2 Bantotila

10 Ahabi+ vandaka ti bana-babakala 70 na Samaria. Yehu sonikaka mikanda mpi tindaka yo na Samaria, na bamfumu ya Yizreele, na bankuluntu,+ mpi na bandesi ya bana ya Ahabi,* nde: 2 Ntangu mukanda yai ke kumina beno, bana ya mfumu na beno, bapusu-pusu ya bitumba, bampunda, mbanza ya ngolo, mpi binwaninu ta vanda ti beno. 3 Beno sola mwana ya mbote kuluta mpi ya me fwana* kibeni na kati ya bana ya mfumu na beno ebuna beno tula yandi na kiti ya kimfumu ya tata na yandi. Na nima beno nwana sambu na nzo ya mfumu na beno.”

4 Kansi boma simbaka bo mingi mpi bo tubaka nde: “Kana bantotila zole kukaka ve kutelama na ntwala na yandi,+ inki mutindu beto lenda telama?” 5 Yo yina, nkengidi ya nzo ya ntotila,* mfumu ya mbanza, bankuluntu, mpi bandesi tindilaka Yehu nsangu yai: “Beto kele bansadi na nge, mpi beto ta sala konso kima yina nge ta songa beto. Beto ta kumisa ve ata muntu mosi ntotila. Sala konso kima yina kele mbote na meso na nge.”

6 Ebuna yandi sonikilaka bo mukanda ya zole nde: “Kana beno kele bantu na mono mpi beno ke zola kulemfukila mono, beno nata ba-ntu ya bana ya mfumu na beno, mpi mbasi na ntangu yai beno kwisa na Yizreele kisika mono kele.”

Kansi, bana-babakala 70 ya ntotila vandaka kumosi ti bantu ya lukumu ya mbanza, bayina vandaka kusansa bo. 7 Ntangu mukanda yina kuminaka bo, bo bakaka bana ya ntotila mpi bo fwaka bo, bantu 70,+ ebuna bo tulaka ba-ntu na bo na bitunga mpi bo tindilaka yandi yo na Yizreele. 8 Kinati-nsangu kotaka mpi songaka yandi nde: “Bo me nata ba-ntu ya bana ya ntotila.” Yo yina yandi tubaka nde: “Beno tula yo na bita zole na munoko ya kielo ya mbanza tii na suka.” 9 Ntangu yandi basikaka na suka, yandi telamaka na ntwala ya bantu yonso mpi tubaka nde: “Beno me sala mbi ve.* Ee, mono sadilaka mfumu na mono komplo, mpi mono fwaka yandi,+ kansi nani me fwa bantu yai yonso? 10 Yo yina beno zaba nde ata diambu mosi ve ya Yehowa tubaka, yina Yehowa tubaka sambu na kubedisa nzo ya Ahabi ta konda kulungana,*+ mpi Yehowa me sala mambu yina yandi tubaka na nzila ya nsadi na yandi Eliya.”+ 11 Diaka, Yehu fwaka bantu yonso ya nzo ya Ahabi yina bikalaka na Yizreele, mpi bantu na yandi yonso ya lukumu, bantu yina zabanaka ti yandi, mpi banganga-nzambi na yandi,+ tii kuna yandi bikilaka yandi ve ata muntu mosi ya moyo.+

12 Na nima yandi telamaka mpi yandi kwendaka na Samaria. Nzo ya bangungudi yina bo ke kangaka mameme* vandaka na nzila. 13 Kuna Yehu kutanaka ti bampangi ya Ahazia+ ntotila ya Yuda, mpi yandi tubilaka bo nde: “Beno kele banani?” Bo tubaka nde: “Beto kele bampangi ya Ahazia, mpi beto ke kulumuka sambu na kukwenda kuyula kana bana ya ntotila mpi bana ya mama ya ntotila* kele mbote.” 14 Na mbala mosi yandi tubaka nde: “Beno kanga bo ya moyo!” Bo kangaka bo ya moyo mpi fwaka bo na dibulu ya masa ya nzo yina bo ke kangaka mameme, bantu 42. Yandi bikaka ve ata muntu mosi na kati na bo na luzingu.+

15 Ntangu yandi katukaka pana, yandi kutanaka ti Yehonadabi+ mwana ya Rekabi,+ yina vandaka kukwisa kukutana ti yandi. Ntangu yandi pesaka yandi mbote,* yandi tubilaka yandi nde: “Keti ntima na nge kele kibeni* ti mono, kaka mutindu ntima na mono kele ti ntima na nge?”

Yehonadabi vutulaka nde: “Ee.”

“Kana mpidina, pesa mono diboko na nge.”

