Ezekiele

44 Yandi vutulaka mono na kielo ya nganda ya kisika ya santu yina ke tala na ndambu ya esti,+ mpi yo vandaka ya kukanga.+ 2 Ebuna Yehowa tubilaka mono nde: “Kielo yai ta bikala ya kukanga. Bo fwete kangula yo ve, mpi ata muntu mosi ve ta kotila na kielo yina; sambu Yehowa, Nzambi ya Izraele, kotilaka na kielo yina,+ yo fwete bikala ya kukanga. 3 Kansi mfumu ta vanda na kati na yo sambu na kudia dimpa na ntwala ya Yehowa,+ sambu yandi kele mfumu. Yandi ta kotila na nzila ya kisika ya kukotila ya kielo, mpi yandi ta basikila na nzila na yo.”+

4 Ebuna yandi nataka mono na ntwala ya tempelo na nzila ya kielo ya nordi. Ntangu mono talaka, mono monaka nde nkembo ya Yehowa fulukaka na tempelo ya Yehowa.+ Ebuna mono bwaka luse na ntoto.+ 5 Na nima, Yehowa tubilaka mono nde: “Mwana ya muntu, tula dikebi,* tala, mpi wa mbote-mbote mambu yonso ya mono ke songa nge na yina me tala bansiku ya kusonika mpi bansiku ya tempelo ya Yehowa. Tula dikebi mbote-mbote na nzila ya kukotila ya tempelo mpi na bisika yonso ya kubasikila ya kisika ya santu.+ 6 Nge fwete tubila nzo ya Izraele ya me kolamaka nde, ‘Yehowa Mfumu ya Kuluta Nene me tuba nde: “O nzo ya Izraele, mambu na beno ya mbi me lutana mingi. 7 Ntangu beno ke kotisa banzenza yina kele ve ya kuyotisa na ntima mpi na nsuni na kisika na mono ya santu, bo ke vweza tempelo na mono. Beno ke pesa dimpa na mono, mbisi ya mafuta-mafuta, mpi menga, kansi na ntangu yina mosi beno ke fwa kuwakana na mono sambu na mambu na beno yonso ya mbi. 8 Beno me keba ve bima na mono ya santu.+ Kansi beno me tula bantu ya nkaka na kusala bisalu na kisika na mono ya santu.”’

9 “‘Yehowa Mfumu ya Kuluta Nene me tuba nde: “Ata munzenza mosi ve ya ke zingaka na Izraele yina kele ve ya kuyotisa na ntima mpi na nsuni lenda kota na kisika na mono ya santu.”’

10 “‘Kansi Balevi yina yambulaka mono+ mpi kwendaka ntama ntangu Izraele yambulaka mono sambu na kulanda biteki na bo ya nzanzi* ta buka mbuma ya kifu na bo. 11 Bo ta kuma bansadi na kati ya kisika na mono ya santu sambu na kukengila bakielo ya tempelo+ mpi kusala na tempelo. Bo ta fwa dikabu ya mvimba ya kuyoka mpi kimenga sambu na bantu, mpi bo ta telama na ntwala ya bantu sambu na kusadila bo kisalu. 12 Sambu bo sadilaka bo na meso ya biteki na bo ya nzanzi mpi kumaka kima ya ke budisa sakuba yina ke sala nde nzo ya Izraele kusala disumu,+ mono me nangula diboko na mono mpi ke dia ndefi sambu na kupesa bo ndola,’ Yehowa Mfumu ya Kuluta Nene muntu me tuba, ‘ebuna bo ta buka mbuma ya kifu na bo. 13 Bo ta pusana ve pene-pene na mono sambu na kuvanda banganga-nzambi na mono to ta pusana ve pene-pene ya bima na mono ya santu to ya kuluta santu, mpi bo ta wa nsoni sambu na mambu ya nzanzi yina bo salaka. 14 Kansi mono ta kumisa bo bantu ya ke lungisaka mikumba ya tempelo, sambu na kusala kisalu na yo mpi mambu yonso yina fwete salama na kati na yo.’+

