2 Bantotila

15 Na mvula ya 27 ya Yeroboami ntotila ya Izraele, Azaria+ mwana ya Amasia+ ntotila ya Yuda kumaka ntotila.+ 2 Yandi vandaka ti bamvula 16 ntangu yandi kumaka ntotila, mpi yandi yalaka bamvula 52 na Yeruzalemi. Zina ya mama na yandi Yekolia muntu ya Yeruzalemi. 3 Yandi landaka kusala mambu ya mbote na meso ya Yehowa, kaka mutindu tata na yandi Amasia salaka.+ 4 Kansi bo katulaka+ ve bisika ya kunanguka, mpi bantu vandaka kaka kutambika mpi kupesa midinga ya bimenga na zulu ya bisika ya kunanguka.+ 5 Yehowa pesaka ntotila mpasi, mpi yandi bikalaka muntu ya maladi ya lepre+ tii na kilumbu ya lufwa na yandi; mpi yandi vandaka kuzinga na nzo mosi ya kingenga,+ na ntangu yina Yotami+ mwana ya ntotila vandaka kutwadisa nzo* mpi yandi vandaka kusambisa bantu ya insi.+ 6 Sambu na mambu ya nkaka ya Azaria+ salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Yuda? 7 Ebuna Azaria lalaka sambu na kupema ti ba-nkaka na yandi,+ mpi bo zikaka yandi ti ba-nkaka na yandi na Mbanza ya Davidi; ebuna mwana na yandi Yotami kumaka ntotila na kisika na yandi.

8 Na mvula ya 38 ya Azaria+ ntotila ya Yuda, Zekaria+ mwana ya Yeroboami kumaka ntotila ya Izraele na Samaria, mpi yandi yalaka bangonda sambanu. 9 Yandi salaka mambu ya mbi na meso ya Yehowa, kaka mutindu ba-nkaka na yandi salaka. Yandi yambulaka ve masumu yina Yeroboami mwana ya Nebati pusaka Izraele na kusala.+ 10 Ebuna Shalumi mwana ya Yabeshi sadilaka yandi komplo mpi fwaka yandi+ na Ibleami.+ Na nima ya kufwa Zekaria, yandi kumaka ntotila na kisika na yandi. 11 Sambu na mambu ya nkaka ya Zekaria salaka, bo me sonikaka yo na mukanda ya bansangu ya bantotila ya Izraele. 12 Diambu yai lungisaka mambu yina Yehowa tubaka na nzila ya Yehu nde: “Bandonga iya ya bana na nge+ ta vanda na kiti ya kimfumu ya Izraele.”+ Mpi yo salamaka mutindu yina.

13 Shalumi mwana ya Yabeshi kumaka ntotila na mvula ya 39 ya Uziya+ ntotila ya Yuda, mpi yandi yalaka ngonda ya mvimba na Samaria. 14 Ebuna Menahemi mwana ya Gadi katukaka na Tirsa,+ yandi kwisaka na Samaria, mpi fwaka Shalumi+ mwana ya Yabeshi na Samaria. Na nima ya kufwa Shalumi, yandi kumaka ntotila na kisika na yandi. 15 Sambu na mambu ya nkaka ya Shalumi salaka mpi komplo yina yandi salaka, bo me sonikaka yo na mukanda ya bansangu ya bantotila ya Izraele. 16 Na ntangu yina, Menahemi katukaka na Tirsa, yandi fwaka Tifsa ti bantu yonso yina vandaka na kati na yo mpi teritware na yo, sambu yo kangudilaka yandi ve kielo na yo. Yandi fwaka yo mpi yandi pasulaka mavumu ya bankento ya kisika yina, bayina vandaka na mavumu.

17 Na mvula ya 39 ya Azaria ntotila ya Yuda, Menahemi mwana ya Gadi kumaka ntotila ya Izraele, mpi yandi yalaka bamvula kumi na Samaria. 18 Yandi landaka kusala mambu ya mbi na meso ya Yehowa. Yandi yambulaka ve masumu yonso yina Yeroboami mwana ya Nebati pusaka Izraele na kusala,+ bilumbu na yandi yonso. 19 Pule,+ ntotila ya Asiria kotaka na insi, mpi Menahemi pesaka Pule batalanta* 1 000 ya arza sambu yandi sadisaka yandi na kukumisa kimfumu na yandi ngolo.+ 20 Yo yina Menahemi bakaka arza na Izraele na mutindu yandi lombaka yo na bantu ya lukumu, na bamvwama.+ Yandi pesaka ntotila ya Asiria bashekele* 50 ya arza sambu na konso muntu. Ebuna ntotila ya Asiria vutukaka mpi yandi bikalaka ve na insi yina. 21 Sambu na mambu ya nkaka ya Menahemi+ salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Izraele? 22 Na nima Menahemi lalaka sambu na kupema ti ba-nkaka na yandi; ebuna mwana na yandi Pekaya kumaka ntotila na kisika na yandi.

