Ezekiele

8 Na mvula ya sambanu, na ngonda ya sambanu, na kilumbu ya tanu ya ngonda, ntangu mono vandaka ya kuvanda na nzo na mono mpi bankuluntu ya Yuda vandaka na ntwala na mono, diboko ya Yehowa Mfumu ya Kuluta Nene simbaka mono pana. 2 Ntangu mono talaka, mono monaka kima mosi yina vandaka kumonika bonso tiya; kuvandaka ti tiya na nsi ya kima yina vandaka kumonika bonso luketo na yandi,+ mpi katuka na luketo na yandi tii na zulu, yandi vandaka kusema, bonso nsemo ya kibende ya ke sema.*+ 3 Ebuna yandi tandulaka kima yina vandaka kumonika bonso diboko mpi kangaka mono na nsuki, ebuna mpeve mosi nataka mono na kati-kati ya zulu ti ntoto mpi nataka mono na Yeruzalemi na nzila ya bambona-meso ya Nzambi, na munoko ya kielo ya kati+ yina ke tala na ndambu ya nordi, kisika kiteki* yina ke tedimisaka kimpala vandaka.+ 4 Mpi tala! nkembo ya Nzambi ya Izraele vandaka kuna,+ bonso kima yina mono monaka na muwanda.+

5 Ebuna yandi tubilaka mono nde: “Mwana ya muntu, pardo, tala na ndambu ya nordi.” Mono talaka na ndambu ya nordi, mpi kuna, na nordi ya kielo ya mesa-kimenga, kuvandaka ti kiteki* yina ke tedimisaka kimpala na nzila ya kukotila. 6 Yandi tubilaka mono nde: “Mwana ya muntu, keti nge ke mona mambu ya mbi mpi ya nzanzi yina nzo ya Izraele ke sala awa,+ mambu yina ke sala nde mono kwenda ntama ti kisika na mono ya santu?+ Kansi nge ta mona mambu ya nzanzi yina kele diaka mbi kuluta.”

7 Ebuna yandi nataka mono na munoko ya kibansala, mpi ntangu mono talaka, mono monaka dibulu mosi na kibaka. 8 Yandi tubilaka mono nde: “Mwana ya muntu, tobula kibaka.” Mono tobulaka kibaka, mpi mono monaka nzila mosi ya kukotila. 9 Yandi tubilaka mono nde: “Kota mpi tala mambu ya mbi mpi ya nzanzi yina bo ke sala awa.” 10 Mono kotaka mpi talaka, ebuna mono monaka bifwanisu ya mitindu yonso ya bambisi ya ke tambulaka divumu na ntoto, ya bambisi ya nzanzi,+ mpi ya biteki yonso ya nzanzi* ya nzo ya Izraele;+ bo salaka bifwanisu na yo bisika yonso na kibaka. 11 Bankuluntu ⁷⁰ ya nzo ya Izraele vandaka ya kutelama na ntwala na yo, mpi Yaazania mwana ya Shafani+ telamaka na kati na bo. Konso muntu vandaka ti kima na yandi ya kuyokila ndumbu na diboko, mpi midinga ya ndumbu ya nsudi ya kitoko vandaka kutombuka.+ 12 Yandi tubilaka mono nde: “Mwana ya muntu, keti nge ke mona mambu yina bankuluntu ya nzo ya Izraele ke sala na mpimpa, konso muntu na basuku ya kati yina kele ti biteki na yandi?* Sambu bo ke tuba nde, ‘Yehowa ke mona beto ve. Yehowa me bikisaka insi.’”+

13 Ebuna yandi tubilaka mono diaka nde: “Nge ta mona mambu ya nzanzi yina kele diaka mbi kuluta yina bo ke sala.” 14 Yandi nataka mono na munoko ya kielo ya nordi ya nzo ya Yehowa, mpi kuna mono monaka bankento me vanda mpi ke dila nzambi Tamuzi.

15 Yandi tubilaka mono diaka nde: “O mwana ya muntu, keti nge ke mona mambu yai? Nge ta mona mambu ya nzanzi yina kele diaka mbi kuluta mambu yai.”+ 16 Ebuna yandi nataka mono na kibansala ya kati ya nzo ya Yehowa.+ Kuna na munoko ya tempelo ya Yehowa, na kati-kati ya kisika ya kukotila mpi ya mesa-kimenga, kuvandaka ti babakala kiteso ya ²⁵ ya me pesa mikongo na tempelo ya Yehowa mpi me tula baluse na ndambu ya esti; bo vandaka kufukimina ntangu na ndambu ya esti.+

17 Yandi tubilaka mono nde: “Mwana ya muntu, keti nge ke mona mambu yai? Keti nzo ya Yuda ke yindula nde kusala mambu yai ya nzanzi, kufulusa insi ti nku,+ mpi kulanda kuvweza mono kele diambu mosi ya fioti? Bo ke nikisa lutangu* na mbombo na mono. 18 Yo yina mono ta sala mambu na makasi. Disu na mono ta wa ve mawa; mono ta monisa mpi ve ntima ya mawa.+ Ata bo boka na ndinga ya ngolo na makutu na mono, mono ta wa bo ve.”+