Ruti

2 Naomi vandaka ti mpangi mosi ya bakala na yandi, yina vandaka ti kimvwama mingi, zina na yandi Boazi.+ Yandi vandaka muntu ya dibuta ya Elimeleki.

2 Ruti muntu ya Moabi tubilaka Naomi nde: “Pardo, pesa mono nzila ya kukwenda na bilanga mpi ya kulokuta bima yina ke bikalaka na bilanga+ na kati ya misusu ya bambuma na nima ya konso muntu yina ta ndima mono.” Naomi tubilaka yandi nde: “Kwenda, mwana na mono.” 3 Ebuna Ruti basikaka mpi kwendaka kulokuta bima yina ke bikalaka na bilanga na nima ya bantu ya ke katulaka bima na bilanga. Kukonda kuzaba, yandi kumaka na kilanga ya Boazi,+ muntu mosi ya dibuta ya Elimeleki.+ 4 Kaka na ntangu yina Boazi katukaka na Betelemi mpi kwisaka, ebuna yandi tubilaka bantu ya ke katulaka bambuma nde: “Yehowa kuvanda ti beno.” Bo vutulaka nde: “Yehowa kusakumuna nge.”

5 Ebuna Boazi yulaka leke ya bakala yina vandaka kutwadisa bantu ya ke katulaka bambuma nde: “Mwana-nkento yai kele na dibuta ya nani?” 6 Leke ya bakala yina vandaka kutwadisa bantu ya ke katulaka bambuma vutudilaka yandi nde: “Mwana-nkento yai kele muntu ya Moabi;+ yandi katukaka na banseke ya Moabi+ mpi kwisaka ti Naomi. 7 Yandi yulaka nde: ‘Pardo, keti mono lenda lokuta bima yina ke bikalaka na bilanga+ mpi kuvukisa misusu* ya bambuma yina bo me zenga ya ke bikala na nima ya bantu yina ke katula bima na bilanga?’ Yandi kele kaka ya kutelama katuka ntangu yandi kwisaka na suka tii kaka ntangu yai ya yandi me vanda na madidi sambu na kupema fioti.”

8 Ebuna Boazi tubilaka Ruti nde: “Wa, mwana na mono. Kukwenda ve kulokuta bima yina ke bikalaka na kilanga ya nkaka, mpi kukwenda ve na kisika ya nkaka; bikala pene-pene ya bansadi na mono ya bankento.+ 9 Tula meso na nge kaka na kilanga yina bo ke katula bambuma, mpi kwenda ti bo. Mono me songa baleke ya babakala na kusimba* nge ve. Kana nge wa nzala ya masa, kwenda kisika mabungu ya masa kele mpi nwa masa yina baleke ya babakala me baka.”

10 Ebuna yandi bwaka luse na ntoto, fukamaka mpi tubilaka Boazi nde: “Inki mutindu nge me ndima mono, mpi sambu na nki nge me tudila mono dikebi, ata mono kele munzenza?”+ 11 Boazi vutudilaka yandi nde: “Bo me zabisa mono mambu yonso ya nge me sala sambu na bokilo na nge ya nkento na nima ya lufwa ya bakala na nge mpi mutindu nge bikaka tata na nge, mama na nge, ti ntoto ya bampangi na nge sambu na kukwenda na bantu yina nge zabaka ve na ntwala.+ 12 Bika Yehowa kufuta nge sambu na mambu yina nge me sala,+ mpi bika nde Yehowa Nzambi ya Izraele, yina nge me kwisa kusosa lutaninu+ na nsi ya mapapu na yandi, kupesa nge lufutu ya kukuka.”* 13 Ebuna Ruti tubaka nde: “Mfumu na mono, bika mono ndimama na meso na nge, sambu nge me lembika mono mpi nge me tuba na nsadi na nge na mutindu ya ke pesa kikesa,* ata mono kele ve na kati ya bansadi na nge.”

14 Na ntangu ya kudia, Boazi tubilaka yandi nde: “Kwisa awa, dia ndambu ya mampa, mpi kotisa yo na masa yai ya ngani.” Yo yina yandi vandaka pene-pene ya bantu yina ke katulaka bima na bilanga. Na nima Boazi pesaka Ruti ndambu ya bambuma ya kukalanga, ebuna yandi diaka mpi fulukaka, mpi yandi bikalaka ti ndambu ya nkaka. 15 Ntangu yandi telamaka sambu na kulokuta bima yina ke bikalaka na bilanga,+ Boazi songaka bansadi na yandi ya babakala nde: “Beno pesa yandi nzila ya kulokuta bima yina ke bikalaka na bilanga ata na kati ya misusu* ya bambuma yina bo me zenga, mpi beno niokula yandi ve.+ 16 Beno fwete bendila yandi ndambu ya misusu na banti yina bo me zenga, beno bika yo na nima sambu yandi lokuta bima yina ke bikalaka na bilanga, mpi beno tuba ve ata kima mosi sambu na kukanga yandi nzila.”

17 Yo yina yandi landaka kulokuta bima yina ke bikalaka na bilanga tii na nkokila.+ Ntangu yandi tutaka bambuma yina yandi lokutaka, yo vandaka kiteso ya efa mosi* ya orze. 18 Yandi bakaka yo mpi kwendaka na mbanza, mpi bokilo na yandi ya nkento monaka bambuma yina yandi lokutaka. Ruti basisaka mpi madia yina bikalaka+ ntangu yandi diaka mpi fulukaka, ebuna yandi pesaka yandi yo.

19 Bokilo na yandi tubilaka yandi nde: “Na wapi nge lokutaka bima bubu yai? Na wapi nge salaka? Bika nde muntu yina monaka nge kubaka lusakumunu.”+ Ebuna Ruti songaka bokilo na yandi na kilanga ya nani yandi salaka. Yandi tubaka nde: “Zina ya muntu yina mono salaka na kilanga na yandi bubu kele Boazi.” 20 Yo yina Naomi tubilaka bokilo na yandi nde: “Bika nde Yehowa, yina me monisa zola na yandi ya kwikama na bantu ya moyo mpi na bafwa,+ kusakumuna yandi.” Naomi yikaka nde: “Muntu yina kele mpangi na beto.+ Yandi kele mosi na kati ya bantu yina lenda sumba beto diaka.”*+ 21 Ebuna Ruti muntu ya Moabi tubaka nde: “Boazi songaka mono mpi nde, ‘Bikala pene-pene ya baleke ya babakala tii kuna bo ta manisa kukatula bima na mono yonso na bilanga.’”+ 22 Yo yina, Naomi tubilaka bokilo na yandi Ruti nde: “Mwana na mono, yo kele mbote mingi nde nge kwenda ti bansadi na yandi ya bankento na kisika nde bo yangisa nge na kilanga ya nkaka.”

23 Yandi bikalaka pene-pene ya bansadi ya Boazi ya bankento mpi lokutaka bambuma tii kuna nsungi ya kukatula bambuma ya orze+ ti ya ble manaka. Yandi landaka kuzinga ti bokilo na yandi.+