Ezekiele

16 Ndinga ya Yehowa kwisilaka mono diaka nde: 2 “Mwana ya muntu, zabisa Yeruzalemi mambu na yandi ya mbi.+ 3 Nge fwete tuba nde, ‘Yehowa Mfumu ya Kuluta Nene ke tubila Yeruzalemi nde: “Kisina na nge ti lubutuku na nge vandaka na insi ya muntu ya Kanana. Tata na nge vandaka muntu ya Amore,+ mpi mama na nge vandaka muntu ya Heti.+ 4 Na yina me tala lubutuku na nge, kilumbu yina nge butukaka, bo zengaka ve mutolo na nge, bo yobisaka nge ve sambu na kukumisa nge bunkete, bo pakulaka nge ve mungwa, mpi bo dimbaka nge ve bilele. 5 Ata muntu mosi ve wilaka nge mawa sambu na kusala ata diambu mosi na kati ya mambu yai. Ata muntu mosi ve wilaka nge mawa. Kansi, bo losaka nge na nseke sambu bo mengaka nge* kilumbu yina nge butukaka.

6 “‘“Ntangu mono vandaka kuluta pene-pene na nge, mono monaka nge, nge ke kudibula-bula na menga na nge, mpi ntangu nge vandaka pana na menga na nge, mono tubaka nde: ‘Vanda kaka na luzingu!’ Ee, mono tubilaka nge ntangu nge vandaka ya kulala pana na menga na nge nde: ‘Vanda kaka na luzingu!’ 7 Mono kumisaka nge mingi kibeni, bonso tu-banti ya ke mena na bilanga, ebuna nge yelaka, nge kumaka nda mpi nge lwataka bima ya kuluta kitoko ya kukumisa nitu kitoko. Mabele na nge kumaka ngolo, mpi nsuki na nge yelaka; kansi nge vandaka kaka kinkonga, na meso ya bantu yonso.’”

8 “‘Ntangu mono vandaka kuluta pene-pene na nge mpi monaka nge, mono monaka nde nge vandaka ti bamvula ya kufwana sambu na kuzola. Yo yina mono tandulaka lele* na mono na zulu na nge,+ mono fikaka kinkonga na nge, mono diaka ndefi, mpi salaka kuwakana ti nge,’ Yehowa Mfumu ya Kuluta Nene muntu me tuba, ‘ebuna nge kumaka ya mono. 9 Diaka, mono yobisaka nge ti masa, mono dipaka menga na nge mpi mono tulaka nge mafuta.+ 10 Ebuna mono lwatisaka nge lele mosi ya bo me tula bifwanisu, mono pesaka nge basandale ya kitoko ya bo me sala na mpusu ya mbisi,* mono dimbaka nge lele ya lino ya kitoko, mpi mono lwatisaka nge bilele ya ntalu. 11 Mono kumisaka nge kitoko ti bima ya ke kumisaka nitu kitoko mpi mono lwatisaka nge mitaku na maboko mpi mayaka na nkingu. 12 Mono tulaka mpi lupetu na mbombo na nge, bima-makutu na makutu na nge mpi mpu ya kimfumu ya kitoko na ntu na nge. 13 Nge landaka kudikumisa kitoko ti wolo mpi arza, bilele na nge vandaka ya lino ya kitoko, bilele ya ntalu, mpi lele ya bo me tula bifwanisu. Nge vandaka kudia fufu ya kitoko, bwiki ti mafuta, ebuna nge kumaka kitoko kibeni+ mpi nge fwanaka na kuvanda ntotila-nkento.’”*

14 “‘Lukumu* na nge yantikaka kupanzana na kati ya makanda+ sambu na kitoko na nge, yo vandaka ya kukuka sambu mono mosi muntu tulaka lukumu na mono na zulu na nge,’+ Yehowa Mfumu ya Kuluta Nene muntu me tuba.”

