Yeremia

7 Yai mambu yina katukaka na Yehowa mpi kwisilaka Yeremia: 2 “Telama na kielo ya nzo ya Yehowa mpi zabisa nsangu yai kuna, ‘Beno wa ndinga ya Yehowa, beno yonso bantu ya Yuda yina ke kotaka na bakielo yai sambu na kufukama na ntwala ya Yehowa. 3 Yehowa ya makesa, Nzambi ya Izraele, ke tuba nde: “Beno tomisa banzila na beno mpi bisalu na beno, ebuna mono ta pesa beno nzila ya kulanda kuzinga na kisika yai.+ 4 Beno tula ve ntima na mambu ya luvunu mpi beno tuba ve nde, ‘Yai* tempelo ya Yehowa, tempelo ya Yehowa, tempelo ya Yehowa!’+ 5 Sambu kana beno tomisa kibeni banzila mpi bisalu na beno; kana beno sambisa kibeni na lunungu na kati ya muntu mpi nkweno na yandi;+ 6 kana beno niokula ve banzenza, bana-nsiona,* mpi mifwidi ya bankento;+ kana beno tiamuna ve menga ya bantu yina me sala kima ve na kisika yai; mpi kana beno landa ve banzambi ya nkaka ebuna yo natila beno mpasi;+ 7 mono ta pesa beno nzila ya kulanda kuzinga na kisika yai, na ntoto yina mono pesaka ba-nkaka na beno sambu na ntangu yonso.”’”*

8 “Kansi beno ke tula ntima na mambu ya luvunu+—yo ta nata mambote ve ata fioti. 9 Keti beno lenda yiba,+ kufwa bantu, kusala bizumba, kuzenga kieleka na luvunu,+ kupesa bimenga na Baale,*+ mpi kulanda banzambi yina beno zabaka ve, 10 ebuna beno kwisa mpi beno telama na ntwala na mono na nzo yai ya kele ti zina na mono mpi beno tuba nde, ‘Beto ta guluka,’ ata beno ke sala mambu yai yonso ya nzanzi? 11 Keti nzo yai ya kele ti zina na mono me kuma nzo ya miyibi na meso na beno?+ Tala, mono me mona yo mono mosi,” Yehowa muntu me tuba.

12 “‘Kansi, beno kwenda ntangu yai na kisika na mono yina kele na Shilo,+ kisika ya ntete yina mono salaka nde zina na mono kuvanda,+ mpi beno tala mambu yina mono salaka yo sambu na mambi ya bantu na mono Izraele.+ 13 Kansi beno landaka kusala mambu yai yonso,’ Yehowa muntu me tuba, ‘mpi ata mono tubilaka beno mbala na mbala,* beno waka ve.+ Mono landaka kubinga beno, kansi beno vandaka kundima ve.+ 14 Yo yina, mono ta sala nzo yina kele ti zina na mono,+ nzo yina beno ke tudila ntima,+ mpi kisika yai ya mono pesaka beno mpi ba-nkaka na beno, kaka mutindu mono salaka Shilo.+ 15 Mono ta kula beno na meso na mono, kaka mutindu mono kulaka bampangi na beno yonso, bana ya Efrayimi yonso.’+

16 “Kansi nge, kusamba ve sambu na bantu yai. Kubinga ve, kusala ve kisambu, mpi kubondila mono ve sambu na bo,+ sambu mono ta wa nge ve.+ 17 Keti nge ke mona ve mambu yina bo ke sala na bambanza ya Yuda mpi na babala-bala ya Yeruzalemi? 18 Bana ke lokuta bankuni, batata ke pedisa tiya, mpi bankento ke bula pate sambu na kusala bagato ya kupesa bimenga na Ntotila-Nkento ya Zulu,*+ mpi bo ke tiamuna makabu ya malafu na banzambi ya nkaka sambu na kupesa mono makasi.+ 19 ‘Kansi, keti mono kele muntu yina bo ke pesa mpasi?’* Yehowa muntu me tuba. ‘Keti yo kele bo mosi ve, sambu na nsoni na bo mosi?’+ 20 Yo yina Yehowa Mfumu ya Kuluta Nene ke tuba nde, ‘Tala! Mono ta monisa makasi na mono mpi nganzi na mono na kisika yai,+ na bantu mpi na bambisi, na banti ya bilanga mpi na bambuma ya ntoto; yo ta pela mpi yo ta fwa ve.’+

