Ezekiele

40 Na mvula ya 25 ya beto vandaka na kimpika,+ na luyantiku ya mvula, na kilumbu ya kumi ya ngonda, na mvula ya 14 na nima ya kubwa ya mbanza,+ kaka na kilumbu yina diboko ya Yehowa vandaka na zulu na mono mpi yandi nataka mono na mbanza.+ 2 Na nzila ya bambona-meso ya Nzambi, yandi nataka mono na insi ya Izraele mpi tululaka mono na zulu ya ngumba mosi ya nda kibeni,+ mpi kima mosi ya bo me tunga bonso mbanza vandaka na zulu na yo na ndambu ya sudi.

3 Ntangu yandi nataka mono kuna, mono monaka muntu mosi yina vandaka kumonika bonso kwivre.+ Yandi vandaka ti nsinga mosi ya lino mpi lukengi* ya kutesila na diboko na yandi,+ mpi yandi telamaka na munoko ya kielo. 4 Muntu yina tubilaka mono nde: “Mwana ya muntu, tala mbote-mbote, wa mbote-mbote, mpi tula dikebi* na mambu yonso ya mono ke monisa nge, sambu yai kikuma ya bo me natila nge awa. Songa nzo ya Izraele mambu yonso ya nge ke mona.”+

5 Mono monaka kibaka mosi me ziunga nganda ya tempelo.* Lukengi ya kutesila vandaka na diboko ya muntu yina, nda na yo vandaka maboko sambanu (na konso diboko, bo yikaka nene ya kipala-pala ya diboko mosi).* Yandi yantikaka kutesa kibaka, mpi nene na yo vandaka lukengi mosi mpi nda na yo katuka na ntoto tii na zulu vandaka lukengi mosi.

6 Ebuna yandi kwisaka na kielo yina ke tala na ndambu ya esti+ mpi mataka na bima na yo ya kumatila. Ntangu yandi tesaka nsi ya munoko ya kielo, nene na yo vandaka lukengi mosi, mpi nene ya nsi ya nkaka ya munoko ya kielo vandaka mpi lukengi mosi. 7 Nda ya konso suku ya nkengidi vandaka lukengi mosi, nene na yo lukengi mosi, mpi kitamina ya maboko tanu vandaka kukabula basuku ya bankengidi.+ Nsi ya munoko ya kielo yina vandaka pene-pene ya kisika ya kukotila ya kielo ya ke tala na kati vandaka lukengi mosi.

8 Yandi tesaka kisika ya kukotila ya kielo na ndambu ya kati, yo vandaka lukengi mosi. 9 Ebuna yandi tesaka kisika ya kukotila ya kielo, yo vandaka maboko nana; yandi tesaka makunzi na yo ya balweka, yo vandaka maboko zole; mpi kisika ya kukotila ya kielo vandaka na ndambu yina ke tala na kati.

10 Kuvandaka ti basuku tatu ya bankengidi na konso ndambu ya kielo ya esti. Nene mpi nda na yo yonso tatu vandaka kiteso mosi, mpi makunzi ya balweka yina vandaka na bandambu yonso zole vandaka nene mpi nda kiteso mosi.

11 Ebuna yandi tesaka nene ya munoko ya kielo, yo vandaka maboko 10; mpi nda ya kielo ya nene vandaka maboko 13.

12 Kisika yina vandaka ya kukabula na ntwala ya basuku ya bankengidi na bandambu zole vandaka diboko mosi. Konso suku ya nkengidi na bandambu yonso zole vandaka maboko sambanu.

13 Ebuna yandi tesaka kielo katuka na ludi ya suku mosi ya nkengidi* tii na ludi ya suku ya nkaka, mpi nene na yo vandaka maboko 25; munoko mosi vandaka kutalana ti munoko ya nkaka.+ 14 Na nima yandi tesaka makunzi ya balweka, nda na yo vandaka maboko ⁶⁰, yandi tesaka mpi makunzi ya balweka yina vandaka na bakielo na bandambu yonso ya kibansala. 15 Katuka na ntwala ya munoko ya kielo tii na ntwala ya kisika ya kukotila na ndambu ya kati ya kielo, yo vandaka maboko 50.

16 Kuvandaka ti banela yina bakadrema na yo vandaka nene na kati mpi fioti na nganda*+ sambu na basuku ya bankengidi mpi sambu na makunzi na yo ya balweka na ndambu ya kati ya kielo, na konso ndambu. Bisika ya kukotila mpi vandaka ti banela na kati, na konso ndambu, mpi kuvandaka ti bifwanisu ya maba+ na makunzi ya balweka.

