Kulonga

9 “O Izraele wa, bubu yai nge ke sabuka Yordani+ sambu na kukota mpi kubotula makanda yina kele nene mpi ngolo kuluta nge,+ bambanza ya nene mpi ya kele ti bibaka tii na zulu,*+ 2 bantu ya nene mpi ya nda, bana ya Anaki,+ bantu yina nge me zaba mpi me waka bantu ke tuba sambu na bo nde, ‘Nani lenda telama na ntwala ya bana ya Anaki?’ 3 Yo yina, nge fwete zaba bubu yai nde Yehowa Nzambi na nge ta sabuka na ntwala na nge.+ Yandi kele tiya ya ke yokaka,+ mpi yandi ta manisa bo. Yandi ta bedisa bo na meso na nge sambu nge kula bo* nswalu mpi nge fwa bo, kaka mutindu Yehowa me sila nge.+

4 Ntangu Yehowa Nzambi na nge ta kula bo na ntwala na nge, kutuba ve na ntima na nge nde, ‘Kana Yehowa me kotisa mono sambu na kubaka ntoto yai,+ yo vandaka sambu na lunungu na mono.’ Kansi, kana Yehowa ke kula bo na ntwala na nge, yo kele sambu na mbi ya makanda yai.+ 5 Kana nge ke kota sambu na kubaka ntoto na bo, yo kele ve sambu na lunungu na nge to sambu ntima na nge kele ya kusungama. Kansi, yo kele sambu na mbi ya makanda yai, yo yina Yehowa Nzambi na nge ke kula bo na ntwala na nge,+ mpi sambu na kuzitisa ndinga yina Yehowa zengaka kieleka na ba-nkaka na nge, Abrahami,+ Izaki+ mpi Yakobi.+ 6 Yo yina, zaba nde kana Yehowa Nzambi na nge ke pesa nge insi yai ya mbote sambu na kubaka yo, yo kele ve sambu na lunungu na nge, mpamba ve beno kele bantu ya ntu-ngolo.*+

7 Yibuka—kuvila ve ata fioti—mutindu nge pesaka Yehowa Nzambi na nge makasi na ntoto-makanga.+ Katuka kilumbu yina nge bikisaka insi ya Ezipte tii ya beno me kwisa na kisika yai, beno me kolamaka na Yehowa.+ 8 Ata na Orebi, beno pesaka Yehowa makasi, ebuna Yehowa wilaka beno makasi kibeni na mpila nde yandi zolaka kumanisa beno.+ 9 Ntangu mono tombukaka na ngumba sambu na kubaka matadi,+ matadi ya kuwakana yina Yehowa salaka ti beno,+ mono bikalaka na ngumba yina bilumbu 40 mpi bampimpa 40,+ kukonda kudia mpi kunwa masa. 10 Ebuna Yehowa pesaka mono matadi yina zole yina musapi ya Nzambi sonikaka, mpi mambu yonso yina Yehowa tubilaka beno na zulu ya ngumba na kati-kati ya tiya na kilumbu ya lukutakanu.*+ 11 Na nsuka ya bilumbu 40 mpi ya bampimpa 40, Yehowa pesaka mono matadi zole yina, matadi ya kuwakana, 12 mpi Yehowa songaka mono nde, ‘Telama, katuka awa mpi kulumuka nswalu, sambu bantu na nge yina nge basisaka na Ezipte me sala mambu ya mbi.+ Bo me yambula nswalu nzila yina mono songaka bo na kulanda. Bo me kudisadila+ kiteki ya kibende.’* 13 Ebuna Yehowa tubilaka mono nde, ‘Mono me mona bantu yai, mpi ya kieleka bo kele bantu ya ntu-ngolo.*+ 14 Bika mono, ebuna mono ta manisa bo mpi ta katula zina na bo kimakulu na zulu ya ntoto, mpi bika mono kumisa nge dikanda mosi ya ngolo mpi ya bantu mingi kuluta bo.’+