15 “‘Kansi nge yantikaka kutula ntima na kitoko na nge,+ mpi nge kumaka nkento ya ndumba sambu na lukumu na nge.+ Nge salaka kindumba kukonda ndilu ti konso muntu yina vandaka kuluta,+ mpi kitoko na nge kumaka ya muntu yina. 16 Nge bakaka bilele na nge ya nkaka ya mikubu mingi mpi sadilaka yo sambu na kukumisa kitoko bisika ya kunanguka yina nge vandaka kusala kindumba+—mambu ya mutindu yina fwete salama ve, yo fwete bwa mpi ve ata fioti. 17 Nge bakaka mpi mayaka na nge ya kitoko* ya bo me sala na wolo ti arza yina mono pesaka nge ebuna nge kudisadilaka biteki ya babakala mpi nge salaka kindumba ti yo.+ 18 Nge bakaka bilele na nge ya bo me tula bifwanisu mpi fikaka yo,* ebuna nge pesaka yo dikabu ya mafuta na mono ti ndumbu na mono.+ 19 Dimpa yina mono pesaka nge—ya bo me sala ti fufu ya kitoko, mafuta, mpi bwiki yina mono pesaka nge na kudia—nge pesaka yo mpi na biteki yina bonso kima ya nsudi ya kitoko.*+ Yai kele kibeni mambu yina salamaka,’ Yehowa Mfumu ya Kuluta Nene muntu me tuba.”

20 “‘Nge bakaka bana na nge ya babakala ti bana na nge ya bankento yina nge butilaka mono,+ mpi nge pesaka bo kimenga na biteki sambu yo dia bo+—keti kindumba na nge me lunga ve? 21 Nge fwaka bana na mono ya babakala, mpi nge pesaka bo bonso bimenga na mutindu nge yokaka* bo na tiya.+ 22 Na ntangu nge vandaka kusala mambu na nge yonso ya mbi mpi kindumba, nge yibukaka ve bilumbu yina nge vandaka leke ntangu nge vandaka kinkonga, na meso ya bantu yonso, na ntangu nge vandaka kudibula-bula na menga na nge. 23 Na nima ya mbi na nge yonso, mawa, mawa na nge,’+ Yehowa Mfumu ya Kuluta Nene muntu me tuba. 24 ‘Nge me tunga mwa-ngumba mpi nge me kudisadila kisika ya kunanguka na konso bala-bala ya nene. 25 Nge tungaka bisika na nge ya kunanguka na kisika ya kuluta lukumu ya konso bala-bala, mpi nge kumisaka kitoko na nge kima mosi ya nzanzi na mutindu nge kudipesaka* na konso muntu yina vandaka kuluta,+ mpi nge kumisaka kindumba na nge mingi.+ 26 Nge salaka kindumba ti bana-babakala ya Ezipte,+ bantu ya ke zingaka pene-pene na nge yina kele ti nzala ya ngolo ya kuvukisa nitu,* mpi nge pesaka mono makasi ti kindumba na nge ya mingi. 27 Ntangu yai, mono ta nata diboko na mono sambu na kunwanisa nge, mono ta fiotuna madia+ na nge mpi ta pesa nge na luzolo* ya bankento yina ke mengaka nge,+ bana-bankento ya bantu ya Filistia, bayina waka nzanzi sambu na bikalulu na nge ya nsoni.+

28 “‘Sambu nge lendaka ve kulungisa nzala na nge, nge salaka kindumba ti bana ya Asiria,+ kansi na nima ya kusala kindumba ti bo, nge lungisaka kaka ve nzala na nge. 29 Yo yina nge kumisaka kindumba na nge ngolo na insi ya bantu ya mumbongo* mpi na bantu ya Kaldea,+ kansi ata mpidina nge lungisaka ve nzala na nge. 30 Ntima na nge vandaka kubela* kibeni,’* Yehowa Mfumu ya Kuluta Nene muntu me tuba, ‘ntangu nge salaka mambu yai yonso, nge salaka bonso nkento mosi ya ndumba ya me konda nsoni!+ 31 Kansi ntangu nge tungaka mwa-ngumba na nge na kisika ya kuluta lukumu ya konso bala-bala mpi nge salaka kisika na nge ya kunanguka na konso bala-bala ya nene, nge vandaka ve bonso nkento ya ndumba, sambu nge buyaka konso lufutu yina. 32 Nge kele nkento ya bizumba yina ke bakaka banzenza na kisika ya bakala na yandi mosi!+ 33 Bantu ke pesaka bankento yonso ya bandumba dikabu,+ kansi nge, nge muntu me pesaka makabu na bantu yonso yina kele ti nzala ya ngolo ya kuvukisa nitu ti nge,+ mpi nge ke pesaka bo avoka sambu bo katuka na bandambu yonso mpi bo kwisa kusala kindumba ti nge.+ 34 Nge me swaswana ti bankento ya nkaka yina ke salaka kindumba. Ata muntu mosi ve ke salaka kindumba mutindu nge ke sala! Nge ke futa bantu ya nkaka, kansi bo ke futa nge ve. Mutindu na nge ya kusala mambu me swaswana.’

