Kulonga

21 “Kana bo mona muntu mosi ya bo me fwa na mfinda ya insi yina Yehowa Nzambi na nge ke pesa nge na kubaka kansi muntu ya me fwa yandi me zabana ve, 2 bankuluntu ti bazuzi+ na nge fwete basika mpi kutesa kitamina yina ke kabula mvumbi yina ti bambanza yina kele na nziunga na yo. 3 Ebuna bankuluntu ya mbanza yina kele pene-pene kibeni ti mvumbi yina fwete baka na kati ya bangombe na bo mwana-ngombe mosi ya nkento yina bo me sadilaka ntete ve kisalu mpi yina me bendaka ntete ve vangu, 4 na nima bankuluntu ya mbanza yina fwete kulumusa mwana-ngombe yina ya nkento na muwanda yina kele ti masa kisika yina bo me bundulaka ve mpi me kunaka ve nkeni, ebuna bo fwete buka nkingu ya mwana-ngombe yina ya nkento kuna na muwanda.+

5 Ebuna banganga-nzambi, Balevi, ta pusana pene-pene sambu Yehowa Nzambi na nge me solaka bo na kusadila yandi kisalu,+ na kusakumuna na zina ya Yehowa.+ Bo ta zabisa mutindu ya kumanisa+ kukonda kuwakana yonso ya me tala mambu ya nku. 6 Ebuna bankuluntu yonso ya mbanza yina kele pene-pene kibeni ti mvumbi fwete yobisa maboko na bo+ na zulu ya mwana-ngombe ya nkento yina bo bukaka nkingu na muwanda, 7 mpi bo fwete tuba nde, ‘Maboko na beto tiamunaka ve menga yai, meso na beto mpi monaka yo ve ntangu yo tiamukaka. 8 O Yehowa, kutula ve mambu yai na ntu ya bantu na nge Izraele, bayina nge sumbaka diaka,+ mpi kubika ve nde mfuka ya menga ya muntu ya me sala mbi ve kubikala na kati ya bantu na nge Izraele.’+ Ebuna mfuka ya menga ta vanda ve na ntu na bo. 9 Na mutindu yina, nge ta katula na kati na beno mfuka ya menga ya muntu yina me sala mbi ve sambu nge ke sala mambu yina kele mbote na meso ya Yehowa.

10 “Kana nge kwenda na bitumba sambu na kunwana ti bambeni na nge ebuna Yehowa Nzambi na nge kubedisa bo sambu na nge mpi nge nata bo na kimpika,+ 11 ebuna na kati ya bampika yina nge mona nkento mosi ya kitoko, nge sepela ti yandi, mpi nge zola kukwela yandi, 12 nge lenda nata yandi na nzo na nge. Yandi fwete kulula nsuki na yandi, kuyidika manzungulu na yandi, 13 kukatula bilele na yandi ya kimpika, mpi kuzinga na nzo na nge. Yandi ta dila tata na yandi mpi mama na yandi ngonda ya mvimba,+ mpi na nima nge lenda vukisa nitu ti yandi; nge ta kuma bakala na yandi mpi yandi ta kuma nkento na nge. 14 Kansi kana nge sepela ve ti yandi, nge fwete bikisa yandi, yandi kwenda+ konso kisika yina yandi me zola.* Nge lenda teka yandi ve na mbongo to kusadila yandi mambu na nku yonso, sambu nge me pesa yandi nsoni.

15 “Kana bakala mosi kele ti bankento zole mpi yandi ke zola nkento mosi kuluta yina ya nkaka,* ebuna bo zole me butila yandi bana zole ya babakala mpi mwana ya ntete kele mwana ya nkento yina yandi ke zolaka ve,+ 16 na kilumbu yina yandi ke pesa dikabu na bana na yandi, yandi ta vanda ve na nswa ya kubaka mwana ya nkento yina yandi ke zolaka mingi bonso mwana na yandi ya ntete mpi kupesa mpasi na mwana ya ntete ya nkento yina yandi ke zolaka ve. 17 Yandi fwete ndima mwana ya ntete ya nkento yina yandi ke zolaka ve bonso mwana na yandi ya ntete mpi kupesa yandi makabu zole ya bima yonso yina yandi kele na yo, sambu mwana yina kele luyantiku ya ngolo na yandi ya kubuta. Nswa ya kuvanda mwana ya ntete kele ya yandi.+

18 “Kana muntu kele ti mwana ya bakala yina kele ntu-ngolo mpi nkolami ebuna yandi ke lemfukila ve tata na yandi to mama na yandi,+ mpi bo me sala yonso sambu na kusungika yandi kansi yandi ke buya kuwila bo,+ 19 tata na yandi ti mama na yandi fwete baka yandi, kunata yandi na bankuluntu na kielo ya mbanza na yandi 20 mpi kutubila bankuluntu ya mbanza na yandi nde, ‘Mwana na beto yai kele ntu-ngolo mpi nkolami, mpi yandi ke buya kulemfukila beto. Yandi ke diaka mbiki+ mpi ke lawukaka malafu.’+ 21 Ebuna babakala yonso ya mbanza na yandi fwete fwa yandi na matadi. Na mutindu yina nge fwete katula kima ya mbi na kati na beno, ebuna Izraele ya mvimba ta wa yo mpi ta kuma na boma.+

22 “Kana muntu mosi me sala disumu yina ke lomba ndola ya lufwa+ ebuna bo me fwa yandi mpi nge me tula yandi na zulu ya nti,+ 23 mvumbi na yandi fwete bikala ve mpimpa ya mvimba na zulu ya nti.+ Kansi, nge fwete zika yandi kilumbu yina, sambu muntu yina bo me tula na zulu ya nti kele kima yina Nzambi me singa+ mpi nge fwete bebisa ve insi na nge yina Yehowa Nzambi na nge ke pesa nge bonso dikabu.+