15 “Na nima, mono balukaka mpi kulumukaka na ngumba na ntangu ngumba vandaka kupela tiya,+ mpi matadi yina zole ya kuwakana vandaka na maboko+ na mono yonso zole. 16 Ebuna mono talaka mpi monaka nde beno salaka disumu na ntwala ya Yehowa Nzambi na beno! Beno kudisadilaka mwana-ngombe ya kibende.* Beno yambulaka nswalu nzila yina Yehowa songaka beno na kulanda.+ 17 Yo yina mono bakaka matadi yina zole ebuna na maboko na mono yonso zole mono losaka yo na ntoto mpi mono panzaka yo na meso na beno.+ 18 Ebuna mono fukamaka na ntwala ya Yehowa, bonso na mbala ya ntete, bilumbu ⁴⁰ mpi bampimpa ⁴⁰. Mono diaka ve mpi nwaka ve masa,+ sambu na masumu yonso ya beno salaka na mutindu beno salaka mambu ya mbi na meso ya Yehowa mpi na mutindu beno pesaka yandi makasi. 19 Sambu mono waka boma mingi sambu na makasi ya ngolo yina Yehowa wilaka beno,+ na mutindu yandi zolaka kumanisa beno. Kansi na mbala yai mpi,+ Yehowa wilaka mono.

20 “Yehowa wilaka Aroni makasi kibeni na mpila nde yandi zolaka kufwa yandi,+ kansi mono bondilaka mpi sambu na Aroni na ntangu yina. 21 Ebuna mono bakaka kima ya disumu yina beno salaka, mwana-ngombe,+ mpi mono yokaka yo na tiya; mono panzaka yo mpi tutaka yo mbote-mbote tii kuna yo kumaka fioti-fioti bonso mfututu, ebuna mono losaka putulu yina na masa yina vandaka kukulumuka katuka na ngumba.+

22 “Diaka, na Tabera,+ na Massa,+ mpi na Kibroti-hatava,+ beno pusaka mpi Yehowa na kuwa makasi. 23 Ntangu Yehowa tindaka beno katuka na Kadeshi-barnea+ mpi tubaka nde, ‘Beno tombuka mpi beno baka insi yina mono ta pesa beno kibeni!’ beno kolamaka diaka na mambu yina Yehowa Nzambi na beno songaka beno,+ mpi beno monisaka ve lukwikilu+ na yandi mpi beno lemfukilaka yandi ve. 24 Katuka ntangu ya mono me zabaka beno, beno ke kolamaka kaka na Yehowa.

25 “Yo yina mono landaka kufukama na ntwala ya Yehowa bilumbu 40 mpi bampimpa 40,+ mpi mono fukamaka mutindu yina sambu Yehowa tubaka nde yandi zolaka kumanisa beno. 26 Mono yantikaka kubondila Yehowa mpi kutuba nde, ‘O Yehowa Mfumu ya Kuluta Nene, kufwa ve bantu na nge. Bo kele kima na nge mosi*+ yina nge sumbaka diaka na nsadisa ya bunene na nge mpi yina nge basisaka na Ezipte ti diboko ya ngolo.+ 27 Yibuka bansadi na nge Abrahami, Izaki, ti Yakobi.+ Kutula ve dikebi na ntu-ngolo ya bantu yai, na mbi na bo, mpi na masumu+ na bo. 28 Kana ve, bantu ya insi yina nge basisaka beto ta tuba nde: “Yehowa kukaka ve kunata bo na insi yina yandi silaka bo, ebuna sambu yandi vandaka kumenga bo, yandi basisaka bo sambu na kufwa bo na ntoto-makanga.”+ 29 Sambu bo kele bantu na nge mpi kima na nge mosi,*+ bayina nge basisaka ti ngolo na nge ya nene mpi diboko na nge ya kutandula.’+