Bazuzi

6 Kansi bantu ya Izraele salaka diaka mambu ya mbi na meso ya Yehowa,+ yo yina Yehowa pesaka bo na maboko ya Madiani bamvula nsambwadi.+ 2 Diboko ya Madiani yalaka Izraele.+ Sambu na Madiani, bantu ya Izraele salaka bisika ya kubumbana* sambu na bo mosi na bangumba ya nene, na mabulu, mpi na bisika yina yo kele mpasi na kukuma.+ 3 Ntangu Izraele vandaka kukuna nkeni, Madiani, Amaleki,+ mpi bantu ya ndambu ya Esti+ vandaka kunwanisa bo. 4 Bo vandaka kutula camp sambu na kunwanisa Izraele mpi kubebisa bima ya bilanga tii na Gaza, mpi bo vandaka kubikila ve Izraele ata kima ya kudia, yo vanda dimeme, ngombe to mpunda.+ 5 Bo vandaka kutombuka ti bitwisi na bo mpi batenta yina vandaka mingi kibeni bonso bampasu,+ ebuna mpila ya kutanga ntalu na bo ti ya bashamo na bo vandaka ve,+ mpi bo vandaka kukota na insi sambu na kufwa yo. 6 Yo yina Izraele kumaka na kinsukami ya ngolo sambu na Madiani; ebuna bantu ya Izraele bingaka Yehowa sambu na kulomba lusadisu.+

7 Ntangu bantu ya Izraele bingaka Yehowa sambu na kulomba lusadisu sambu na Madiani,+ 8 Yehowa tindilaka bantu ya Izraele mbikudi mosi yina tubilaka bo nde: “Yehowa Nzambi ya Izraele me tuba nde: ‘Mono basisaka beno na Ezipte mpi na mutindu yina mono basisaka beno na nzo ya kimpika.+ 9 Ebuna mono gulusaka beno na maboko ya Ezipte mpi ya bantu yonso yina vandaka kuniokula beno mpi mono kulaka bo na ntwala na beno mpi pesaka beno insi na bo.+ 10 Mono tubilaka beno nde: “Mono kele Yehowa Nzambi na beno.+ Beno fwete wa ve boma ya banzambi ya bantu ya Amore yina beno ke zinga na insi na bo.”+ Kansi beno lemfukilaka mono ve.’”*+

11 Na nima, wanzio ya Yehowa kwisaka+ mpi vandaka na nsi ya nti ya nene yina vandaka na Ofra, yina vandaka ya Yoashi muntu ya Abi-ezere.+ Mwana na yandi Gideoni+ vandaka kubula ble na kati ya kikamuninu ya vinu sambu Madiani kumona yo ve. 12 Wanzio ya Yehowa kwisaka kumonika na yandi mpi tubaka nde: “Yehowa kele ti nge,+ nge soda ya ngolo.” 13 Ebuna Gideoni tubaka nde: “Lolula mono mfumu na mono, kansi kana Yehowa kele ti beto, sambu na nki mambu yai yonso ke kwisila beto?+ Wapi mambu na yandi yonso ya kuyituka yina batata na beto vandaka kutela beto+ mpi kutuba nde: ‘Keti Yehowa basisaka beto ve na Ezipte?’+ Ntangu yai Yehowa me yambula beto+ mpi yandi me pesa beto na diboko ya Madiani.” 14 Yehowa talaka yandi mpi tubaka nde: “Kwenda ti ngolo yina nge kele na yo, ebuna nge ta gulusa Izraele na diboko ya Madiani.+ Keti mono ve muntu me tinda nge?” 15 Gideoni pesaka yandi mvutu nde: “Lolula mono, Yehowa. Inki mutindu mono lenda gulusa Izraele? Tala! Dibuta* na mono kele ya kuluta fioti na Manase, mpi mono kele muntu ya kukonda mfunu na nzo ya tata na mono.” 16 Kansi Yehowa tubilaka yandi nde: “Sambu mono ta vanda ti nge,+ nge ta fwa bantu ya Madiani bonso nde bo vandaka muntu mosi.”

17 Ebuna Gideoni tubilaka yandi nde: “Ntangu yai, kana nge me ndima mono, songa mono kidimbu mosi ya ke monisa nde nge muntu ke tuba na mono. 18 Pardo, kukatuka ve awa tii kuna mono ta kwisa kuvutuka ti dikabu na mono mpi kutula yo na ntwala na nge.”+ Ebuna yandi tubaka nde: “Mono ta vanda awa tii kuna nge ta kwisa kuvutuka.” 19 Gideoni kotaka mpi lambaka mwana-nkombo mpi yandi bakaka efa* mosi ya fufu mpi salaka dimpa ya kukonda levire.+ Yandi tulaka musuni yina na kitunga mpi supu na nzungu ya kulambila; ebuna yandi natilaka yandi yo na nganda mpi pesaka yandi yo na nsi ya nti ya nene.