17 Na nima, yandi nataka mono na kibansala ya nganda, mpi mono monaka basuku ya kudila madia*+ mpi pavema mosi na nziunga ya kibansala. Basuku ya kudila madia vandaka 30 na pavema yina. 18 Pavema yina vandaka na ndambu ya bakielo vandaka nda kiteso mosi ti bakielo—yo vandaka pavema ya nsi.

19 Ebuna yandi tesaka kitamina* katuka na ntwala ya kielo ya nene ya nsi tii na ndilu ya kibansala ya kati. Yo vandaka maboko 100 na ndambu ya esti mpi na ndambu ya nordi.

20 Kibansala ya nganda vandaka ti kielo ya ke tala na ndambu ya nordi, mpi yandi tesaka nda na yo ti nene na yo. 21 Kuvandaka ti basuku tatu ya bankengidi na konso ndambu. Makunzi na yo ya balweka mpi kisika na yo ya kukotila vandaka kiteso mosi ti kielo ya ntete. Nda na yo vandaka maboko 50 mpi nene na yo maboko 25. 22 Banela na yo, kisika na yo ya kukotila, mpi bifwanisu na yo ya maba+ vandaka nene mpi nda kiteso mosi ti bayina ya kielo ya esti. Bantu lendaka kukuma kuna kana bo mata na bima nsambwadi ya kumatila, mpi kisika na yo ya kukotila vandaka na ntwala na yo.

23 Kuvandaka ti kielo mosi na kibansala ya kati yina vandaka kutalana ti kielo ya nordi mpi ya nkaka vandaka kutalana ti kielo ya esti. Yandi tesaka kitamina yina vandaka na kati ya kielo mosi ti kielo ya nkaka, mpi yo vandaka maboko 100.

24 Na nima, yandi nataka mono na ndambu ya sudi, ebuna mono monaka kielo mosi na ndambu ya sudi.+ Yandi tesaka makunzi na yo ya balweka mpi kisika na yo ya kukotila, yo vandaka nene mpi nda kiteso mosi ti bayina ya nkaka. 25 Kuvandaka ti banela na konso ndambu na yo mpi na kisika na yo ya kukotila, bonso banela yina ya nkaka. Nda na yo vandaka maboko 50 mpi nene na yo maboko 25. 26 Kuvandaka ti bima nsambwadi ya kumatila yina vandaka kusadisa na kumata na yo,+ mpi kisika na yo ya kukotila vandaka na ntwala na yo. Yo vandaka ti bifwanisu ya maba na makunzi na yo ya balweka, mosi na konso ndambu.

27 Kibansala ya kati vandaka ti kielo mosi ya ke tala na ndambu ya sudi; yandi tesaka na ndambu ya sudi katuka na kielo mosi tii na kielo ya nkaka, mpi kitamina vandaka maboko 100. 28 Na nima yandi nataka mono na kibansala ya kati na nzila ya kielo ya sudi; ntangu yandi tesaka kielo ya sudi, nene mpi nda na yo vandaka kiteso mosi ti bayina ya nkaka. 29 Basuku na yo ya bankengidi, makunzi na yo ya balweka, mpi kisika na yo ya kukotila vandaka nene mpi nda kiteso mosi ti bayina ya nkaka. Kuvandaka ti banela na konso ndambu na yo mpi na kisika na yo ya kukotila. Nda na yo vandaka maboko 50 mpi nene na yo maboko 25.+ 30 Bisika ya kukotila vandaka na bandambu yonso; nda na yo vandaka maboko 25 mpi nene na yo maboko 5. 31 Kisika na yo ya kukotila vandaka kutala na kibansala ya nganda, mpi bifwanisu ya maba vandaka na makunzi na yo ya balweka,+ mpi bima nana ya kumatila vandaka kusadisa na kumata na yo.+

32 Ntangu yandi nataka mono na kibansala ya kati katuka na ndambu ya esti, yandi tesaka kielo, ebuna nene mpi nda na yo vandaka kiteso mosi ti bayina ya nkaka. 33 Basuku na yo ya bankengidi, makunzi na yo ya balweka, mpi kisika na yo ya kukotila vandaka nene mpi nda kiteso mosi ti bayina ya nkaka, mpi kuvandaka ti banela na konso ndambu na yo mpi na kisika na yo ya kukotila. Nda na yo vandaka maboko 50 mpi nene na yo maboko 25. 34 Kisika na yo ya kukotila vandaka kutala na kibansala ya nganda, mpi bifwanisu ya maba vandaka na makunzi na yo yonso zole ya balweka, mpi bima nana ya kumatila vandaka kusadisa na kumata na yo.

