2 Bantotila

23 Yo yina ntotila tindaka ndinga mpi bo bingaka bankuluntu yonso ya Yuda ti ya Yeruzalemi.+ 2 Na nima ntotila kwendaka na nzo ya Yehowa ti babakala yonso ya Yuda, bantu yonso ya Yeruzalemi, banganga-nzambi, mpi bambikudi—bantu yonso, yantika na bantu ya kukonda mfunu tii na bantu ya mfunu. Yandi tangaka na makutu na bo mambu yonso ya mukanda+ ya kuwakana+ yina bo monaka na nzo ya Yehowa.+ 3 Ntotila telamaka pene-pene ya dikunzi mpi yandi salaka kuwakana* na ntwala ya Yehowa,+ nde yandi ta landa Yehowa mpi ta zitisa bantuma na yandi, bangibusa na yandi, mpi bansiku na yandi na ntima na yandi ya mvimba mpi na moyo* na yandi ya mvimba mpi yandi ta zitisa bangogo ya kuwakana yai ya bo sonikaka na mukanda yai. Bantu yonso ndimaka kuwakana yina.+

4 Na nima, ntotila songaka nganga-nzambi ya nene Hilkia,+ banganga-nzambi ya nkaka, mpi bankengidi ya bakielo na kubasisa na tempelo ya Yehowa bisadilu yonso yina bantu salaka sambu na Baale, sambu na nti ya santu,*+ mpi sambu na makesa yonso ya zulu. Ebuna yandi yokaka yo tiya na nganda ya Yeruzalemi na tu-bangumba ya Kidroni, mpi yandi nataka mfututu na yo na Betele.+ 5 Yo yina, yandi katulaka na kisalu banganga-nzambi ya nzambi ya nzenza, yina bantotila ya Yuda tulaka sambu na kupesa midinga ya kimenga na bisika ya kunanguka na bambanza ya Yuda mpi na bisika yina kele na nziunga ya Yeruzalemi; yandi katulaka mpi bantu yina vandaka kupesa midinga ya kimenga na Baale, na ntangu, na ngonda, na bimvuka ya bambwetete ya zodiake, mpi na makesa yonso ya zulu.+ 6 Yandi basisaka nti ya santu*+ na nzo ya Yehowa mpi nataka yo na bandilu ya Yeruzalemi, na Muwanda ya Kidroni; yandi yokaka yo+ na Muwanda ya Kidroni mpi yandi tutaka yo tii kuna yo kumaka mfututu na nima yandi panzaka mfututu na yo na maziamu ya bantu ya mpamba.+ 7 Yandi bwisaka mpi banzo ya babakala yina vandaka bandumba ya tempelo,+ yina vandaka na nzo ya Yehowa mpi kisika bankento vandaka kutunga tu-batempelo ya bo me sala bonso batenta sambu na nti ya santu.*

