto-makanga nde mono ta panza bo na kati ya makanda mpi na kati ya bansi,+ 24 sambu bo zitisaka ve bankanu na mono, bo buyaka bansiku na mono,+ bo vwezaka bisabatu na mono, mpi bo landaka* biteki ya nzanzi ya ba-nkaka na bo.+ 25 Mono pesaka bo mpi nzila ya kulanda bansiku yina vandaka ve mbote mpi bankanu yina bo lendaka ve kubaka luzingu na nzila na yo.+ 26 Mono bikaka nde bo kuma mvindu na nzila ya bimenga na bo mosi—ntangu bo yokaka* konso mwana ya ntete na tiya+—sambu na kufwa bo, mpidina bo zolaka kuzaba nde mono kele Yehowa.”’

27 “Yo yina, O mwana ya muntu, tubila nzo ya Izraele mpi songa bo nde, ‘Yehowa Mfumu ya Kuluta Nene me tuba nde: “Na mutindu yai mpi, ba-nkaka na beno vwezaka mono na mutindu bo sadilaka mono mambu kukonda kwikama. 28 Mono nataka bo na insi yina mono zengaka kieleka na kupesa bo.+ Ntangu bo monaka bangumba yonso ya fioti ya kunanguka ti banti yina kele ti matiti mingi,+ bo yantikaka kupesa bimenga na bo mpi makabu na bo ya mbi. Bo pesaka bimenga na bo ya nsudi ya kitoko* mpi tiamunaka makabu na bo ya malafu kuna. 29 Yo yina mono yulaka bo nde, ‘Kisika ya kunanguka yina beno ke kwenda ke tendula nki? (Tii bubu yai, bo ke bingaka yo kaka Kisika ya Kunanguka.)’”’+

30 “Ntangu yai, tubila nzo ya Izraele nde, ‘Yehowa Mfumu ya Kuluta Nene me tuba nde: “Keti beno ke kudikumisa mvindu mutindu ba-nkaka na beno kudikumisaka mvindu ntangu bo landaka biteki na bo ya nzanzi sambu na kusala kindumba ya kimpeve ti bo?+ 31 Keti beno ke kudikumisa kaka mvindu tii bubu yai na mutindu beno ke pesa bimenga na biteki na beno yonso ya nzanzi, na ntangu beno ke yoka* bana na beno na tiya?+ O nzo ya Izraele, keti na ntangu yina mosi mono fwete pesa bamvutu na bangiufula na beno?”’+

“‘Ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘Mono ta pesa ve mvutu na bangiufula na beno.+ 32 Mpi mambu yina beno kele na yo na mabanza* ntangu beno ke tuba nde, “Bika beto kuma bonso makanda, bonso mabuta ya bansi ya nkaka, yina ke sambilaka* nti mpi ditadi,”+ yo ta salama ve ata fioti.’”

33 “‘Ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘mono ta yala beno ti diboko ya ngolo mpi ya kutandula, mpi mono ta wila beno makasi.+ 34 Mono ta katula beno na kati ya bantu mpi ta basisa beno, ebuna mono ta basisa beno na bansi yina beno panzanaka mpi ta vukisa beno ti diboko ya ngolo mpi ya kutandula, mpi ti makasi ya ke tiamuka.+ 35 Mono ta nata beno na ntoto-makanga ya bantu mpi ta samba ti beno kuna meso na meso.+

36 “‘Kaka mutindu mono sambaka ti ba-nkaka na beno na ntoto-makanga ya insi ya Ezipte, mutindu mosi mpi mono ta samba ti beno mutindu yina,’ Yehowa Mfumu ya Kuluta Nene muntu me tuba. 37 ‘Mono ta sala nde beno luta na nsi ya nti ya ngungudi+ mpi mono ta tula beno na nsi ya nsiku* ya kuwakana. 38 Kansi mono ta katula bankolami na kati na beno mpi bantu yina ke fwa nsiku na mono.+ Mono ta basisa bo na insi ya bo ke zinga bonso banzenza, kansi bo ta kota ve na insi ya Izraele;+ ebuna beno ta zaba nde mono kele Yehowa.’

39 “Kansi sambu na beno, O nzo ya Izraele, Yehowa Mfumu ya Kuluta Nene me tuba nde: ‘Konso muntu na kati na beno kukwenda mpi kusadila biteki na yandi ya nzanzi.+ Kansi na nima, kana beno wila mono ve, beno ta kuka diaka ve kuvweza zina na mono ya santu na nzila ya bimenga na beno mpi ya biteki na beno ya nzanzi.’+

40 “‘Sambu na ngumba na mono ya santu, na ngumba ya nda ya Izraele,’+ Yehowa Mfumu ya Kuluta Nene muntu me tuba, ‘kuna nzo ya mvimba ya Izraele, bo yonso, ta sadila mono na insi yina.+ Kuna mono ta wa kiese sambu na bo, mpi mono ta lomba makabu na beno mpi bambuma ya ntete ya makabu na beno, bima na beno yonso ya santu.+ 41 Sambu na nsudi yina ya kitoko,* mono ta wa kiese sambu na beno ntangu mono ta katula beno na kati ya bantu mpi ta basisa beno, mpi ta vukisa beno na bansi yina beno panzanaka mpi ta vukisa beno;+ ebuna bo ta santisa mono na kati na beno, na meso ya makanda.’+

42 “‘Beno ta zaba nde mono kele Yehowa+ ntangu mono ta nata beno na insi ya Izraele,+ na insi yina mono zengaka kieleka na kupesa na ba-nkaka na beno. 43 Mpi kuna beno ta yibuka bikalulu na beno mpi bisalu na beno yonso yina beno kudikumisaka mvindu na nzila na yo,+ mpi beno ta kudimenga* sambu na mambu yonso ya mbi yina beno salaka.+ 44 Ebuna beno ta zaba nde mono kele Yehowa ntangu mono ta sadila beno mambu sambu na zina na mono,+ kansi ve na kutadila bikalulu na beno ya mbi to mambu na beno ya mbi, O nzo ya Izraele,’ Yehowa Mfumu ya Kuluta Nene muntu me tuba.”

45 Ndinga ya Yehowa kwisilaka mono diaka nde: 46 “Mwana ya muntu, balula luse na nge na ndambu ya sudi mpi samuna na ndambu ya sudi, mpi bikula sambu na mfinda yina kele na ntoto ya sudi. 47 Tubila mfinda ya sudi nde, ‘Wa ndinga ya Yehowa. Yehowa Mfumu ya Kuluta Nene me tuba nde: “Tala, mono ke tula tiya sambu yo yoka nge,+ mpi yo ta yoka konso nti ya mubisu mpi konso nti ya kuyuma yina kele na kati na nge. Ludimi ya tiya yina ke pela ta fwa ve,+ mpi yo ta zikisa konso luse, katuka na sudi tii na nordi. 48 Mpi bantu* yonso ta mona nde mono, Yehowa, mono me tula yo tiya, mpidina bo ta fwa yo ve.”’”+

49 Ebuna mono tubaka nde: “O Yehowa Mfumu ya Kuluta Nene! Bo ke tuba sambu na mono nde, ‘Keti yandi ke tuba ve na bingana mpamba?’”*