20 Ebuna wanzio ya Nzambi ya kieleka tubilaka yandi nde: “Baka musuni yina ti dimpa ya kukonda levire mpi tula yo na zulu ya ditadi yina ya nene, ebuna tiamuna supu.” Yandi salaka mutindu yina. 21 Ebuna wanzio ya Yehowa tandulaka nsongi ya nti yina vandaka na diboko na yandi mpi simbaka musuni ti dimpa ya kukonda levire, ebuna tiya basikaka na ditadi yina mpi yo yokaka musuni ti dimpa ya kukonda levire.+ Ebuna wanzio ya Yehowa walukaka na meso na yandi. 22 Ntangu yai Gideoni bakisaka nde yo vandaka wanzio ya Yehowa.+

Na mbala mosi Gideoni tubaka nde: “Mawa na mono, Yehowa Mfumu ya Kuluta Nene, sambu mono me mona wanzio ya Yehowa na meso!”+ 23 Kansi Yehowa tubilaka yandi nde: “Vanda na ngemba. Kuwa boma ve;+ nge ta fwa ve.” 24 Ebuna Gideoni tungaka mesa-kimenga mosi pana sambu na Yehowa, mpi bo ke bingaka yo Yehowa-shalomi*+ tii bubu yai. Yo kele kaka na Ofra ya bantu ya Abi-ezere.

25 Na mpimpa yina, Yehowa tubilaka yandi nde: “Baka mwana-ngombe ya bakala ya tata na nge, mwana-ngombe ya zole yina kele na bamvula nsambwadi, mpi panza mesa-kimenga ya Baale ya tata na nge mpi zenga nti ya santu* yina kele pene-pene na yo.+ 26 Na nima ya kutunga mesa-kimenga sambu na Yehowa Nzambi na nge na zulu ya kisika yai ya ngolo ya lutaninu ti matadi ya kutula na ndonga, baka mwana-ngombe yina ya zole mpi pesa yo bonso dikabu ya kuyoka na zulu ya bitini ya mabaya ya nti ya santu* yina nge ta zenga.” 27 Yo yina, Gideoni bakaka babakala kumi na kati ya bansadi na yandi mpi salaka kaka mutindu Yehowa songaka yandi. Kansi yandi waka bantu ya nzo ya tata na yandi mpi bantu ya bwala boma mingi sambu na kusala yo na mwini, yo yina yandi salaka yo na mpimpa.

28 Ntangu bantu ya mbanza telamaka na suka, bo monaka nde bo me bwisa mesa-kimenga ya Baale, bo me zenga nti ya santu* yina vandaka pene-pene na yo, mpi bo me pesa mwana-ngombe ya bakala ya zole dikabu na zulu ya mesa-kimenga yina bo tungaka. 29 Bo yulanaka bo na bo nde: “Nani me sala diambu yai?” Na nima ya kuzikisa, bo tubaka nde: “Gideoni mwana ya Yoashi muntu me sala yo.” 30 Yo yina bantu ya mbanza tubilaka Yoashi nde: “Basisa mwana na nge sambu yandi fwa, sambu yandi me bwisa mesa-kimenga ya Baale mpi me zenga nti ya santu* yina vandaka pene-pene na yo.” 31 Ebuna Yoashi+ tubilaka bantu yonso yina vandaka kuswanisa yandi nde: “Keti beno bantu fwete nwanina Baale? Keti beno bantu fwete gulusa yandi? Konso muntu yina ke nwanina yandi, bo fwete fwa yandi na suka yai.+ Kana yandi kele nzambi, bika nde yandi kudinwanina yandi mosi,+ sambu muntu mosi me bwisa mesa-kimenga na yandi.” 32 Ebuna kilumbu yina, yandi bingaka Gideoni nde Yerubaale* mpi tubaka nde: “Bika Baale kudinwanina yandi mosi, sambu muntu mosi me bwisa mesa-kimenga na yandi.”

33 Madiani+ ya mvimba, Amaleki,+ mpi bantu ya ndambu ya Esti vukisaka basoda na bo;+ mpi bo sabukaka* sambu na kukwenda na Muwanda* ya Yizreele mpi salaka camp. 34 Ebuna mpeve ya Yehowa kwisaka na zulu ya* Gideoni+ mpi yandi bulaka kibongo,+ ebuna bantu ya Abi-ezere+ vukanaka mpi landaka yandi. 35 Yandi tindaka binati-nsangu na Manase ya mvimba, ebuna bo mpi vukanaka mpi landaka yandi. Yandi tindaka mpi binati-nsangu na Asere, Zebuloni ti Naftali, ebuna bo tombukaka sambu na kukutana ti yandi.

36 Ebuna Gideoni tubilaka Nzambi ya kieleka nde: “Kana nge ke gulusa Izraele na nzila na mono, kaka mutindu nge silaka,+ 37 awa mono ke tanda mika ya dimeme na kisika ya bo ke tutaka bambuma sambu na kukatula yo bampusu. Kana malulu kele kaka na zulu ya mika kansi ntoto yonso ya kele na nziunga na yo kele ya kuyuma, pana mono ta zaba nde nge ta gulusa Izraele na nzila na mono, kaka mutindu nge silaka.” 38 Mpi yo salamaka mutindu yina. Na kilumbu yina landaka, ntangu yandi telamaka na suka mpi kamunaka mika, yandi basisaka na mika yina malulu ya me fwana na kufulusa bolo ya nene ya nkinsi na masa. 39 Kansi, Gideoni tubilaka Nzambi ya kieleka nde: “Kuwila mono ve makasi, kansi bika nde mono lomba diaka mbala mosi. Pardo, bika nde mono meka mbala mosi diaka kima ya nkaka ti mika. Pardo, bika nde mika mpamba kuvanda ya kuyuma kansi malulu kuvanda na ntoto na kisika yina yonso.” 40 Nzambi salaka mutindu yina na mpimpa yina; mika mpamba vandaka ya kuyuma, kansi malulu vandaka na ntoto na kisika yina yonso.