Esdrasi

3 Ntangu ngonda ya nsambwadi+ lungaka mpi bantu ya Izraele* vandaka na bambanza na bo, bo vukanaka kisika mosi ti ngindu mosi na Yeruzalemi. 2 Yeshua+ mwana ya Yehosadaki ti bampangi na yandi banganga-nzambi mpi Zorobabele+ mwana ya Shealtiele+ ti bampangi na yandi telamaka mpi tungaka mesa-kimenga ya Nzambi ya Izraele, mpidina bo lendaka kupesa bimenga ya kuyoka na zulu na yo, mutindu bo me sonikaka na Nsiku ya Moize+ muntu ya Nzambi ya kieleka.

3 Yo yina bo tedimisaka mesa-kimenga na kisika na yo ya ntete, ata bo vandaka na boma ya bantu ya bansi ya nziunga,+ mpi bo yantikaka kupesa bimenga ya kuyoka na Yehowa na zulu na yo, bimenga ya kuyoka ya suka mpi ya nkokila.+ 4 Ebuna bo salaka Nkinsi ya Bisasa* na kuwakana ti mambu yina kele ya kusonika,+ mpi konso kilumbu bo vandaka kupesa ntalu yina bo tulaka ya bimenga ya kuyoka yina yo vandaka kulomba nde bo pesa konso kilumbu.+ 5 Na nima bo vandaka kupesa dikabu ya kuyoka ya mbala na mbala+ mpi makabu sambu na bangonda ya mpa+ mpi makabu sambu na bansungi yonso ya bankinsi+ ya Yehowa yina vandaka ya kusantisa, mpi makabu yina vandaka kukatuka na konso muntu yina vandaka kupesa na luzolo yonso dikabu ya luzolo ya mbote+ na Yehowa. 6 Yantika na kilumbu ya ntete ya ngonda ya nsambwadi,+ bo yantikaka kupesa bimenga ya kuyoka na Yehowa, ata bo vandaka me tula ntete ve fondasio ya tempelo ya Yehowa.

7 Bo pesaka mbongo na bantu yina ke zengaka matadi+ ti na bantu yina ke salaka bisalu ya maboko,+ mpi bo pesaka madia, bima ya kunwa, mpi mafuta na bantu ya Sidoni mpi na bantu ya Tire sambu bo nata banti ya sedre na nzila ya nzadi-mungwa katuka na Libani tii na Yope,+ na kuwakana ti nswa yina ntotila Sirusi ya Persia pesaka bo.+

8 Na mvula ya zole, na nima ya kukwisa na bo na nzo ya Nzambi ya kieleka na Yeruzalemi, na ngonda ya zole, Zorobabele mwana ya Shealtiele, Yeshua mwana ya Yehosadaki mpi bampangi na bo ya nkaka, banganga-nzambi ti Balevi, mpi bantu yonso yina basikaka na kimpika+ mpi kwisaka na Yeruzalemi yantikaka kisalu; Balevi yina vandaka ti bamvula yantika 20 mata, bo tulaka bo bantwadisi ya kisalu ya nzo ya Yehowa. 9 Yo yina Yeshua, bana na yandi ti bampangi na yandi ya babakala, mpi Kadmiele ti bana na yandi, bana ya Yuda, vukanaka sambu na kutwadisa bantu yina vandaka kusala kisalu na nzo ya Nzambi ya kieleka, kumosi ti bana ya Enadadi,+ bana na bo mpi bampangi na bo ya babakala, Balevi.

10 Ntangu bantu yina vandaka kutunga tulaka fondasio ya tempelo ya Yehowa,+ banganga-nzambi yina lwataka bilele na bo ya kisalu mpi simbaka bampungi,+ ti Balevi, bana ya Asafi, yina simbaka basembale, bo telamaka sambu na kukumisa Yehowa na kuwakana ti lutwadisu yina ntotila Davidi ya Izraele pesaka.+ 11 Bo yantikaka kuyimba+ bankunga ya lukumu sambu na Yehowa mpi kupesa yandi matondo, “sambu yandi kele mbote; zola na yandi ya kwikama sambu na Izraele ke zingaka kimakulu.”+ Ebuna bantu yonso tulaka milolo ya ngolo ya kupesa Yehowa lukumu sambu bo vandaka me tula fondasio ya nzo ya Yehowa. 12 Mingi na kati ya banganga-nzambi, Balevi, mpi bamfumu ya banzo ya batata—bambuta yina monaka nzo ya ntete+—dilaka na ndinga ya ngolo ntangu bo monaka nde bo ke tula fondasio ya nzo yai, kansi bantu ya nkaka vandaka kutula milolo ya kiese na ndinga ya ngolo.+ 13 Ebuna bantu kukaka ve kuswaswanisa milolo ya kiese ti makelele ya kudila, sambu bantu vandaka kutula milolo ngolo kibeni na mpila nde makelele yina wakanaka na bisika ya ntama.