8 Na nima yandi basisaka banganga-nzambi yonso na bambanza ya Yuda, mpi yandi bebisaka bisika ya kunanguka yina banganga-nzambi vandaka kupesa midinga ya kimenga katuka na Geba+ tii na Bere-sheba.+ Yandi bwisaka mpi bisika ya kunanguka ya bakielo yina vandaka na munoko ya kielo ya Yozue mfumu ya mbanza, yina vandaka na diboko ya kimama kana muntu ke kota na kielo ya mbanza. 9 Banganga-nzambi ya bisika ya kunanguka vandaka kusala ve na mesa-kimenga ya Yehowa na Yeruzalemi,+ kansi bo vandaka kudia mampa ya kukonda levire kumosi ti bampangi na bo. 10 Yandi bebisaka mpi Tofeti,+ yina kele na Muwanda ya Bana ya Inomi,*+ sambu muntu mosi ve kuyoka* mwana na yandi ya bakala to ya nkento na tiya sambu na Moleki.+ 11 Mpi yandi buyaka nde bampunda yina bantotila ya Yuda tambikaka na ntangu, yo kota na nzo ya Yehowa pene-pene ya suku* ya Natani-meleki, kapita ya nzo ya ntotila, suku yina vandaka na baveranda; ebuna yandi yokaka bapusu-pusu ya ntangu+ na tiya. 12 Ntotila bwisaka mpi bamesa-kimenga yina bantotila ya Yuda tulaka na ludi ya suku ya zulu+ ya Ahazi, mpi bamesa-kimenga yina Manase tulaka na bibansala zole ya nzo ya Yehowa.+ Yandi panzaka yo mpi losaka mfututu na yo na Muwanda ya Kidroni. 13 Mpi ntotila bebisaka bisika ya kunanguka na ntwala ya Yeruzalemi yina vandaka na sudi* ya Ngumba ya Kubebisa,* yina Salomo ntotila ya Izraele tungaka sambu na Ashtoreti nzambi-nkento ya nzanzi ya bantu ya Sidoni; mpi sambu na Kemoshi nzambi ya nzanzi ya Moabi; mpi sambu na Milkomi+ nzambi ya nzanzi ya bantu ya Amoni.+ 14 Yandi zengaka makunzi ya santu bitini-bitini mpi bukaka banti ya santu,*+ ebuna bisika yina yo vandaka yandi fulusaka yo ti mikwa ya bantu. 15 Yandi bwisaka mpi mesa-kimenga yina vandaka na Betele, kisika ya kunanguka yina Yeroboami mwana ya Nebati salaka mpi yina pusaka Izraele na kusala masumu.+ Na nima ya kubwisa mesa-kimenga yina mpi kisika ya kunanguka, yandi yokaka kisika ya kunanguka tiya, tutaka yo tii kuna yo kumaka mfututu, mpi yandi yokaka nti ya santu* tiya.+

16 Ntangu Yoziasi balukaka mpi monaka maziamu na zulu ya ngumba, yandi lombaka nde bo katula mikwa na maziamu mpi bo yoka yo na mesa-kimenga, sambu yo vanda diaka ve kisika ya kusambila, na kuwakana ti ndinga ya Yehowa yina muntu ya Nzambi ya kieleka zabisaka, yina tubaka nde mambu yai ta salama.+ 17 Ebuna yandi tubaka nde: “Ditadi ya maziamu yina mono ke mona kuna kele inki?” Bantu ya mbanza yina songaka yandi nde: “Yo kele maziamu ya muntu ya Nzambi ya kieleka yina katukaka na Yuda+ mpi yina tubilaka mambu yai ya nge me sala mesa-kimenga yai ya kele na Betele.” 18 Ebuna yandi tubaka nde: “Beno bika yandi, yandi pema. Muntu mosi ve kuyangisa mikwa na yandi.” Yo yina bo yangisaka ve mikwa na yandi mpi mikwa ya mbikudi yina katukaka na Samaria.+

19 Yoziasi katulaka mpi banzo yonso ya lusambu na bisika ya kunanguka yina vandaka na bambanza ya Samaria,+ yina bantotila ya Izraele tungaka sambu na kupesa Nzambi makasi, mpi yandi salaka yo mutindu yandi salaka na Betele.+ 20 Yandi tambikaka na bamesa-kimenga yina banganga-nzambi yonso ya bisika ya kunanguka yina vandaka pana, mpi yandi yokaka mikwa ya bantu na zulu na bo.+ Na nima yandi vutukaka na Yeruzalemi.

21 Ntangu yai ntotila songaka bantu yonso nde: “Beno sala Paki+ sambu na Yehowa Nzambi na beno mutindu bo me sonikaka na mukanda yai ya kuwakana.”+ 22 Bo salaka ve Paki ya mutindu yai tuka bilumbu yina bazuzi vandaka kusambisa Izraele, to na bilumbu yonso ya bantotila ya Izraele mpi ya bantotila ya Yuda.+ 23 Kansi na mvula ya 18 ya ntotila Yoziasi, bo salaka Paki yai sambu na Yehowa na Yeruzalemi.

