Kusonga

17 Wanzio mosi na kati ya bawanzio nsambwadi yina vandaka ti babolo nsambwadi+ kwisaka kutubila mono nde: “Kwisa, mono ta songa nge ndola yina bo ta pesa nkento ya nene ya ndumba yina me vanda na zulu ya bamasa mingi,+ 2 yina bantotila ya ntoto salaka pite*+ ti yandi, mpi bantu ya ntoto lawukaka vinu ya pite*+ na yandi.”

3 Yandi nataka mono na ntoto ya zelo na zelo na ngolo ya mpeve. Ebuna mono monaka nkento mosi me vanda na zulu ya mbisi mosi ya mfinda ya mbwaki ya ngolo; yo vandaka ya kufuluka ti bazina ya ke vweza mpi yo vandaka ti ba-ntu nsambwadi mpi bibongo kumi. 4 Nkento yina lwataka lele ya mbwaki-ble+ mpi ya mbwaki ya ngolo, mpi yandi kudikumisaka kitoko na bima ya wolo, na matadi ya ntalu, ti mayaka;+ na maboko na yandi, yandi vandaka ti dikopa ya wolo ya kufuluka ti bima ya nzanzi mpi bima ya mvindu ya pite* na yandi. 5 Na mbunzu na yandi bo me sonikaka zina mosi, diswekamu mosi: “Babilone ya Nene, mama ya bankento ya ndumba+ mpi ya bima ya nzanzi ya ntoto.”+ 6 Mono monaka nde nkento yina lawukaka menga ya basantu mpi menga ya bambangi ya Yezu.+

Ntangu mono monaka yandi, mono yitukaka mingi. 7 Ebuna wanzio tubilaka mono nde: “Sambu na nki nge ke yituka? Mono ta zabisa nge diswekamu ya nkento+ mpi ya mbisi ya mfinda yina ke nata yandi mpi yina kele ti ba-ntu nsambwadi mpi bibongo kumi:+ 8 Mbisi ya mfinda yina nge monaka vandaka, kansi yo kele ve, ata mpidina yo ke zola kubasika na dibulu ya nda,+ mpi na nima yo ta kwenda na lufwa. Bantu ya ntoto—bayina bo me sonikaka ve bazina na bo na rulo ya luzingu+ katuka luyantiku ya nsi-ntoto—ta yituka ntangu bo ta mona mutindu mbisi ya mfinda vandaka, kansi yo kele ve, ata mpidina yo ta vanda.

9 “Diambu yai ke lomba kuvanda ti ngangu mpi mayele: Ba-ntu nsambwadi+ ke monisa bangumba nsambwadi, kisika nkento yina me vanda na zulu na yo. 10 Mpi kele ti bantotila nsambwadi: Tanu me bwaka, mosi kele, ya nkaka me kwisa ntete ve; kansi ntangu yandi ta kwisa, yandi fwete vanda ntangu fioti. 11 Mbisi ya mfinda yina vandaka, kansi yo kele ve,+ yo kele mpi ntotila ya nana, kansi yo me katuka na bantotila nsambwadi yina, mpi yo ke kwenda na lufwa.

12 “Bibongo kumi yina nge monaka ke monisa bantotila kumi yina me baka ntete ve kimfumu, kansi bo ke baka kiyeka bonso bantotila sambu na ngunga mosi ti mbisi ya mfinda. 13 Bo kele ti dibanza mosi, yo yina bo ke pesa ngolo mpi kiyeka na bo na mbisi ya mfinda. 14 Bo ta nwana ti Mwana-Dimeme,+ kansi sambu yandi kele Mfumu ya bamfumu mpi Ntotila ya bantotila,+ Mwana-Dimeme ta nunga bo.+ Bantu yina kele ti yandi, yina bo me bingaka, yina bo me solaka, mpi yina kele ya kwikama, ta nunga mpi.”+

15 Yandi tubilaka mono nde: “Bamasa yina nge monaka, kisika nkento ya ndumba me vanda, ke monisa bantu, bansi, bimvuka ya bantu, makanda, mpi bandinga.+ 16 Bibongo kumi+ yina nge monaka, mpi mbisi ya mfinda,+ bo ta menga nkento ya ndumba,+ bo ta botula bima na yandi yonso mpi bo ta bika yandi kinkonga; bo ta dia nsuni na yandi mpi bo ta yoka yandi ya mvimba na tiya.+ 17 Sambu Nzambi me tula na bantima na bo ngindu ya kulungisa dibanza na yandi,+ ee, ya kulungisa dibanza mosi yina bo kele na yo ya kupesa kimfumu na bo na mbisi ya mfinda,+ tii kuna mambu ya Nzambi tubaka ta lungana. 18 Mpi nkento+ yina nge monaka ke monisa mbanza ya nene yina kele ti kimfumu na zulu ya bantotila ya ntoto.”