35 “Yo yina, O nkento ya ndumba,+ wa mambu ya Yehowa ke tuba. 36 Yehowa Mfumu ya Kuluta Nene me tuba nde: ‘Sambu nzala na nge ya ngolo ya kuvukisa nitu me zabana mpi kinkonga na nge me monana na meso ya bantu yonso ntangu nge ke sala kindumba ti bantu ya ke zolaka nge mpi biteki na nge yonso ya mbi ti ya nzanzi*+ yina nge pesaka nkutu kimenga ya menga ya bana na nge,+ 37 mono ke vukisa bantu yonso yina ke zolaka nge yina nge me sepedisaka, bantu yonso yina nge zolaka kumosi ti bantu yonso yina nge mengaka. Mono ta vukisa bo katuka na bandambu yonso sambu na kunwanisa nge mpi ta songa bo pwelele kinkonga na nge, ebuna bo ta mona nge kibeni kinkonga.+

38 “‘Mono ta pesa nge ndola na nzila ya balusambisu yina bankento ya bizumba+ ti bankento ya ke tiamunaka menga+ me fwana na kubaka, mpi menga na nge ta tiamuka sambu na makasi mpi kimpala.+ 39 Mono ta pesa nge na maboko na bo, ebuna bo ta buka mwa-bangumba na nge mpi ta bwisa bisika na nge ya kunanguka;+ bo ta katula nge bilele,+ bo ta baka mayaka na nge ya kitoko*+ mpi ta bikisa nge kinkonga, na meso ya bantu yonso. 40 Bo ta nata kimvuka mosi ya bantu+ sambu na kunwanisa nge, ebuna bo ta losila nge matadi+ mpi ta fwa nge ti bambele na bo ya bitumba.+ 41 Bo ta yoka banzo na nge tiya+ mpi ta zenga makambu na nge na meso ya bankento mingi; ebuna mono ta sukisa kindumba na nge,+ mpi nge ta yambula kupesa lufutu. 42 Nganzi ya mono ke wila nge ta mana,+ mpi makasi na mono ta bwila nge diaka ve;+ ebuna mono ta vanda pima mpi ta wa diaka ve makasi.’

43 “‘Sambu nge yibukaka ve bilumbu yina nge vandaka leke+ mpi nge pesaka mono makasi na mutindu nge vandaka kusala mambu yai yonso, mono ta sala nde nge buka mbuma ya banzila na nge,’ Yehowa Mfumu ya Kuluta Nene muntu me tuba, ‘ebuna nge ta landa diaka ve bikalulu na nge ya nsoni mpi mambu na nge yonso ya mbi.

44 “‘Tala! Konso muntu yina ke sadilaka bingana ta sadila kingana yai sambu na nge: “Mutindu mama ke vandaka, mutindu yo yina mpi mwana-nkento ke vandaka!”+ 45 Nge kele kibeni mwana-nkento ya mama na nge, yina vwezaka bakala na yandi ti bana na yandi. Nge kele mpangi-nkento ya bampangi na nge ya bankento, bayina vwezaka babakala na bo ti bana na bo. Mama na beno vandaka muntu ya Heti, mpi tata na beno vandaka muntu ya Amore.’”+