Yo yina yandi pesaka yandi diboko na yandi, ebuna Yehu matisaka yandi na pusu-pusu kisika yandi vandaka. 16 Na nima yandi tubaka nde: “Kwisa ti mono, mpi tala mutindu mono ke ndimaka ve kimbanda ti* Yehowa.”+ Yo yina bo bakaka yandi sambu na kutambula ti yandi na pusu-pusu na yandi ya bitumba. 17 Ebuna yandi kumaka na Samaria, mpi yandi fwaka bantu yonso ya nzo ya Ahabi yina bikalaka na Samaria tii kuna yandi manisaka bo,+ na kuwakana ti mambu yina Yehowa tubaka na nzila ya Eliya.+

18 Diaka, Yehu vukisaka bantu yonso mpi yandi tubilaka bo nde: “Ahabi sambilaka Baale mwa fioti,+ kansi Yehu ta sambila yandi mingi kuluta. 19 Yo yina beno bingila mono bambikudi yonso ya Baale,+ bansambidi na yandi yonso, mpi banganga-nzambi+ na yandi yonso. Beno bika ve nde ata muntu mosi kukonda, sambu mono ke pesa Baale kimenga ya nene. Konso muntu yina ta konda, yandi ta fwa.” Kansi Yehu vandaka kusala mambu na mayele ya mbi sambu na kufwa bansambidi ya Baale.

20 Yehu tubaka diaka nde: “Beno panza nsangu nde beto ke sala* lukutakanu mosi ya santu sambu na Baale.” Yo yina bo panzaka nsangu. 21 Na nima Yehu tindaka nsangu na Izraele ya mvimba, ebuna bansambidi yonso ya Baale kwisaka. Ata mosi ve bikalaka yina kwisaka ve. Bo kotaka na nzo* ya Baale,+ mpi nzo ya Baale fulukaka katuka na nsuka mosi tii na nsuka ya nkaka. 22 Yandi tubilaka muntu yina vandaka mfumu ya kisika ya kubumba bilele nde: “Basisila bansambidi yonso ya Baale bilele.” Yo yina yandi basisilaka bo bilele. 23 Ebuna Yehu ti Yehonadabi+ mwana ya Rekabi kotaka na nzo ya Baale. Yandi tubilaka bansambidi ya Baale nde: “Beno sosa mbote-mbote mpi beno zikisa nde ata nsambidi mosi ve ya Yehowa kele awa, kaka bansambidi ya Baale.” 24 Nsuka-nsuka bo kotaka sambu na kupesa bimenga mpi makabu ya kuyoka. Yehu tulaka bantu na yandi 80 na nganda mpi tubaka nde: “Kana muntu mosi na kati ya bantu yina mono ke tula na maboko na beno kutina, luzingu na beno ta vanda na kisika ya luzingu na yandi.”*

25 Ntangu yandi manisaka kupesa dikabu ya kuyoka, Yehu tubilaka bankengidi* mpi basoda yina ke sadisaka yandi nde: “Beno kota mpi beno fwa bo! Beno bika ve nde ata muntu mosi kutina!”+ Yo yina bankengidi ti basoda yina ke sadisaka yandi fwaka bo na mbele ya bitumba mpi losaka bo na nganda, mpi bo landaka kukwenda tii na kisika ya santu ya kati* ya nzo ya Baale. 26 Ebuna bo basisaka na nganda makunzi ya santu+ ya nzo ya Baale mpi bo yokaka yo mosi-mosi na tiya.+ 27 Bo bwisaka dikunzi ya santu+ ya Baale; bo bwisaka nzo ya Baale+ mpi bo kumisaka yo bakabine, yo me bikalaka mutindu yina tii bubu yai.

28 Na mutindu yina, Yehu manisaka Baale na Izraele. 29 Kansi Yehu yambulaka ve masumu yina Yeroboami mwana ya Nebati pusaka Izraele na kusala, na yina me tala bana-bangombe ya wolo yina vandaka na Betele mpi na Dani.+ 30 Yo yina Yehowa tubilaka Yehu nde: “Sambu nge me sala mambu na mutindu ya mbote mpi nge me sala mambu ya mbote na meso na mono na mutindu nge me lungisa mambu yonso yina vandaka na ntima na mono ya kusala nzo ya Ahabi,+ bandonga iya ya bana na nge ta vanda na kiti ya kimfumu ya Izraele.”+ 31 Kansi Yehu tulaka ve dikebi na kuzitisa Nsiku ya Yehowa Nzambi ya Izraele na ntima na yandi ya mvimba.+ Yandi yambulaka ve masumu yina Yeroboami pusaka Izraele na kusala.+

32 Na bilumbu yina, Yehowa yantikaka kuzenga Izraele bitini-bitini. Azaele landaka kunwanisa bo na teritware ya mvimba ya Izraele,+ 33 yantika na Yordani, na ndambu ya esti, insi ya mvimba ya Gileadi—bana ya Gadi, bana ya Rubeni, mpi bana ya Manase+—yantika na Aroere, yina kele pene-pene ya Muwanda ya Arnoni tii na Gileadi mpi Bashani.+

34 Mpi mambu ya nkaka ya Yehu salaka, yonso yina yandi salaka, mpi ngolo na yandi yonso, keti bo me sonikaka yo ve na mukanda ya bansangu ya bantotila ya Izraele? 35 Ebuna Yehu lalaka sambu na kupema ti ba-nkaka na yandi, mpi bo zikaka yandi na Samaria; ebuna mwana na yandi Yehoahazi+ kumaka ntotila na kisika na yandi. 36 Ntangu* yina Yehu yalaka Izraele na Samaria vandaka bamvula 28.