2 Bansangu

11 Ntangu Rehoboami kumaka na Yeruzalemi, yandi vukisaka kukonda kusukinina nzo ya Yuda mpi ya Benyamini,+ basoda 180 000 ya me zaba bitumba mbote,* sambu bo nwana ti Izraele sambu na kuvutula kimfumu na Rehoboami.+ 2 Ebuna ndinga ya Yehowa kwisilaka Shemaya+ muntu ya Nzambi ya kieleka nde: 3 Tubila Rehoboami mwana ya Salomo ntotila ya Yuda, Izraele ya mvimba na Yuda mpi na Benyamini nde, 4 ‘Yehowa me tuba nde: “Beno fwete kwenda ve kunwana ti bampangi na beno. Konso muntu kuvutuka na nzo na yandi, sambu mono muntu me sala nde diambu yai kusalama.”’”+ Yo yina, bo lemfukilaka ndinga ya Yehowa, bo vutukaka, mpi bo kwendaka ve kunwanisa Yeroboami.

5 Rehoboami vandaka kuzinga na Yeruzalemi mpi yandi tungaka bambanza ya ngolo na Yuda.6 Ebuna yandi tungaka* Betelemi,+ Etami, Tekoa,+ 7 Bete-sure, Soko,+ Adulami,+ 8 Gati,+ Maresha, Zifi,+ 9 Adorayimi, Lakishi,+ Azeka,+ 10 Sora, Ayaloni,+ mpi Ebroni,+ bambanza ya ngolo yina vandaka na Yuda mpi na Benyamini. 11 Yandi kumisaka diaka ngolo bisika ya ngolo, yandi tulaka bakomanda na kati na yo, mpi yandi vandaka kupesa bo madia, mafuta, ti vinu, 12 mpi yandi pesaka bambanza yonso bitaninu ya nene ti makonga; yandi kumisaka yo ngolo mingi kibeni. Ebuna Yuda ti Benyamini bikalaka ya yandi.

13 Banganga-nzambi ti Balevi yina vandaka na Izraele ya mvimba kuditulaka na ndambu na yandi, bo katukaka na bateritware na bo yonso. 14 Balevi bikisaka banseke na bo ti bantoto na bo+ mpi bo kwisaka na Yuda mpi na Yeruzalemi, sambu Yeroboami ti bana na yandi katulaka bo sambu bo sadila diaka ve Yehowa bonso banganga-nzambi.+ 15 Ebuna Yeroboami tulaka banganga-nzambi na yandi mosi sambu na bisika ya kunanguka+ mpi sambu na bademo yina kele bonso bankombo*+ mpi sambu na bana-bangombe yina yandi salaka.+ 16 Mpi bantu ya makanda yonso ya Izraele yina vandaka ti lukanu na ntima na bo ya kusosa Yehowa Nzambi ya Izraele landaka bo na Yeruzalemi sambu na kupesa bimenga na Yehowa Nzambi ya ba-nkaka na bo.+ 17 Na nsungi ya bamvula tatu bo kumisaka ngolo kimfumu ya Yuda mpi bo pesaka Rehoboami mwana ya Salomo maboko, sambu bo tambulaka na nzila ya Davidi mpi ya Salomo bamvula tatu.

18 Ebuna Rehoboami kwelaka Mahalati, mwana-nkento ya Yerimoti mwana ya Davidi mpi ya Abihaile mwana-nkento ya Eliabi mwana ya Yese.+ 19 Na nima yandi butilaka yandi bana yai: Yeushi, Shemaria, mpi Zahami. 20 Na nima ya Mahalati, Rehoboami kwelaka Maaka mutekolo ya Absalomi.+ Na nima yandi butilaka yandi Abiya,+ Atai, Ziza, mpi Shelomiti. 21 Rehoboami vandaka kuzola Maaka mutekolo ya Absalomi mingi kuluta bankento ti bamakangu na yandi yonso ya nkaka,+ sambu yandi kwelaka bankento 18 mpi bakaka bamakangu 60, mpi yandi butaka bana-babakala to 28 mpi bana-bankento 60. 22 Yo yina Rehoboami tulaka Abiya mwana ya Maaka mfumu mpi ntwadisi ya bampangi na yandi, sambu yandi vandaka ti lukanu ya kukumisa yandi ntotila. 23 Kansi, yandi salaka mambu ti mayele mpi yandi tindaka* bana na yandi ya nkaka na bantoto yonso ya Yuda mpi ya Benyamini, na bambanza yonso ya ngolo,+ mpi yandi pesaka bo madia mingi mpi bakilaka bo bankento mingi.