Yozue

23 Na nima ya bilumbu mingi ntangu Yehowa pesaka bantu ya Izraele ngemba+ na mutindu yandi gulusaka bo na maboko ya bambeni na bo yonso yina vandaka na nziunga, ntangu Yozue kumaka mununu mpi ti bamvula mingi,+ 2 Yozue bingaka Izraele ya mvimba,+ bankuluntu, bamfumu, bazuzi, mpi bakapita na yo,+ ebuna yandi tubilaka bo nde: “Mono me nuna; mono me kuma ti bamvula mingi. 3 Beno me mona beno mosi mambu yonso yina Yehowa Nzambi na beno salaka makanda yai yonso sambu na beno, sambu Yehowa Nzambi na beno muntu vandaka kunwana sambu na beno.+ 4 Beno tala: Na nima ya kubula zeke,+ mono pesaka beno ntoto ya makanda yina me bikala bonso dikabu sambu na makanda na beno,+ mpi ntoto ya makanda yonso yina mono fwaka,+ katuka na Yordani tii na Nzadi-Mungwa ya Nene* na westi.* 5 Yehowa Nzambi na beno muntu vandaka kukatula bo na ntwala na beno,+ yandi kulaka bo* sambu na beno, mpi beno bakaka ntoto na bo, kaka mutindu Yehowa Nzambi na beno silaka beno.+

6 Ntangu yai beno fwete vanda kikesa sambu na kulanda mpi kuzitisa mambu yonso ya bo me sonikaka na mukanda ya Nsiku+ ya Moize mpi beno fwete yambula yo ve ata fioti sambu na kukwenda na diboko ya kitata to na diboko ya kimama,+ 7 beno fwete vukana ve ata fioti ti makanda yai+ ya me bikala ti beno. Beno fwete tanga nkutu ve bazina ya banzambi na bo+ to kuzenga kieleka na zina na bo, mpi beno fwete sadila bo ve ata fioti to kufukama na ntwala na bo.+ 8 Kansi beno fwete kangama na Yehowa Nzambi na beno,+ kaka mutindu beno me salaka tii bubu yai. 9 Yehowa ta kula makanda ya nene mpi ya ngolo na ntwala na beno,+ sambu ata muntu mosi ve me kukaka kutelama na ntwala na beno tii bubu yai.+ 10 Muntu mosi mpamba na kati na beno ta kudikisa bambeni funda mosi,+ sambu Yehowa Nzambi na beno ke nwana sambu na beno,+ kaka mutindu yandi silaka beno.+ 11 Yo yina beno keba ntangu yonso*+ mpi beno zola Yehowa Nzambi na beno.+

12 “Kansi kana beno yambula yandi mpi beno kangama na bantu yina me bikala na makanda yai,+ bantu yina me bikala ti beno, mpi beno sala kuwakana ya makwela*+ ti bo mpi beno vukana ti bo, mpi bo ti beno, 13 beno fwete zaba kibeni nde Yehowa Nzambi na beno ta landa ve kukula* makanda yai sambu na beno.+ Bo ta kuma bukondi, mutambu, mpi fimbu na bampanzi+ na beno mpi bonso bansende na meso na beno tii kuna beno ta fwa na ntoto yai ya mbote yina Yehowa Nzambi na beno me pesa beno.

14 “Tala! Mono ke zola kufwa,* mpi beno me zaba mbote na ntima na beno ya mvimba mpi na moyo* na beno ya mvimba nde ata diambu mosi ve na kati ya balusilu ya mbote yina Yehowa Nzambi na beno pesaka beno kondaka kulungana. Yonso lunganaka sambu na beno. Ata diambu mosi ve na kati na yo kondaka kulungana.+ 15 Kansi kaka mutindu balusilu yonso ya mbote yina Yehowa Nzambi na beno pesaka beno lunganaka sambu na beno,+ mutindu mosi Yehowa ta natila beno bampasi yonso yina yandi silaka* mpi ta manisa beno na ntoto yai ya mbote yina Yehowa Nzambi na beno me pesa beno.+ 16 Kana beno zitisa ve kuwakana ya Yehowa Nzambi na beno yina yandi songaka beno na kuzitisa, mpi kana beno kwenda kusadila banzambi ya nkaka mpi kufukama na ntwala na yo, Yehowa ta wila beno makasi,+ mpi beno ta fwa nswalu na ntoto ya mbote yina yandi me pesa beno.”+