2 Bantotila

13 Na mvula ya 23 ya Yehoashi+ mwana ya Ahazia+ ntotila ya Yuda, Yehoahazi mwana ya Yehu+ kumaka ntotila ya Izraele na Samaria, mpi yandi yalaka bamvula 17. 2 Yandi landaka kusala mambu ya mbi na meso ya Yehowa, mpi yandi landaka kusala disumu yina Yeroboami mwana ya Nebati pusaka Izraele na kusala.+ Yandi yambulaka yo ve. 3 Yo yina Yehowa wilaka Izraele+ makasi+ ya ngolo, mpi yandi pesaka bo na maboko ya Azaele+ ntotila ya Siria mpi na maboko ya Bene-adadi+ mwana ya Azaele na bilumbu yina yonso.

4 Na nima, Yehoahazi bondilaka* Yehowa sambu yandi ndima yandi, mpi Yehowa wilaka yandi, sambu yandi monaka mutindu ntotila ya Siria vandaka kuniokula Izraele.+ 5 Yo yina Yehowa pesaka Izraele ngulusi+ sambu na kukatula bo na kiyeka ya Siria, ebuna bantu ya Izraele kumaka kuzinga diaka na banzo na bo bonso na ntangu ya ntama.* 6 (Kansi, bo yambulaka ve disumu ya nzo ya Yeroboami yina yandi pusaka Izraele na kusala.+ Bo landaka kusala disumu yai,* mpi nti ya santu*+ vandaka kaka ya kutelama na Samaria.) 7 Yehoahazi bikalaka kaka ti basoda yai: bantu 50 yina ke tambusaka bampunda, bapusu-pusu 10, mpi basoda 10 000 ya ke tambulaka na makulu, sambu ntotila ya Siria fwaka bo,+ yandi niata-niataka bo bonso mfututu na ntangu ya kututa bambuma sambu na kukatula yo bampusu.+

8 Sambu na mambu ya nkaka ya Yehoahazi salaka, yonso yina yandi salaka mpi ngolo na yandi, keti bo me sonikaka yo ve na mukanda ya bansangu ya bantotila ya Izraele? 9 Ebuna Yehoahazi lalaka sambu na kupema ti ba-nkaka na yandi, mpi bo zikaka yandi na Samaria;+ ebuna mwana na yandi Yehoashi kumaka ntotila na kisika na yandi.

10 Na mvula ya 37 ya Yehoashi ntotila ya Yuda, Yehoashi+ mwana ya Yehoahazi kumaka ntotila ya Izraele na Samaria, mpi yandi yalaka bamvula 16. 11 Yandi landaka kusala mambu ya mbi na meso ya Yehowa, mpi yandi yambulaka ve masumu yonso yina Yeroboami mwana ya Nebati bendaka Izraele na kusala.+ Yandi landaka kusala* masumu yai.

12 Sambu na mambu ya nkaka ya Yehoashi salaka, yonso yina yandi salaka, ngolo na yandi, mpi mutindu yandi nwanaka ti Amasia ntotila ya Yuda,+ keti bo me sonikaka yo ve na mukanda ya bansangu ya bantotila ya Izraele? 13 Ebuna Yehoashi lalaka sambu na kupema ti ba-nkaka na yandi, mpi Yeroboami*+ vandaka na kiti na yandi ya kimfumu. Ebuna bo zikaka Yehoashi na Samaria ti bantotila ya Izraele.+

14 Ntangu Elisha+ belaka maladi yina nsuka-nsuka fwaka yandi, Yehoashi ntotila ya Izraele kwisaka kisika yandi vandaka mpi didilaka yandi nde: “Tata na mono, tata na mono! Pusu-pusu ya Izraele mpi bantu na yandi ya ke tambusaka bampunda!”+ 15 Ebuna Elisha tubilaka yandi nde: “Baka munduki ya tolo-tolo ti batolo-tolo.” Ebuna yandi bakaka munduki ya tolo-tolo ti batolo-tolo. 16 Na nima yandi tubilaka ntotila ya Izraele nde: “Tula diboko na nge na munduki ya tolo-tolo.” Yandi tulaka diboko na yandi na munduki yina, na nima Elisha tulaka maboko na yandi na zulu ya maboko ya ntotila. 17 Ebuna yandi tubaka nde: “Kangula nela na ndambu ya esti.” Yandi kangulaka yo. Elisha tubaka nde: “Losa tolo-tolo!” Ebuna yandi losaka yo. Ntangu yai, yandi tubaka nde: “Tolo-tolo ya kununga* ya Yehowa, tolo-tolo ya kununga Siria! Nge ta fwa* Siria na Afeki+ tii kuna nge ta manisa bo.”

18 Yandi tubaka diaka nde: “Baka batolo-tolo,” mpi yandi bakaka yo. Na nima yandi tubilaka ntotila ya Izraele nde: “Bula na ntoto.” Yandi bulaka na ntoto mbala tatu mpi yandi yambulaka. 19 Ebuna muntu ya Nzambi ya kieleka wilaka yandi makasi mpi tubaka nde: “Yo lombaka nde nge bula ntoto mbala tanu to sambanu! Ebuna nge zolaka kubedisa Siria tii kuna nge ta manisa bo, kansi ntangu yai nge ta bedisa Siria kaka mbala tatu.”+

20 Na nima, Elisha fwaka mpi bo zikaka yandi. Kuvandaka ti bimvuka+ ya miyibi ya bantu ya Moabi yina vandaka kukwisa kukota na insi na luyantiku ya mvula.* 21 Ntangu bantu ya nkaka vandaka kuzika muntu mosi, bo monaka kimvuka ya miyibi, yo yina bo losaka muntu yina nswalu na kisika yina bo zikaka Elisha ebuna bo tinaka. Ntangu nitu ya muntu yina simbaka mikwa ya Elisha, yandi vutukaka na luzingu+ mpi yandi telamaka.

22 Azaele+ ntotila ya Siria niokulaka Izraele+ bilumbu yonso ya Yehoahazi. 23 Kansi, Yehowa monisilaka bo ntima ya mbote mpi mawa na kiteso ya mingi,+ mpi yandi kudibanzaka sambu na bo sambu na kuwakana yina yandi salaka ti Abrahami,+ Izaki,+ mpi Yakobi.+ Yandi zolaka ve kufwa bo, mpi yandi me katulaka bo ve na ntwala na yandi tii bubu yai. 24 Ntangu Azaele ntotila ya Siria fwaka, mwana na yandi Bene-adadi kumaka ntotila na kisika na yandi. 25 Ebuna Yehoashi mwana ya Yehoahazi bakaka diaka na maboko ya Bene-adadi mwana ya Azaele bambanza yina yandi botulaka tata na yandi Yehoahazi na bitumba. Yehoashi bedisaka*+ yandi mbala tatu mpi yandi bakaka diaka bambanza ya Izraele.