Kusonga

16 Mono waka ndinga mosi ya ngolo ke katuka na kisika ya santu,+ yo ke tubila bawanzio nsambwadi nde: “Beno kwenda mpi beno tiamuna babolo nsambwadi ya makasi ya Nzambi na ntoto.”+

2 Wanzio ya ntete kwendaka mpi yandi tiamunaka bolo na yandi na ntoto.+ Ebuna mputa+ ya mbi mpi ya mpasi basikaka na bantu yina vandaka ti kidimbu ya mbisi ya mfinda+ mpi yina vandaka kusambila kifwani na yo.+

3 Wanzio ya zole tiamunaka bolo na yandi na nzadi-mungwa.+ Ebuna yo kumaka menga+ bonso menga ya muntu ya kufwa, mpi bigangwa* yonso ya moyo fwaka, ee, bima yina kele na nzadi-mungwa.+

4 Wanzio ya tatu tiamunaka bolo na yandi na banzadi mpi na ba-nto ya masa.+ Ebuna yo kumaka menga.+ 5 Mono waka wanzio ya bamasa ke tuba nde: “Nge, Muntu yina kele mpi yina vandaka,+ Muntu ya kwikama,+ nge kele muntu ya lunungu, sambu nge me zenga mambu mutindu yai,+ 6 sambu bo tiamunaka menga ya basantu ti ya bambikudi,+ mpi nge me pesaka bo menga sambu bo nwa;+ yo me fwana na bo.”+ 7 Mono waka mesa-kimenga ke tuba nde: “Ee, Yehowa* Nzambi, Nkwa-Ngolo Yonso,+ balusambisu*+ na nge kele ya kieleka mpi ya lunungu.”

8 Wanzio ya iya tiamunaka bolo na yandi na ntangu,+ mpi bo pesaka ntangu nswa ya kuyoka bantu tiya. 9 Ebuna bantu piaka tiya ya ngolo, kansi bo vwezaka zina ya Nzambi, yina kele ti kiyeka na bampasi yai; bo balulaka ve ntima mpi bo pesaka yandi ve nkembo.

10 Wanzio ya tanu tiamunaka bolo na yandi na kiti ya kimfumu ya mbisi ya mfinda. Ebuna kimfumu na yo kumaka mpimpa,+ mpi bo yantikaka kuditatika baludimi sambu na mpasi, 11 kansi bo vwezaka Nzambi ya zulu sambu na bampasi na bo mpi bamputa na bo, mpi bo balulaka ve ntima na bisalu na bo.

12 Wanzio ya sambanu tiamunaka bolo na yandi na nzadi ya nene Efrate,+ ebuna masa na yo yumaka+ sambu na kuyidika nzila sambu na bantotila+ ya ke katuka na ndambu yina ntangu ke basikaka.*

13 Ebuna mono monaka mambu tatu ya kupemama ya mvindu* yina vandaka bonso makototo ke basika na munoko ya dragoni,+ na munoko ya mbisi ya mfinda, mpi na munoko ya mbikudi ya luvunu. 14 Ya kieleka, yo kele mambu ya me pemama na bademo, mpi yo ke sala bidimbu,+ mpi yo ke kwenda na bantotila ya ntoto ya mvimba, sambu na kuvukisa bo sambu na bitumba+ ya kilumbu ya nene ya Nzambi Nkwa-Ngolo Yonso.+

15 “Tala, mono ke kwisa bonso muyibi.+ Kiese na muntu yina ke bikala ya kusikama+ mpi ke keba bilele na yandi ya zulu, sambu yandi tambula ve kinkonga mpi bantu kumona ve nsoni na yandi.”+

16 Mpi bo vukisaka bo na kisika yina bo ke bingaka na Kiebreo nde Armagedoni.*+

17 Wanzio ya nsambwadi tiamunaka bolo na yandi na mupepe. Ebuna ndinga mosi ya ngolo basikaka na kisika ya santu+ katuka na kiti ya kimfumu nde: “Yo me salama!” 18 Mpi nsemo ya nzasi monanaka, bandinga mpi makelele ya banzasi wakanaka, mpi ntoto nikanaka ngolo kibeni na mutindu yina yo me nikanaka ntete ve yantika ntangu yina bantu me salamaka na ntoto;+ kunikana yina ya ntoto vandaka ngolo mpi nene kibeni. 19 Mbanza ya nene+ kabwanaka na bandambu tatu; bambanza ya makanda bwaka; mpi Nzambi yibukaka Babilone ya Nene,+ sambu na kupesa yandi dikopa ya vinu ya nganzi ya makasi na yandi.+ 20 Diaka, bisanga yonso tinaka, mpi bo monaka ve bangumba.+ 21 Ebuna mvula ya nene ya matadi katukaka na zulu mpi nokilaka bantu,+ konso ditadi vandaka kizitu kiteso ya talanta mosi,* ebuna bantu vwezaka Nzambi sambu na mpasi ya mvula yina,+ sambu mpasi yina vandaka ya kuluta ngolo kibeni.