2 Bantotila

2 Ntangu Yehowa zolaka kunata Eliya+ na zulu na mupepe ya ngolo,+ Eliya ti Elisha+ katukaka na Gilgale mpi kwendaka.+ 2 Eliya tubilaka Elisha nde: “Pardo bikala awa, sambu Yehowa me tinda mono na Betele.” Kansi Elisha tubaka nde: “Ya kieleka mutindu Yehowa kele na luzingu mpi mutindu nge* kele na luzingu, mono ta yambula nge ve.” Yo yina bo kwendaka na Betele.+ 3 Ebuna kimvuka ya bambikudi* yina vandaka na Betele kwisaka kukutana ti Elisha mpi bo tubilaka yandi nde: “Keti nge ke zaba nde bubu yai Yehowa ke katula mfumu na nge sambu yandi vanda diaka ve mfumu na nge?”+ Yandi tubaka nde: “Mono me zaba yo dezia. Beno vanda pima.”

4 Ntangu yai Eliya tubilaka yandi nde: “Pardo Elisha bikala awa, sambu Yehowa me tinda mono na Yeriko.”+ Kansi yandi tubaka nde: “Ya kieleka mutindu Yehowa kele na luzingu mpi mutindu nge* kele na luzingu, mono ta yambula nge ve.” Mpidina bo kumaka na Yeriko. 5 Ebuna kimvuka ya bambikudi yina vandaka na Yeriko kwisaka kutubila Elisha nde: “Keti nge ke zaba nde bubu yai Yehowa ke katula mfumu na nge sambu yandi vanda diaka ve mfumu na nge?” Yandi tubaka nde: “Mono me zaba. Beno vanda pima.”

6 Ntangu yai Eliya tubilaka yandi nde: “Pardo bikala awa, sambu Yehowa me tinda mono na Yordani.” Kansi yandi tubaka nde: “Ya kieleka mutindu Yehowa kele na luzingu mpi mutindu nge* kele na luzingu, mono ta yambula nge ve.” Yo yina bo kwendaka bo zole. 7 Na kati ya kimvuka yina ya bambikudi, bambikudi 50 mpi landaka bo ebuna bo telamaka mwa ntama bo ke tala kansi Eliya ti Elisha telamaka pene-pene ya Yordani. 8 Na nima Eliya bakaka lele na yandi ya kimbikudi,+ balula-balulaka yo, mpi bulaka masa, ebuna masa kabwanaka na diboko ya kimama mpi na diboko ya kitata, yo yina bo sabukaka bo zole na ntoto ya kuyuma.+

9 Ntangu bo sabukaka, Eliya tubilaka Elisha nde: “Lomba kima yina nge ke zola nde mono sadila nge na ntwala nde bo katula mono na ntwala na nge.” Elisha tubaka nde: “Pardo, keti mono lenda baka makabu zole*+ ya mpeve na nge?”+ 10 Yandi vutulaka nde: “Nge me lomba kima mosi ya mpasi. Kana nge mona mono ntangu Nzambi ta katula mono na lweka na nge, yo ta salama mutindu yina sambu na nge; kansi kana nge mona mono ve, yo ta salama ve.”

11 Ntangu bo vandaka kutambula mpi kusolula na nzila, na mbala mosi pusu-pusu ya tiya mpi bampunda ya tiya+ kabulaka bo zole, ebuna Eliya tombukaka na zulu na mupepe ya ngolo.+ 12 Ntangu Elisha vandaka kutala, yandi vandaka kutuba na ndinga ya ngolo nde: “Tata na mono, tata na mono! Pusu-pusu ya Izraele ti bantu na yandi yina ke tambusaka bampunda!”+ Ntangu yandi lendaka diaka ve kumona Eliya, yandi bakaka bilele na yandi mosi mpi pasulaka yo na bandambu zole.+ 13 Na nima, yandi lokutaka lele ya Eliya ya kimbikudi+ yina bwaka, yandi vutukaka mpi telamaka na lweka ya Yordani. 14 Ebuna yandi bakaka lele ya Eliya ya kimbikudi yina bwaka, yandi bulaka masa, mpi yandi tubaka nde: “Wapi Yehowa, Nzambi ya Eliya?” Ntangu yandi bulaka masa, masa kabwanaka na diboko ya kimama mpi na diboko ya kitata, ebuna Elisha sabukaka.+

15 Ntangu kimvuka ya bambikudi yina vandaka na Yeriko monaka yandi na ntama, bo tubaka nde: “Mpeve ya Eliya me kuma na zulu ya Elisha.”+ Bo kwendaka kukutana ti yandi mpi bo fukamaka na ntwala na yandi. 16 Bo tubilaka yandi nde: “Awa kele ti babakala 50 ya me fwana, yina kele ti bansadi na nge. Pardo, bika bo kwenda kusosa mfumu na nge. Mbala ya nkaka mpeve* ya Yehowa me tombula yandi mpi me losa yandi na ngumba mosi to na muwanda mosi.”+ Kansi yandi tubaka nde: “Beno tinda bo ve.” 17 Ata mpidina, bo vandaka kaka kuyangisa yandi tii kuna yandi waka nsoni, yo yina yandi tubaka nde: “Beno tinda bo.” Bo tindaka bantu yina 50, ebuna bantu yina landaka kusosa bilumbu tatu kansi bo monaka yandi ve. 18 Ntangu bo vutukaka kisika yandi vandaka, yandi vandaka kuzinga na Yeriko.+ Ebuna yandi tubilaka bo nde: “Keti mono songaka beno ve nde beno kwenda ve?”

19 Na nima bantu ya mbanza yina tubilaka Elisha nde: “Mfumu na mono lenda mona nde mbanza kele na kisika ya mbote;+ kansi masa kele mbi, mpi insi ke butaka ve.”* 20 Ebuna yandi tubaka nde: “Beno natila mono ka-bolo mosi ya mpa mpi beno tula mungwa na kati na yo.” Bo natilaka yandi yo. 21 Na nima, yandi kwendaka na nto ya masa, yandi losaka mungwa na kati na yo,+ mpi yandi tubaka nde: “Yehowa ke tuba nde, ‘Mono me belula masa yai. Yo ta nata diaka ve lufwa to kukonda kubuta.’”* 22 Masa yina me belukaka tii bubu yai, kaka mutindu Elisha tubaka.

23 Yandi katukaka pana mpi kwendaka na Betele. Ntangu yandi vandaka na nzila, baleke ya nkaka ya babakala basikaka na mbanza mpi yantikaka kuseka yandi,+ mpi bo vandaka kutubila yandi nde: “Tombuka, nge muntu ya dibandi! Tombuka, nge muntu ya dibandi!” 24 Nsuka-nsuka yandi balukaka, talaka bo, mpi yandi singaka bo na zina ya Yehowa. Ebuna ba-urse zole ya bankento+ basikaka na mfinda mpi zengaka bana 42 na kati na bo bitini-bitini.+ 25 Yandi katukaka kuna mpi kwendaka na Ngumba ya Karmele,+ na nima yandi katukaka kuna mpi vutukaka na Samaria.