23 Na mvula ya 50 ya Azaria ntotila ya Yuda, Pekaya mwana ya Menahemi kumaka ntotila ya Izraele na Samaria, mpi yandi yalaka bamvula zole. 24 Yandi landaka kusala mambu ya mbi na meso ya Yehowa. Yandi yambulaka ve masumu yina Yeroboami mwana ya Nebati pusaka Izraele na kusala.+ 25 Ebuna Peka+ mwana ya Remalia, soda yina vandaka kusadisa yandi, sadilaka yandi komplo mpi fwaka yandi na Samaria, na nzo-zulu ya nzo ya ntotila yina kele ti bibaka ya ngolo, ti Argobi mpi Ariye. Yandi vandaka ti bantu 50 ya Gileadi; mpi na nima ya kufwa yandi, yandi kumaka ntotila na kisika na yandi. 26 Sambu na mambu ya nkaka ya Pekaya salaka, yonso yina yandi salaka, bo me sonikaka yo na mukanda ya bansangu ya bantotila ya Izraele.

27 Na mvula ya 52 ya Azaria ntotila ya Yuda, Peka+ mwana ya Remalia kumaka ntotila ya Izraele na Samaria, mpi yandi yalaka bamvula 20. 28 Yandi landaka kusala mambu ya mbi na meso ya Yehowa, mpi yandi yambulaka ve masumu yina Yeroboami mwana ya Nebati pusaka Izraele na kusala.+ 29 Na bilumbu ya ntotila Peka ya Izraele, Tiglati-pilesere+ ntotila ya Asiria kotaka na ngolo mpi botulaka Iyoni, Abele-bete-maka,+ Yanoa, Kedeshi,+ Asore, Gileadi,+ mpi Galilea—ntoto ya mvimba ya Naftali+—mpi yandi nataka bantu ya babwala yina na Asiria.+ 30 Na nima Oshea+ mwana ya Ela sadilaka Peka mwana ya Remalia komplo, yandi bulaka yandi mpi fwaka yandi; ebuna yandi kumaka ntotila na kisika na yandi na mvula ya 20 ya Yotami+ mwana ya Uziya. 31 Sambu na mambu ya nkaka ya Peka salaka, yonso yina yandi salaka, bo me sonikaka yo na mukanda ya bansangu ya bantotila ya Izraele.

32 Na mvula ya zole ya Peka mwana ya Remalia ntotila ya Izraele, Yotami+ mwana ya Uziya+ ntotila ya Yuda kumaka ntotila. 33 Yandi vandaka ti bamvula 25 ntangu yandi kumaka ntotila, mpi yandi yalaka bamvula 16 na Yeruzalemi. Zina ya mama na yandi Yerusha mwana ya Zadoki.+ 34 Yandi landaka kusala mambu ya mbote na meso ya Yehowa, kaka mutindu tata na yandi Uziya salaka.+ 35 Kansi bo katulaka ve bisika ya kunanguka, mpi bantu vandaka kaka kutambika mpi kupesa midinga ya bimenga na bisika ya kunanguka.+ Yandi muntu tungaka kielo ya zulu ya nzo ya Yehowa.+ 36 Sambu na mambu ya nkaka ya Yotami salaka, mambu yina yandi salaka, keti bo me sonikaka yo ve na mukanda ya bansangu ya bantotila ya Yuda? 37 Na bilumbu yina, Yehowa yantikaka kutinda Resini ntotila ya Siria mpi Peka+ mwana ya Remalia sambu na kunwanisa Yuda.+ 38 Na nima, Yotami lalaka sambu na kupema ti ba-nkaka na yandi mpi bo zikaka yandi ti ba-nkaka na yandi na Mbanza ya nkaka na yandi Davidi. Ebuna mwana na yandi Ahazi kumaka ntotila na kisika na yandi.