2 Bantotila

9 Ebuna mbikudi Elisha bingaka mbikudi mosi na kimvuka ya bambikudi mpi tubilaka yandi nde: “Kanga bilele na nge na luketo, mpi baka nswalu mulangi yai ya mafuta, kwenda na Ramoti-gileadi.+ 2 Ntangu nge ta kuma kuna, sosa Yehu+ mwana ya Yehoshafati mwana ya Nimshi; kota, tedimisa yandi na kati ya bampangi na yandi, mpi nata yandi na suku ya kati kibeni. 3 Ebuna baka mulangi ya mafuta, tiamuna yo na ntu na yandi, mpi tuba nde, ‘Yehowa ke tuba nde: “Mono me tula nge mafuta sambu nge vanda ntotila ya Izraele.”’+ Na nima kangula kielo mpi tina kukonda kusukinina.”

4 Yo yina nsadi ya mbikudi kwendaka na Ramoti-gileadi. 5 Ntangu yandi kumaka, bamfumu ya basoda vandaka pana. Yandi tubaka nde: “Mono kele ti nsangu mosi sambu na nge, O mfumu.” Yehu yulaka nde: “Sambu na nani na kati na beto?” Yandi tubaka nde: “Sambu na nge, O mfumu.” 6 Yo yina Yehu telamaka mpi kotaka na nzo; nsadi yina tiamunaka mafuta na ntu na yandi mpi tubilaka yandi nde, “Yehowa Nzambi ya Izraele ke tuba nde: ‘Mono ke tula nge mafuta sambu nge vanda ntotila ya bantu ya Yehowa, ya Izraele.+ 7 Nge fwete fwa nzo ya mfumu na nge Ahabi, mpi mono ta vutula mbi sambu na menga ya bansadi na mono bambikudi mpi menga ya bansadi ya Yehowa yonso yina fwaka na maboko ya Yezabele.+ 8 Nzo ya mvimba ya Ahabi ta fwa; ebuna mono ta manisa babakala yonso* ya nzo ya Ahabi, ti muntu ya me konda lusadisu mpi ya kele ve ngolo na Izraele.+ 9 Mpi mono ta kumisa nzo ya Ahabi bonso nzo ya Yeroboami+ mwana ya Nebati mpi bonso nzo ya Basha+ mwana ya Ahiya. 10 Kansi Yezabele, bambwa ta dia yandi na kitini ya ntoto ya Yizreele,+ mpi muntu mosi ve ta zika yandi.’” Ebuna yandi kangulaka kielo mpi tinaka.+

11 Ntangu Yehu vutukaka na bansadi ya mfumu na yandi, bo yulaka yandi nde: “Keti mambu yonso kele mbote? Sambu na nki muntu yai ya kilawu kwisaka na nge?” Yandi vutudilaka bo nde: “Beno me zaba muntu yina mpi mambu yina yandi ke tubaka.” 12 Kansi bo tubaka nde: “Yo kele kieleka ve! Pardo, songa beto.” Ebuna yandi tubaka nde: “Yai mambu yina yandi me tubila mono, mpi yandi yikaka nde, ‘Yehowa ke tuba nde: “Mono ke tula nge mafuta sambu nge vanda ntotila ya Izraele.”’”+ 13 Ebuna konso muntu bakaka lele na yandi nswalu mpi tulaka yo na nsi na yandi, na kimatilu yina vandaka ve ya kufika,+ ebuna bo bulaka kibongo mpi tubaka nde: “Yehu me kuma ntotila!”+ 14 Na nima Yehu+ mwana ya Yehoshafati mwana ya Nimshi sadilaka Yehorami komplo.

Yehorami vandaka kukengila na Ramoti-gileadi,+ yandi ti Izraele ya mvimba, sambu na Azaele+ ntotila ya Siria. 15 Na nima ntotila Yehorami vutukaka na Yizreele+ sambu na kusansa bamputa yina bantu ya Siria lwadisaka yandi ntangu yandi vandaka kunwana ti Azaele ntotila ya Siria.+

Ntangu yai Yehu tubaka nde: “Kana beno* me ndima, beno bika ve nde ata muntu mosi kutina mbanza sambu yandi kwenda kupesa nsangu na Yizreele.” 16 Ebuna Yehu mataka na pusu-pusu na yandi mpi kwendaka na Yizreele; Yehorami vandaka kulala kuna sambu na bamputa na yandi, mpi Ahazia ntotila ya Yuda kwendaka sambu na kutala Yehorami. 17 Nkengidi vandaka ya kutelama na nzo-zulu na Yizreele, yandi monaka kimvuka ya bantu ya Yehu ke pusana. Na mbala mosi yandi tubaka nde: “Mono ke mona kimvuka ya bantu.” Yehorami tubaka nde: “Baka soda mosi yina ke tambusaka mpunda, tinda yandi sambu na kukutana ti bo mpi yandi tuba nde, ‘Keti beno ke kwisa na ngemba?’” 18 Muntu mosi yina ke tambusaka mpunda kwendaka kukutana ti yandi mpi tubaka nde: “Ntotila ke tuba nde, ‘Keti nge ke kwisa na ngemba?’” Kansi Yehu tubaka nde: “‘Ngemba’ me tala nge na nki? Landa mono!”

