Ezekiele

5 “Kansi nge, mwana ya muntu, baka mbele mosi ya bitumba ya makasi sambu nge sadila yo bonso lutebu ya muntu yina ke zengaka nsuki. Zenga nsuki na nge ti mandefo na nge, na nima baka bakilo sambu na kutesa mpi kukabisa nsuki yina ndambu-ndambu. 2 Nge ta yoka ndambu mosi na kati ya bandambu na yo tatu na tiya na kati ya mbanza ntangu bilumbu ya kuziunga ta mana.+ Ebuna nge ta baka ndambu mosi ya nkaka na kati ya bandambu tatu mpi ta bula yo mbele ya bitumba na nziunga ya mbanza,*+ mpi ndambu ya nsuka na kati ya bandambu tatu nge ta panza yo na mupepe, ebuna mono ta basisa mbele ya bitumba sambu na kulanda yo.+

3 “Nge fwete baka mpi mwa ndambu na yo mpi kudimba yo na bansongi* ya lele na nge. 4 Baka diaka ndambu na yo ya nkaka, losa yo na tiya mpi yo zika. Tiya ta basika na tiya yina, mpi yo ta panzana na nzo ya mvimba ya Izraele.+

5 “Yehowa Mfumu ya Kuluta Nene me tuba nde: ‘Yai Yeruzalemi. Mono me tula yandi na kati-kati ya makanda, ti bansi na nziunga na yandi. 6 Kansi yandi me kolama na bankanu na mono ti na bansiku na mono mpi yandi ke sala mambu ya mbi kuluta makanda ti bansi yina kele na nziunga na yandi.+ Sambu bo me buyaka bankanu na mono, mpi bo zitisaka ve bansiku na mono.’

7 “Yo yina, Yehowa Mfumu ya Kuluta Nene me tuba nde: ‘Sambu beno salaka mavwanga mingi kuluta makanda yina kele na nziunga na beno mpi beno zitisaka ve bansiku na mono ti bankanu na mono, kansi beno landaka bankanu ya makanda yina kele na nziunga na beno,+ 8 Yehowa Mfumu ya Kuluta Nene ke tuba nde: “O mbanza,+ mono ke nwanisa nge, mpi mono ta pesa nge ndola na meso ya makanda.+ 9 Mono ta sala na kati na nge mambu yina mono me salaka ntete ve, mpi mambu ya mutindu yina mono ta salaka yo diaka ve, sambu na mambu na nge yonso ya mbi.+

10 “‘“Yo yina, batata yina kele na kati na nge ta dia bana na bo,+ mpi bana ta dia batata na bo, ebuna mono ta zenga makambu na kati na nge mpi ta panza bantu yonso yina ta bikala na kati na nge na konso ndambu.”’*+

11 “‘Yo yina, ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘sambu yo vandaka kisika na mono ya santu yina nge kumisaka mvindu ti biteki na nge yonso ya nzanzi mpi ti mambu na nge yonso ya mbi,+ mono mpi ta buya* nge; disu na mono ta wa ve mawa, mpi mono ta monisa ve ntima ya mawa.+ 12 Ndambu mosi na kati ya bandambu na nge tatu ta fwa na kipupa* to ta fwa na nzala na kati na nge. Ndambu ya nkaka na kati ya bandambu tatu ta fwa na nziunga na nge na mbele ya bitumba.+ Mpi ndambu ya nsuka na kati ya bandambu tatu, mono ta panza bo na konso ndambu,* mpi mono ta basisa mbele ya bitumba sambu na kukula bo.+ 13 Ebuna makasi na mono ta kuma na nsuka, mpi nganzi ya mono ke wila bo ta lembama, mpi mono ta wa kiese.+ Ebuna bo ta zaba nde mono, Yehowa, muntu me tuba sambu mono ke lombaka kibeni nde bo kangama kaka na mono,+ ntangu mono ta manisa kumonisila bo makasi na mono.

14 “‘Mono ta kumisa nge kisika mosi ya kubeba mpi kima mosi ya nsoni na kati ya makanda yina kele na nziunga mpi na meso ya konso muntu yina ke luta.+ 15 Nge ta kuma kima ya nsoni mpi ya kuvweza,+ mbandu ya ke pesa lukebisu mpi kima ya ke pesa boma na makanda yina kele na nziunga na nge, ntangu mono ta zenga makambu na nge na makasi, na nganzi, mpi ti bandola ya ngolo. Mono, Yehowa, muntu me tuba.

16 “‘Mono ta tindila bo batolo-tolo ya nzala ya ke nataka na lufwa sambu na kufwa bo. Batolo-tolo yina mono ta tinda ta fwa beno.+ Mono ta sala nde nzala kukumina beno ngolo na ntangu mono ta zenga kima ya ke pesaka beno madia.*+ 17 Mono ta tindila beno nzala mpi bambisi ya makasi ya mfinda,+ ebuna yo ta bika beno kukonda bana. Kipupa ti lufwa ta fuluka na kati na nge, mpi mono ta nata mbele ya bitumba sambu na kunwanisa nge.+ Mono, Yehowa, muntu me tuba.’”