Kulonga

13 “Kana mbikudi to muntu ya ke zabisaka mambu yina ke kwisa na nzila ya bandosi kubasika na kati na beno mpi kupesa nge kidimbu to kuzabisa nge diambu mosi ya ke kwisa, 2 ebuna kidimbu to diambu yina yandi tubilaka nge kulungana na ntangu yandi ke tuba nde, ‘Beto landa banzambi ya nkaka, banzambi yina nge zabaka ve, mpi beto sadila bo,’ 3 nge fwete widikila ve mambu yina mbikudi yina to muntu yina ya ke lalaka bandosi+ ke tuba, sambu Yehowa Nzambi na beno ke meka beno+ sambu na kuzaba kana beno ke zolaka Yehowa Nzambi na beno na ntima na beno ya mvimba mpi na moyo*+ na beno ya mvimba. 4 Beno fwete landa Yehowa Nzambi na beno, beno fwete wa yandi boma, beno fwete zitisa bantuma na yandi, beno fwete widikila ndinga na yandi; beno fwete sadila yandi, mpi beno fwete kangama ngolo na yandi.+ 5 Kansi bo fwete fwa+ mbikudi yina to muntu yina ke lalaka bandosi, sambu yandi siamisaka beno na kukolama na Yehowa Nzambi na beno—yina basisaka beno na insi ya Ezipte mpi sumbaka beno diaka na nzo ya kimpika—sambu na kukatula nge na nzila yina Yehowa Nzambi na nge songaka nge na kutambula. Nge fwete katula kima yina kele ya mbi na kati na beno.+

6 Kana mpangi na nge ya bakala, mwana ya mama na nge, to mwana na nge ya bakala to ya nkento to nkento na nge ya nge ke zolaka mingi to nduku na nge ya ngolo* kusosa kubenda nge na kinsweki mpi kutuba nde, ‘Beto kwenda mpi beto sadila banzambi ya nkaka,’+ banzambi yina nge ti ba-nkaka na nge zabaka ve, 7 banzambi ya bantu yina kele na nziunga na beno, yo vanda bayina kele pene-pene ti nge to ntama ti nge, katuka na nsongi mosi ya insi tii na nsongi ya nkaka ya insi, 8 nge fwete ndima yandi ve to kuwidikila yandi,+ nge fwete wila yandi mpi ve mawa to kufwila yandi nkenda to kutanina yandi; 9 kansi, nge fwete fwa yandi kibeni.+ Nge fwete vanda muntu ya ntete ya kulosila yandi matadi sambu na kufwa yandi, mpi na nima bantu yonso fwete losila yandi matadi.+ 10 Nge fwete fwa+ yandi na matadi sambu yandi sosaka kunata nge na kuyambula Yehowa Nzambi na nge, yina basisaka nge na insi ya Ezipte, na nzo ya kimpika. 11 Ebuna Izraele ya mvimba ta wa yo mpi ta kuma na boma, ebuna bo ta salaka diaka ve diambu ya mbi ya mutindu yai na kati na beno.+

12 “Kana na mbanza mosi na kati ya bambanza na nge yina Yehowa Nzambi na nge ke pesa nge sambu na kuzinga, nge wa bo ke tuba nde, 13 ‘Bantu ya mpamba-mpamba me basika na kati na beno sambu na kuvidisa bantu ya mbanza na bo nzila, mpi bo ke tuba nde: “Beto kwenda mpi beto sadila banzambi ya nkaka,” banzambi yina beno zabaka ve,’ 14 nge fwete tadila kibeni diambu yina, kuzikisa yo mbote-mbote mpi kuyula;+ kana diambu yai ya nzanzi me salama na kati na beno mpi yo me monana nde yo kele ya kieleka, 15 nge fwete fwa kibeni bantu ya mbanza yina na mbele ya bitumba.+ Fwa+ yo ti bima yonso yina kele na kati na yo, ti bitwisi na yo, na mbele ya bitumba. 16 Ebuna, nge fwete vukisa bima na yo yonso ya nge ta botula na kati-kati ya bala-bala na yo ya nene mpi kuyoka mbanza yina tiya, mpi bima na yo yina beno ta botula ta vanda dikabu ya mvimba sambu na Yehowa Nzambi na nge. Yo ta kuma mayumbu kimakulu. Bo fwete tunga yo diaka ve ata fioti. 17 Nge fwete baka ve ata kima mosi yina bo tulaka na kingenga sambu bo fwa yo,*+ mpidina Yehowa ta yambula makasi na yandi ya ngolo mpi ta wila nge mawa mpi ta fwila nge nkenda mpi ta kumisa nge mingi, kaka mutindu yandi diaka ndefi na ba-nkaka na nge.+ 18 Nge fwete lemfukila* Yehowa Nzambi na nge mpi kuzitisa bantuma na yandi yonso yina mono ke pesa nge bubu yai, na mutindu yina nge ke sala mambu yina kele mbote na meso ya Yehowa Nzambi na nge.+