Yobi

2 Kilumbu mosi diaka, ntangu bana ya Nzambi ya kieleka*+ kotaka sambu na kumonika na ntwala ya Yehowa,+ Satana mpi kotaka na kati na bo sambu na kumonika na ntwala ya Yehowa.+

2 Ebuna Yehowa tubilaka Satana nde: “Nge me katuka na wapi?” Satana vutudilaka Yehowa nde: “Na kulenga-lenga na ntoto mpi na kutambula-tambula na kati na yo.”+ 3 Ebuna Yehowa tubilaka Satana nde: “Keti nge me tula dikebi* na nsadi na mono Yobi? Kele ve ti muntu bonso yandi na ntoto. Yandi kele muntu ya mbote mpi ya kwikama,*+ yina ke waka Nzambi boma, mpi ke tinaka mambu ya mbi. Yandi ke kangama kaka ngolo na kwikama na yandi,+ ata nge ke meka kupusa mono na kusala yandi mbi+ sambu na kufwa* yandi kukonda kikuma.” 4 Kansi Satana tubilaka Yehowa nde: “Mpusu sambu na mpusu. Muntu ta pesa konso kima yina yandi kele na yo sambu na luzingu* na yandi. 5 Kansi, sambu na kusoba, tandula diboko na nge mpi bebisa mukwa na yandi ti nsuni na yandi, mpi yandi ta singa nge kibeni na meso* na nge.”+

6 Ebuna Yehowa tubilaka Satana nde: “Tala! Yandi kele na maboko na nge!* Kansi kubaka ve luzingu* na yandi!” 7 Yo yina Satana katukaka na ntwala* ya Yehowa mpi basikaka, mpi yandi basisaka Yobi bivimbu ya mpasi kibeni*+ katuka na makulu tii na ntu. 8 Ebuna Yobi bakaka kipesi ya dibungu ya ntoto sambu na kudikwanza, mpi yandi vandaka na putulu ya tiya.+

9 Nsuka-nsuka nkento na yandi tubilaka yandi nde: “Keti nge ke kangama kaka ngolo na kwikama na nge? Singa Nzambi mpi fwa!” 10 Kansi Yobi tubilaka yandi nde: “Nge ke tuba bonso mosi na kati ya bankento ya me konda mayele. Keti beto fwete ndima kaka mambu ya mbote ya ke katuka na Nzambi ya kieleka kansi kundima mpi ve mambu ya mbi?”+ Na mambu yai yonso, Yobi salaka ve disumu na bikobo na yandi.+

11 Banduku tatu ya Yobi* waka bampasi yonso yina kuminaka yandi, ebuna konso muntu katukaka na kisika na yandi mpi kwisaka—Elifazi+ muntu ya Temani, Bildadi+ muntu ya Shua,+ mpi Sofare+ muntu ya Naama. Yo yina bo wakanaka na kuvukana kumosi sambu na kukwenda kuwa mawa ti Yobi mpi kulembika yandi. 12 Ntangu bo monaka yandi na kintama, bo zabaka yandi ve. Bo yantikaka kudila ngolo mpi kupasula bilele na bo, ebuna bo vandaka kulosa mfututu na zulu mpi na zulu ya ba-ntu na bo.+ 13 Na nima, bo vandaka na ntoto kumosi ti Yobi bilumbu nsambwadi mpi bampimpa nsambwadi. Ata muntu mosi ve tubilaka yandi ata kima mosi, sambu bo monaka nde mpasi na yandi vandaka ngolo kibeni.+