24 Yoziasi katulaka mpi bantu yina ke solulaka ti bampeve ya bafwa, bantu yina ke zabisaka bantu mambu yina ta kumina bo,+ biteki ya terafimi,*+ biteki ya nzanzi,* mpi bima yonso ya nzanzi yina basikaka na insi ya Yuda mpi na Yeruzalemi, sambu na kulungisa bangogo ya Nsiku+ yina bo sonikaka na mukanda yina nganga-nzambi Hilkia monaka na nzo ya Yehowa.+ 25 Kuvandaka ve ata ti ntotila mosi bonso yandi na ntwala na yandi, yina vutukaka na Yehowa na ntima na yandi ya mvimba mpi na moyo*+ na yandi ya mvimba mpi na ngolo na yandi yonso, na kuwakana ti Nsiku yonso ya Moize; muntu mosi ve bonso yandi basikaka mpi na nima na yandi.

26 Ata mpidina, Yehowa yambulaka ve makasi na yandi ya ngolo yina yandi wilaka Yuda sambu na mambu yonso ya mbi yina Manase salaka sambu na kupesa Yandi makasi.+ 27 Yehowa tubaka nde: “Mono ta katula mpi Yuda na meso na mono,+ kaka mutindu mono katulaka Izraele;+ mono ta buya mbanza yai ya mono solaka, Yeruzalemi, mpi nzo yina mono tubaka sambu na yo nde, ‘Zina na mono ta landa kuvanda kuna.’”+

28 Sambu na mambu ya nkaka ya Yoziasi salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Yuda? 29 Na bilumbu na yandi, Farao Neko ntotila ya Ezipte kwisaka kukutana ti ntotila ya Asiria pene-pene ya Nzadi ya Efrate, ebuna ntotila Yoziasi basikaka sambu na kunwanisa yandi; kansi ntangu Neko monaka yandi, yandi fwaka yandi na Megido.+ 30 Ebuna bansadi na yandi tulaka mvumbi na yandi na pusu-pusu na Megido, bo nataka yandi na Yeruzalemi, mpi bo zikaka yandi na maziamu na yandi. Ebuna bantu ya insi yina bakaka Yehoahazi mwana ya Yoziasi, bo tulaka yandi mafuta mpi bo kumisaka yandi ntotila na kisika ya tata na yandi.+

31 Yehoahazi+ vandaka ti bamvula 23 ntangu yandi kumaka ntotila, mpi yandi yalaka bangonda tatu na Yeruzalemi. Zina ya mama na yandi Amutale+ mwana ya Yeremia muntu ya Libna. 32 Yandi yantikaka kusala mambu ya mbi na meso ya Yehowa, na kuwakana ti mambu yonso yina ba-nkaka na yandi salaka.+ 33 Farao Neko+ tulaka yandi na boloko na Ribla+ na insi ya Amati, sambu na kukanga yandi nzila ya kuyala na Yeruzalemi, ebuna yandi futisaka insi yina kibawu ya batalanta* 100 ya arza ti talanta mosi ya wolo.+ 34 Diaka, Farao Neko kumisaka Eliakimi mwana ya Yoziasi ntotila na kisika ya tata na yandi Yoziasi mpi pesaka yandi zina ya nkaka, Yehoyakimi; kansi yandi bakaka Yehoahazi mpi nataka yandi na Ezipte,+ mpi nsuka-nsuka yandi fwaka kuna.+ 35 Yehoyakimi pesaka Farao arza ti wolo, kansi yandi futisaka insi mpaku sambu na kupesa arza yina Farao lombaka. Yandi futisaka konso muntu ya insi ntalu ya arza ti ya wolo yina yandi tulaka sambu na kupesa yo na Farao Neko.

36 Yehoyakimi+ vandaka ti bamvula 25 ntangu yandi kumaka ntotila, mpi yandi yalaka bamvula 11 na Yeruzalemi.+ Zina ya mama na yandi Zebida mwana ya Pedaya muntu ya Ruma. 37 Yandi landaka kusala mambu ya mbi na meso ya Yehowa,+ na kulanda mambu yonso yina ba-nkaka na yandi salaka.+