21 “Yehowa ya makesa, Nzambi ya Izraele, ke tuba nde, ‘Beno kwenda, beno yika makabu na beno ya mvimba ya kuyoka na bimenga na beno ya nkaka, mpi beno dia yo beno mosi.+ 22 Sambu kilumbu yina mono basisaka ba-nkaka na beno na insi ya Ezipte, mono solulaka ve ti bo mpi mono pesaka bo ve nsiku ya ke tadila makabu ya mvimba ya kuyoka mpi bimenga.+ 23 Kansi mono pesaka bo nsiku yai: “Beno lemfukila ndinga na mono, ebuna mono ta kuma Nzambi na beno, mpi beno ta kuma bantu na mono.+ Beno fwete tambula na nzila yonso ya mono ke songa beno, sambu mambu kukwendila mbote sambu na beno.”’+ 24 Ata mpidina bo waka ve mpi bo tulaka ve makutu;+ kansi, bo tambulaka na balukanu* na bo mosi, bo landaka ntima na bo ya mbi na ntu-ngolo yonso,+ ebuna bo vutukaka na nima, kansi bo kwendaka ve na ntwala, 25 katuka kilumbu yina ba-nkaka na beno basikaka na insi ya Ezipte tii bubu yai.+ Yo yina, mono landaka kutindila beno bansadi na mono yonso bambikudi, mono vandaka kutinda bo konso kilumbu, mbala na mbala.*+ 26 Ata mpidina, bo buyaka kuwa mono, mpi bo tulaka ve makutu.+ Kansi, bo vandaka ntu-ngolo,* mpi bo salaka mambu ya mbi kuluta ba-nkaka na bo!

27 “Nge ta tubila bo mambu yai yonso,+ kansi bo ta wa nge ve; nge ta binga bo, kansi bo ta ndima ve. 28 Mpi nge ta tubila bo nde, ‘Yai dikanda yina lemfukilaka ve ndinga ya Yehowa Nzambi na bo mpi yina buyaka kundima ndola. Kwikama me vila mpi bo ke tubila yo nkutu ve na kati na bo.’*+

29 “Zenga nsuki na nge yina nge ke zengaka ve* mpi losa yo, ebuna yimba nkunga ya mawa* na bangumba ya fioti yina me konda banti, sambu Yehowa me buya mpi ta yambula ndonga yai ya bantu yina me pesa yandi makasi ya ngolo. 30 ‘Sambu bantu ya Yuda me sala mambu ya mbi na meso na mono,’ Yehowa muntu me tuba. ‘Bo me tedimisa biteki na bo ya nzanzi na nzo yina kele ti zina na mono, sambu na kukumisa yo mvindu.+ 31 Bo me tunga bisika ya kunanguka ya Tofeti, yina kele na Muwanda ya Mwana ya Inomi,*+ sambu na kuyoka* bana na bo ya babakala mpi ya bankento na tiya,+ diambu yina mono songaka bo ve mpi yina me kwisilaka mono ntete ve ata fioti na ntima.’*+

32 “‘Yo yina tala! bilumbu ke kwisa,’ Yehowa muntu me tuba, ‘ntangu bo ta binga yo diaka ve Tofeti to Muwanda ya Mwana ya Inomi* kansi bo ta binga yo Muwanda ya Kufwila Bantu. Bo ta zika bamvumbi na Tofeti tii kuna kisika ta vanda diaka ve.+ 33 Mpi bamvumbi ya bantu yai ta kuma madia sambu na bandeke ya zulu mpi sambu na bambisi ya ntoto, mpi ata muntu mosi ve ta tinisa bo na boma.+ 34 Mono ta sukisa makelele ya kuyangalala mpi milolo ya kiese, ndinga ya bakala yina ke kwela mpi ndinga ya nkento yina ke kwela,+ na bambanza ya Yuda mpi na babala-bala ya Yeruzalemi, sambu insi yai ta kuma mayumbu.’”+