35 Ebuna yandi nataka mono na kielo ya nordi mpi tesaka yo;+ nene mpi nda na yo vandaka kiteso mosi ti bayina ya nkaka. 36 Basuku na yo ya bankengidi, makunzi na yo ya balweka, mpi kisika na yo ya kukotila vandaka kiteso mosi ti bayina ya nkaka. Yo vandaka ti banela na konso ndambu. Nda na yo vandaka maboko 50 mpi nene na yo maboko 25. 37 Makunzi na yo ya balweka vandaka kutala na kibansala ya nganda, mpi bifwanisu ya maba vandaka na makunzi na yo yonso zole ya balweka, mpi bima nana ya kumatila vandaka kusadisa na kumata na yo.

38 Suku mosi ya kudila madia ti munoko na yo ya kukotila vandaka pene-pene ya makunzi ya balweka ya bakielo, kisika bo vandaka kuyobisa makabu ya mvimba ya kuyoka.+

39 Kuvandaka ti bamesa zole na konso ndambu ya kisika ya kukotila ya kielo, mpi na zulu na yo bo vandaka kufwa makabu ya mvimba ya kuyoka,+ makabu sambu na disumu,+ mpi makabu sambu na makambu.+ 40 Na nzila yina ke tombuka na ndambu ya kielo ya nordi, kuvandaka ti bamesa zole na konso ndambu na nganda ya munoko ya kukotila. Kuvandaka mpi ti bamesa zole na konso ndambu na kati ya kisika ya kukotila ya kielo. 41 Kuvandaka ti bamesa iya na konso ndambu ya kielo—bamesa nana na kimvuka—yina bo vandaka kufwila bimenga. 42 Bamesa yina iya sambu na makabu ya mvimba ya kuyoka bo salaka yo ti matadi ya bo me zenga. Nda na yo vandaka diboko mosi na ndambu, nene na yo diboko mosi na ndambu, mpi nda na yo katuka na ntoto tii na zulu diboko mosi. Na zulu na yo, bo vandaka kubumba bima yina bo vandaka kusadila sambu na kufwa makabu ya kuyoka mpi bimenga. 43 Mwa mabaya, yina nene na yo vandaka nene ya kipala-pala ya diboko mosi, vandaka ya kukangama na bandambu yonso ya bibaka ya kati; mpi bo vandaka kutula misuni ya bo vandaka kupesa makabu na zulu ya bamesa yina.

44 Na nganda ya kielo ya kati, kuvandaka ti basuku ya kudila madia sambu na miyimbi-bankunga;+ yo vandaka na kibansala ya kati pene-pene ya kielo ya nordi, yo vandaka kutala na ndambu ya sudi. Suku ya nkaka ya kudila madia vandaka pene-pene ya kielo ya esti, yo vandaka kutala na ndambu ya nordi.

45 Yandi tubilaka mono nde: “Suku yai ya kudila madia ya ke tala na ndambu ya sudi kele sambu na banganga-nzambi yina kele ti mukumba ya kusala bisalu na tempelo.+ 46 Suku ya kudila madia yina ke tala na ndambu ya nordi kele sambu na banganga-nzambi yina kele ti mukumba ya kusala kisalu ya mesa-kimenga.+ Bo kele bana ya Zadoki,+ Balevi yina kele ti mukumba ya kukwenda pene-pene ya Yehowa sambu na kusadila yandi.”+

47 Ebuna yandi tesaka kibansala ya kati. Nda na yo vandaka maboko 100 mpi nene na yo maboko 100, na balweka yonso iya. Mesa-kimenga vandaka na ntwala ya tempelo.

48 Ebuna yandi nataka mono na kisika ya kukotila ya tempelo,+ mpi yandi tesaka dikunzi ya lweka ya kisika ya kukotila, yo vandaka maboko tanu na ndambu mosi mpi maboko tanu na ndambu ya nkaka. Nene ya kielo vandaka maboko tatu na ndambu mosi mpi maboko tatu na ndambu ya nkaka.

49 Nda ya kisika ya kukotila vandaka maboko 20 mpi nene na yo maboko 11.* Bantu vandaka kumata na bima yina ya kumatila sambu na kukwenda kuna. Kuvandaka ti makunzi pene-pene ya banti ya nene ya balweka, mosi na konso ndambu.+