Ebuna nkengidi tubaka nde: “Kinati-nsangu me kuma kisika bo kele, kansi yandi me vutuka ve.” 19 Yandi tindaka muntu ya zole yina ke tambusaka mpunda; ntangu yandi kumaka kisika bo vandaka, yandi tubaka nde: “Ntotila ke tuba nde, ‘Keti nge ke kwisa na ngemba?’” Kansi Yehu tubaka nde: “‘Ngemba’ me tala nge na nki? Landa mono!”

20 Ebuna nkengidi tubaka nde: “Yandi me kuma kisika bo kele, kansi yandi me vutuka ve, mpi mutindu ya kutambusa mpunda kele mutindu Yehu mutekolo* ya Nimshi ke tambusaka, sambu yandi ke tambusa bonso muntu ya kilawu.” 21 Yehorami tubaka nde: “Yidika pusu-pusu!” Bo yidikaka pusu-pusu na yandi ya bitumba ebuna Yehorami ntotila ya Izraele mpi Ahazia+ ntotila ya Yuda basikaka konso muntu na pusu-pusu na yandi ya bitumba sambu na kukutana ti Yehu. Bo kutanaka ti yandi na kitini ya ntoto ya Naboti+ muntu ya Yizreele.

22 Ntangu Yehorami monaka Yehu, yandi tubaka nde: “Yehu, keti nge ke kwisa na ngemba?” Kansi yandi tubaka nde: “Ngemba lenda vanda nki mutindu ntangu pite ya mama na nge Yezabele+ ti kindoki na yandi ya mingi kele kaka?”+ 23 Na mbala mosi Yehorami balulaka pusu-pusu na yandi sambu na kutina, ebuna yandi tubilaka Ahazia nde: “Ahazia, bo me kusa beto!” 24 Yehu bakaka munduki na yandi ya tolo-tolo na diboko, yandi bulaka Yehorami na kati-kati ya mapeka, mpi tolo-tolo basikaka na ntima na yandi, mpi yandi bwaka na pusu-pusu na yandi ya bitumba. 25 Ebuna yandi tubilaka Bidkare, soda yina vandaka kusadisa yandi, nde: “Baka yandi mpi losa yandi na kilanga ya Naboti muntu ya Yizreele.+ Yibuka nde, nge ti mono beto vandaka kutambusa bampunda kumosi* na nima ya tata na yandi Ahabi ntangu Yehowa yandi mosi tubaka diambu yai sambu na yandi:+ 26 ‘“Ya kieleka mutindu mono monaka menga ya Naboti+ mpi menga ya bana na yandi mazono,” Yehowa muntu me tuba, “mono ta pesa+ nge ndola na kitini yai ya ntoto,” Yehowa muntu me tuba.’ Yo yina, baka yandi mpi losa yandi na kitini yina ya ntoto, kaka mutindu Yehowa tubaka.”+

27 Ntangu Ahazia+ ntotila ya Yuda monaka mambu yina vandaka kusalama, yandi tinaka na nzila ya nzo ya kilanga. (Na nima Yehu landaka yandi mpi tubaka nde: “Beno fwa yandi mpi!” Yo yina bo bulaka yandi na pusu-pusu ntangu yandi vandaka kutombuka na Gure, yina kele pene-pene ya Ibleami.+ Kansi yandi landaka kutina tii na Megido mpi yandi fwaka kuna. 28 Ebuna bansadi na yandi nataka yandi na Yeruzalemi na pusu-pusu, mpi bo zikaka yandi na maziamu na yandi ti ba-nkaka na yandi na Mbanza ya Davidi.+ 29 Ahazia+ kumaka ntotila ya Yuda na mvula ya 11 ya Yehorami mwana ya Ahabi.)

30 Ntangu Yehu kumaka na Yizreele,+ Yezabele+ waka yo. Yo yina yandi pakulaka mukubu ya ndombe* na meso, yandi yidikaka ntu na yandi, mpi vandaka kutala na nela. 31 Ntangu Yehu kotaka na kielo, Yezabele tubaka nde: “Keti mambu kwendilaka mbote sambu na Zimri, muntu yina fwaka mfumu na yandi?”+ 32 Yehu talaka na nela, ebuna yandi tubaka nde: “Nani kele na lweka na mono? Nani?”+ Na mbala mosi, bakapita zole to tatu ya nzo ya ntotila talaka na nsi kisika yandi vandaka. 33 Yandi tubaka nde: “Beno losa yandi na ntoto!” Yo yina bo losaka yandi na ntoto, ebuna ndambu ya menga na yandi mwanganaka na kibaka mpi na bampunda; mpi yandi niata-niataka yandi. 34 Na nima, yandi kotaka, yandi diaka mpi nwaka. Ebuna yandi tubaka nde: “Pardo, beno keba nkento yai ya bo me singaka mpi beno zika yandi, sambu yandi kele mwana ya ntotila.”+ 35 Kansi ntangu bo kwendaka sambu na kuzika yandi, bo kutaka kaka mukwa ya ntu na yandi, makulu na yandi, mpi maboko na yandi.+ 36 Ntangu bo vutukaka mpi bo zabisaka yandi diambu yina, yandi tubaka nde: “Yo ke lungisa mambu yina Yehowa+ tubaka na nzila ya nsadi na yandi Eliya muntu ya Tishebe nde, ‘Bambwa ta dia misuni ya Yezabele na kitini ya ntoto ya Yizreele.+ 37 Mpi mvumbi ya Yezabele ta kuma bonso nsasa na kilanga na kitini ya ntoto ya Yizreele, sambu bantu kutuba ve nde: “Yai Yezabele.”’”