46 “‘Mbuta na nge ya nkento kele Samaria,+ yina ke zingaka na ndambu na nge ya nordi* ti bana na yandi ya bankento,*+ mpi leke na nge ya nkento, yina ke zingaka na ndambu na nge ya sudi,* kele Sodome+ ti bana na yandi ya bankento.+ 47 Nge tambulaka kaka ve na banzila na bo mpi nge landaka kaka ve mambu na bo ya mbi, kansi na ntangu fioti bikalulu na nge yonso vandaka ya kubeba kuluta ya bo.+ 48 Ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘Sodome mpangi na nge ya nkento ti bana na yandi ya bankento me salaka ve mambu yina nge ti bana na nge ya bankento me salaka. 49 Tala! Kifu ya mpangi na nge ya nkento Sodome yo yai: Yandi ti bana na yandi ya bankento+ vandaka lulendo,+ bo vandaka ti madia mingi,+ mpi bo vandaka na ngemba kukonda kudiyangisa;+ ata mpidina bo sadisaka ve muntu ya bo ke monisa mpasi mpi nsukami.+ 50 Bo vandaka kaka lulendo+ mpi salaka mambu ya mbi na meso na mono,+ yo yina mono monaka nde yo vandaka mfunu na kukatula bo.+

51 “‘Nkutu Samaria+ salaka ve ata kati-kati ya masumu mingi yina nge salaka. Nge landaka kusala nde mambu na nge ya mbi kukuma mingi kuluta yina bo salaka, na mpila nde bampangi na nge ya bankento monanaka bantu ya lunungu sambu na mambu na nge yonso ya mbi.+ 52 Ntangu yai, nge fwete nata nsoni na nge sambu nge ndimaka* bikalulu ya bampangi na nge ya bankento. Na yina me tala disumu na nge mutindu nge salaka mambu ya nzanzi kuluta yina bo salaka, bo kele bantu ya lunungu kuluta nge. Ntangu yai, vanda na nsoni mpi ndima nsoni mutindu nge salaka nde bampangi na nge ya bankento kumonana bantu ya lunungu.’

53 “‘Mpi mono ta vukisa bampika na bo, bampika ya Sodome ti bana na yandi ya bankento mpi bampika ya Samaria ti bana na yandi ya bankento; mono ta vukisa mpi bampika na nge kumosi ti bo,+ 54 sambu nge ndima nsoni na nge; ebuna nge ta wa nsoni sambu na mambu yina nge salaka mutindu nge lembikaka bo. 55 Bampangi na nge ya bankento, Sodome ti bana na yandi ya bankento, ta vutuka mutindu bo vandaka ntete, Samaria ti bana na yandi ya bankento ta vutuka mutindu bo vandaka ntete, mpi nge ti bana na nge ya bankento beno ta vutuka mutindu beno vandaka ntete.+ 56 Mpangi na nge ya nkento Sodome fwanaka ve nde nge tubila yandi na kilumbu yina nge kumaka lulendo, 57 na ntwala nde mbi na nge kumonana na meso ya bantu yonso.+ Ntangu yai bana-bankento ya Siria ti bantu yina ke zingaka pene-pene na yandi ke pesa nge nsoni, mpi bana-bankento ya bantu ya Filistia,+ bayina kele na nziunga na nge, ke sadila nge mambu ti kuvweza. 58 Nge ta buka mbuma ya bikalulu na nge ya nsoni mpi ya mambu na nge ya mbi,’ Yehowa muntu me tuba.”

59 “Yehowa Mfumu ya Kuluta Nene me tuba nde: ‘Ntangu yai mono ta sala nge kaka mutindu nge salaka,+ sambu nge vwezaka ndefi na mutindu nge fwaka kuwakana na mono.+ 60 Kansi mono mosi ta yibuka kuwakana yina mono salaka ti nge na bilumbu yina nge vandaka leke, mpi mono ta sala ti nge kuwakana yina ke zingaka mingi.+ 61 Nge ta yibuka bikalulu na nge mpi ta wa nsoni+ ntangu nge ta yamba bampangi na nge ya bankento, bayina kele bambuta na nge mpi bayina kele baleke na nge, ebuna mono ta pesa bo na nge bonso bana-bankento, kansi ve sambu na kuwakana na nge.’

62 “‘Mono mosi ta sala kuwakana na mono ti nge; ebuna nge ta zaba nde mono kele Yehowa. 63 Nge ta yibuka mpi ta vanda na nsoni kibeni na mpila nde nge ta kuka ve kukangula munoko na nge sambu na nsoni na nge,+ ntangu mono ta fika masumu na nge kukonda kutala mambu yonso ya nge salaka,’+ Yehowa Mfumu ya Kuluta Nene muntu me tuba.”