15 “‘Na yina me tala banganga-nzambi yina kele Balevi, bana ya Zadoki,+ bayina vandaka kulungisa mikumba ya kisika na mono ya santu ntangu bantu ya Izraele yambulaka mono,+ bo ta pusana pene-pene na mono sambu na kusadila mono kisalu, mpi bo ta telama na ntwala na mono sambu na kupesa mono bambisi ya mafuta-mafuta+ mpi menga,’+ Yehowa Mfumu ya Kuluta Nene muntu me tuba. 16 ‘Bo bantu ta kota na kisika na mono ya santu, bo ta pusana pene-pene ya mesa na mono sambu na kusadila mono kisalu,+ mpi bo ta lungisa mikumba na bo sambu na mono.+

17 “‘Ntangu bo ke kwisa kukota na bakielo ya kibansala ya kati, bo fwete lwata bilele ya lino.+ Bo fwete lwata ve lene yo vanda ya inki mutindu ntangu bo ke sala kisalu na bakielo ya kibansala ya kati to na kati na yo. 18 Bo fwete lwata batirbani ya lino na ba-ntu na bo mpi bakupe ya nda ya lino.+ Bo fwete lwata ve konso kima yina ta sala nde bo toka. 19 Na ntwala nde bo basika na kibansala ya nganda—kibansala ya nganda kisika yina bantu kele—bo fwete katula bilele yina bo vandaka kusadila kisalu+ na kati mpi kutula yo na basuku ya santu ya kudila madia.*+ Na nima bo ta lwata bilele ya nkaka, mpidina bo ta lutisa ve busantu na* bantu na nzila ya bilele na bo. 20 Bo fwete kulula ve nsuki na bo+ to kubika nde nsuki ya ntu na bo kukuma nda. Bo fwete zenga nsuki ya ntu na bo. 21 Banganga-nzambi fwete nwa ve vinu ntangu bo ke kota na kibansala ya kati.+ 22 Bo fwete kwela ve mufwidi ya nkento to nkento yina makwela me fwaka;+ kansi bo lenda kwela mwense mosi na kati ya bana ya Izraele to nkento ya nganga-nzambi yina me fwaka.’+

23 “‘Bo fwete longa bantu na mono luswaswanu na kati ya kima yina kele ya santu ti kima yina kele ya bantu yonso; mpi bo ta longa bo luswaswanu na kati ya kima yina kele mvindu ti yina kele bunkete.+ 24 Bo fwete vanda bazuzi na mambu ya bantu;+ bo fwete sambisa yo na kuwakana ti bankanu na mono.+ Bo fwete zitisa bansiku na mono ti bansiku na mono ya kusonika na yina me tala bankinsi na mono+ yonso mpi kusantisa bisabatu na mono. 25 Bo fwete pusana ve pene-pene ya muntu ya kufwa, kana ve bo ta kuma mvindu. Kansi, bo lenda kudikumisa mvindu sambu na tata na bo, mama, mwana-bakala, mwana-nkento, mpangi-bakala, to mpangi-nkento yina me kwelaka ntete ve.+ 26 Mpi kana nganga-nzambi kumanisa na kudikumisa bunkete, bo fwete tangila yandi bilumbu nsambwadi. 27 Kilumbu yina yandi ta kota na kisika ya santu, na kibansala ya kati, sambu na kusala kisalu na kisika ya santu, yandi fwete pesa dikabu na yandi sambu na disumu,’+ Yehowa Mfumu ya Kuluta Nene muntu me tuba.

28 “‘Dikabu na bo ta vanda yai: Mono kele dikabu na bo.+ Beno fwete pesa bo ve ata dikabu mosi na Izraele, sambu mono kele dikabu na bo. 29 Bo bantu ta dia dikabu ya mbuma,+ dikabu sambu na disumu,+ mpi dikabu sambu na makambu, ebuna konso kima ya bo me tula na lweka sambu na lukanu ya santu na Izraele ta kuma ya bo.+ 30 Bambuma yonso ya ntete ya kuyela ya kuluta kitoko mpi makabu ya mitindu yonso yina beno ta pesa ta vanda ya banganga-nzambi.+ Mpi beno fwete pesa nganga-nzambi fufu ya ntete ya bambuma na beno ya ntete.+ Yo ta sala nde lusakumunu kubikala na bantu ya nzo na nge.+ 31 Banganga-nzambi fwete dia ve konso ndeke to mbisi yina bo me kuta ya kufwa to yina bo me zenga-zenga bitini-bitini.’+