Kusonga

1 Kusonga ya Yezu Kristu, yina Nzambi pesaka yandi,+ sambu na kusonga bampika na yandi+ mambu yina fwete salama ntama mingi ve. Yandi tindaka wanzio na yandi, mpi na nzila na yandi, yandi songaka yo na bidimbu na mpika na yandi Yoane;+ 2 ebuna Yoane taka kimbangi sambu na ndinga yina Nzambi pesaka mpi na kimbangi yina Yezu Kristu taka, ee, na mambu yonso yina yandi monaka. 3 Kiese na muntu yina ke tanga na ndinga ya ngolo mpi na bantu yina ke wa mambu yina kele na mbikudulu yai, mpi yina ke zitisa mambu ya bo me sonika na kati na yo,+ sambu ntangu ya bo me tulaka me finama.

4 Mono Yoane, mono ke sonikila mabundu nsambwadi+ yina kele na provense ya Azia:

Beno vanda ti ntima ya mbote ya nene mpi ngemba ya me katuka na “Muntu yina kele, yina vandaka, mpi yina ke kwisa,”+ mpi na bampeve nsambwadi+ yina kele na ntwala ya kiti na yandi ya kimfumu, 5 mpi na Yezu Kristu, “Mbangi ya Kwikama,”+ “muntu ya ntete yina telamaka na bafwa,”+ mpi “Mfumu ya bantotila ya ntoto.”+

Na muntu yina ke zolaka beto+ mpi yina me katulaka beto na kimpika ya masumu na beto na nsadisa ya menga na yandi+— 6 mpi yandi me salaka nde beto vanda kimfumu,+ banganga-nzambi+ sambu na Nzambi mpi Tata na yandi—ee, nkembo mpi ngolo kuvanda na yandi kimakulu. Amen.

7 Beno tala! Yandi ke kwisa na matuti,+ mpi konso disu ta mona yandi, mpi bantu yina tobulaka yandi; mpi makanda yonso ya ntoto ta kudibula na mawa sambu na yandi.+ Ee, Amen.

8 Yehowa* Nzambi ke tuba nde: “Mono kele Alfa mpi Omega,*+ Muntu yina kele, yina vandaka, mpi yina ke kwisa, Nkwa-Ngolo Yonso.”+

9 Mono Yoane, mpangi na beno mpi muntu yina ke mona mpasi ti beno,+ yina ta baka kimfumu ti beno,+ mpi yina ke kanga ntima ti beno+ na bumosi ti Yezu,+ mono vandaka na kisanga ya bo ke bingaka Patmosi sambu mono vandaka kutuba mambu ya Nzambi mpi kuta kimbangi sambu na Yezu. 10 Na nzila ya mpeve santu, mono kumaka na kilumbu ya Mfumu, mpi mono waka na nima na mono ndinga mosi ya ngolo bonso mpungi 11 nde: “Mambu ya nge ke mona, sonika yo na rulo mpi tinda yo na mabundu nsambwadi: na Efezo,+ na Simirne,+ na Pergame,+ na Tiatira,+ na Sarde,+ na Filadelfia,+ mpi na Laodisea.”+

12 Mono balukaka sambu na kutala muntu yina vandaka kutubila mono, mpi ntangu mono balukaka, mono monaka bima ya wolo nsambwadi ya kutudila minda,+ 13 mpi na kati-kati ya bima ya kutudila minda, mono monaka muntu mosi bonso mwana ya muntu,+ yandi me lwata lele yina kulumukaka tii na makulu mpi mukaba ya wolo na ntulu na yandi. 14 Diaka, ntu na yandi mpi nsuki na yandi vandaka mpembe bonso mika ya mpembe, bonso mvula ya mpembe, mpi meso na yandi vandaka bonso tiya ya ke pela,+ 15 mpi makulu na yandi vandaka bonso kwivre ya bunkete+ ntangu yo ke pela na kati ya fulu ya tiya, mpi ndinga na yandi vandaka bonso makelele ya bamasa mingi. 16 Yandi vandaka ti bambwetete nsambwadi na diboko na yandi ya kitata,+ mpi mbele ya bitumba ya bo me tula makasi, ya nda, mpi ya makasi zole+ vandaka kubasika na munoko na yandi, mpi luse na yandi vandaka bonso ntangu, ntangu yo ke semaka ngolo kibeni.+ 17 Ntangu mono monaka yandi, mono bwaka na makulu na yandi bonso muntu ya kufwa.

Yandi tulaka diboko na yandi ya kitata na zulu na mono mpi tubaka nde: “Kuwa boma ve. Mono kele Muntu ya Ntete+ mpi Muntu ya Nsuka,+ 18 mpi muntu ya moyo;+ mono fwaka,+ kansi mono kele na luzingu mvula na mvula,+ mpi mono kele ti bansapi ya lufwa mpi ya Maziamu.*+ 19 Yo yina, sonika mambu ya nge monaka, mambu yina kele, mpi mambu yina ta salama na nima ya mambu yai. 20 Kinsweki ya santu ya bambwetete nsambwadi ya nge monaka na diboko na mono ya kitata mpi ya bima ya wolo nsambwadi ya kutudila minda, yo yai: Bambwetete nsambwadi ke monisa bawanzio ya mabundu nsambwadi, mpi bima nsambwadi ya kutudila minda ke monisa mabundu nsambwadi.+