2 Samuele

11 Na luyantiku ya mvula,* na ntangu yina bantotila ke kwendaka na bitumba, Davidi tindaka Yoabi ti bansadi na yandi mpi basoda yonso ya Izraele sambu na kufwa bantu ya Amoni, mpi bo ziungaka Raba,+ kansi Davidi bikalaka na Yeruzalemi.+

2 Kilumbu mosi na nkokila,* Davidi telamaka na mbeto na yandi mpi vandaka kutambula na zulu ya ludi ya nzo ya ntotila. Kuna na zulu ya ludi, yandi monaka nkento mosi ke yobila, mpi nkento yango vandaka kitoko kibeni. 3 Davidi tindaka muntu sambu na kuzaba kana nkento yina kele nani, mpi muntu yina tubaka nde: “Keti yo kele ve Bat-sheba+ mwana ya Eliami,+ nkento ya Uria+ muntu ya Heti?”+ 4 Na nima, Davidi tindaka binati-nsangu sambu bo kwisa kunata yandi.+ Ebuna nkento yina kwisaka na Davidi mpi yandi lalaka ti nkento yina.+ (Mambu yai salamaka ntangu nkento yina vandaka kudikumisa bunkete na mvindu na yandi.*)+ Na nima, nkento yina vutukaka na nzo na yandi.

5 Nkento yina bakaka divumu, mpi yandi tindilaka Davidi ndinga nde: “Mono kele ti divumu.” 6 Ebuna Davidi tindilaka Yoabi ndinga nde: “Tindila mono Uria muntu ya Heti.” Yo yina Yoabi tindilaka Davidi Uria. 7 Ntangu Uria kwisaka na Davidi, Davidi yulaka yandi kana Yoabi vandaka mbote, kana basoda vandaka mbote, mpi kana bitumba vandaka kuluta mbote. 8 Ebuna Davidi tubilaka Uria nde: “Kulumuka na nzo na nge mpi pema.”* Ntangu Uria katukaka na nzo ya ntotila, bo landisaka yandi dikabu ya luzitu ya ntotila.* 9 Kansi Uria lalaka na munoko ya nzo ya ntotila ti bansadi yonso ya nkaka ya mfumu na yandi, mpi yandi kulumukaka ve na nzo na yandi. 10 Bo songaka Davidi nde: “Uria kulumukaka ve na nzo na yandi.” Ebuna Davidi tubilaka Uria nde: “Keti nge me katuka ve na nzietelo? Sambu na nki nge kulumukaka ve na nzo na nge?” 11 Uria vutudilaka Davidi nde: “Sanduku+ ti Izraele mpi Yuda ke zinga na bisika ya kuzinga ya ntangu fioti, mpi mfumu na mono Yoabi ti bansadi ya mfumu na mono me tula camp na nseke. Ebuna mono, keti mono fwete kwenda na nzo na mono sambu na kudia, kunwa mpi kulala ti nkento na mono?+ Ya kieleka mutindu nge kele na luzingu mpi nge ke zinga,* mono ta sala ve diambu yai!”

12 Ebuna Davidi tubilaka Uria nde: “Bikala diaka awa bubu yai, mpi mbasi mono ta bika nge, nge kwenda.” Yo yina Uria bikalaka na Yeruzalemi kilumbu yina mpi kilumbu yina landaka. 13 Ebuna Davidi tindaka bantu na kubinga yandi na kukwisa kudia mpi kunwa ti yandi, mpi yandi salaka na mpila nde yandi lawuka malafu. Kansi na nkokila, Uria basikaka sambu na kukwenda kulala na mbeto na yandi ti bansadi ya mfumu na yandi, mpi yandi kulumukaka ve na nzo na yandi. 14 Na suka Davidi sonikilaka Yoabi mukanda mpi tindaka yo na maboko ya Uria. 15 Yandi sonikaka na mukanda yina nde: “Beno tula Uria na bandonga ya ntete kisika bitumba kele ngolo kibeni. Ebuna beno bikisa yandi yandi mosi na ntwala, mpidina bo ta bula yandi sambu yandi fwa.”+

16 Yoabi vandaka kutala mbanza mbote-mbote, mpi yandi tulaka Uria kisika yina yandi zabaka nde basoda ya ngolo vandaka. 17 Ntangu bantu ya mbanza basikaka mpi nwanisaka Yoabi, bansadi ya nkaka ya Davidi bwaka, mpi Uria muntu ya Heti vandaka na kati ya bantu yina fwaka.+ 18 Ntangu yai, Yoabi tindilaka Davidi bansangu yonso ya bitumba. 19 Yandi songaka kinati-nsangu nde: “Ntangu nge ta manisa kuzabisa ntotila bansangu yonso ya bitumba, 20 ntotila lenda wa makasi mpi kutubila nge nde, ‘Sambu na nki yo lombaka nde beno kwenda kibeni pene-pene ya mbanza sambu na kunwana? Keti beno zabaka ve nde bo lendaka kulosa batolo-tolo katuka na zulu ya kibaka? 21 Nani fwaka Abimeleki+ mwana ya Yerubesheti?+ Keti yo vandaka ve nkento mosi yina losilaka yandi ditadi ya zulu ya bo ke nikilaka bambuma katuka na zulu ya kibaka, ebuna yo fwaka yandi na Tebesi? Sambu na nki yo lombaka nde beno kwenda pene-pene kibeni ya kibaka?’ Ebuna tuba nde, ‘Nsadi na nge Uria muntu ya Heti fwaka mpi.’”

22 Yo yina kinati-nsangu kwendaka mpi songaka Davidi mambu yonso yina Yoabi tindaka yandi na kutuba. 23 Ebuna kinati-nsangu songaka Davidi nde: “Bantu na bo lutaka beto na ngolo mpi bo basikilaka beto na nseke; kansi beto vutulaka bo nima tii na munoko ya kielo ya mbanza. 24 Bantu ya ke sadilaka munduki ya tolo-tolo vandaka kulosila bansadi na nge batolo-tolo tuka na zulu ya kibaka, mpi bansadi ya nkaka ya ntotila fwaka; nsadi na nge Uria muntu ya Heti fwaka mpi.”+ 25 Yo yina Davidi tubilaka kinati-nsangu nde: “Songa Yoabi nde, ‘Kubika ve nde diambu yai kukumisa nge kisaka-saka, sambu mbele ya bitumba ke fwaka bantu yonso. Kumisa diaka bitumba ngolo na mbanza mpi nunga yo.’+ Pesa yandi kikesa.”

26 Ntangu nkento ya Uria waka nde bakala na yandi Uria me fwa, yandi yantikaka kudila bakala na yandi. 27 Kaka ntangu nsungi ya mafwa manaka, Davidi tindaka bantu na kubaka yandi mpi bo nataka yandi na nzo ya Davidi, ebuna nkento yina kumaka nkento na yandi+ mpi butilaka yandi mwana ya bakala. Kansi diambu yina Davidi salaka sepedisaka ve ata fioti* Yehowa.+