Kulonga

14 “Beno kele bana ya Yehowa Nzambi na beno. Beno kudizenga-zenga ve+ mpi beno kulula ve nsuki ya bambunzu na beno* sambu na muntu ya me fwa.+ 2 Sambu beno kele bantu ya santu+ sambu na Yehowa Nzambi na beno, mpi Yehowa me solaka beno na kukuma bantu na yandi, kima na yandi ya mfunu mingi,* na kati ya bantu yonso yina kele na ntoto.+

3 Nge fwete dia ve konso kima yina kele nzanzi.+ 4 Bambisi yina beno lenda dia+ yo yai: ngombe, dimeme, nkombo, 5 kabuluku, mbambi, bakabuluku ya mitindu ya nkaka, nkombo ya mfinda, kulupa, dimeme ya mfinda, mpi nkombo ya ngumba. 6 Beno lenda dia konso mbisi yina kele ti diboto ya kukabwana na ndambu zole mpi yina ke basisaka madia sambu na kutafuna yo diaka. 7 Kansi, nge fwete dia ve bambisi yai ya ke basisaka madia sambu na kutafuna yo diaka to ya kele ti maboto ya kukabwana: shamo, lape ya mfinda, simbidiki ya matadi, sambu yo ke basisaka madia sambu na kutafuna yo diaka kansi yo kele ve ti maboto ya kukabwana. Yo kele mvindu sambu na beno.+ 8 Ngulu mpi sambu yo kele ti diboto ya kukabwana kansi yo ke basisaka ve madia sambu na kutafuna yo diaka. Yo kele mvindu sambu na beno. Beno fwete dia ve musuni na yo to kusimba bamvumbi na yo.

9 Na kati ya bima yonso yina ke zingaka na masa, beno lenda dia bima yai: Beno lenda dia+ konso kima yina kele ti bipe mpi bibala. 10 Kansi, beno fwete dia ve konso kima yina kele ve ti bipe mpi bibala. Yo kele mvindu sambu na beno.

11 “Beno lenda dia konso ndeke yina kele bunkete. 12 Kansi beno fwete dia ve bandeke yai: ngo-zulu, balbuzare, mbemba ya ndombe,+ 13 kumbi-kumbi ya mbwaki, kumbi-kumbi ya ndombe, mpi bakumbi-kumbi yonso ya nkaka, 14 bakwanga-kwanga yonso, 15 otrishi, kikungulu, dibata ya nzadi-mungwa, bakumbi-kumbi yonso ya matono-matono, 16 kikungulu ya fioti, kikungulu ya makutu-nda, dibata ya masa, 17 pelikane, mbemba, kormoran, 18 mubila, baeron yonso, hupe, ti kapakala-ngonzu. 19 Konso kigangwa ya ke tambulaka na kimvuka mpi ya kele ti mansala* kele mpi mvindu sambu na beno. Beno fwete dia yo ve. 20 Beno lenda dia bigangwa yonso ya bunkete yina ke pumbukaka.

21 “Beno fwete dia ve ata mbisi mosi ya beno me mona ya kufwa.+ Nge lenda pesa yo na munzenza yina ke zinga na kati ya bambanza* na nge, mpi yandi lenda dia yo, to beno lenda tekila yo munzenza. Beno kele bantu ya santu sambu na Yehowa Nzambi na beno.

“Beno fwete tokisa ve mwana-nkombo na mabele ya mama na yo.+

22 “Nge fwete pesa kibeni ndambu mosi na kati ya bandambu kumi* ya bima yonso yina nkeni na nge ke basisa na bilanga konso mvula.+ 23 Nge ta dia ndambu mosi na kati ya bandambu kumi ya mbuma na nge, ya vinu na nge ya mpa, ya mafuta na nge, mpi ya mwana ya ntete ya bangombe na nge mpi ya mameme na nge na ntwala ya Yehowa Nzambi na nge na kisika yina yandi ke sola sambu zina na yandi kuvanda,+ mpidina nge ta longuka kuwa Yehowa Nzambi na nge boma ntangu yonso.+

24 “Kansi kana nzietelo kuvanda nda mingi sambu na nge ebuna nge kuka ve kunata yo na kisika yina Yehowa Nzambi na nge me sola bonso kisika sambu na zina na yandi,+ sambu kisika yango kele ntama ti nge (sambu Yehowa Nzambi na nge ta sakumuna nge), 25 nge lenda teka yo, ebuna nge kwenda ti mbongo na nge na maboko na kisika yina Yehowa Nzambi na nge ta sola. 26 Ebuna nge lenda sadila mbongo yina sambu na kusumba konso kima yina nge me zola*—bangombe, mameme, bankombo, vinu ti malafu ya nkaka ya ke lawusaka mpi konso kima yina ke sepedisa nge;* nge ta dia pana na ntwala ya Yehowa Nzambi na nge mpi ta wa kiese, nge ti bantu ya nzo na nge.+ 27 Kuvila ve Mulevi yina kele na kati ya bambanza na nge,+ sambu yandi kele ve ti kimvwama to dikabu ti nge.+

28 “Na nsuka ya konso bamvula tatu, nge fwete nata ndambu yina ya kumi ya mvimba na kati ya bandambu kumi ya bima na nge sambu na mvula yina mpi kutula yo na kati ya bambanza na nge.+ 29 Ebuna Mulevi, yina kele ve ti kimvwama to dikabu ti nge, munzenza, mwana ya me konda tata,* mpi mufwidi ya nkento, bayina kele na kati ya bambanza na nge, bo ta kwisa, bo ta dia, mpi bo ta fuluka,+ mpidina Yehowa Nzambi na nge ta sakumuna nge na mambu yonso yina nge ke sala.+